ଇଂଲଣ୍ଡର କିମ୍ବଦନ୍ତୀ ପେସର୍ ଜେମ୍ସ ଆଣ୍ଡରସନ ପ୍ରଥମ ଶ୍ରେଣୀ କ୍ୟାରିୟରରେ ୧୦୦୦ ଉଇକେଟ ନେଇ ନୂଆ କୀର୍ତ୍ତିମାନ ହାସଲ କରିଛନ୍ତି। ସେ ଲାନକାର୍ଶି ଖେଳିବାବେଳେ କେଣ୍ଟ ବିପକ୍ଷ ମ୍ୟାଚରେ ଏହି ସଫଳତା ହାସଲ କରିଥିଲେ। ଚଳିତ ମାସ ଶେଷରେ ତାଙ୍କର ୩୯ତମ ଜନ୍ମଦିନ ପାଳନ କରିବାକୁ ପ୍ରସ୍ତୁତ ହେଉଥିବା ଆଣ୍ଡରସନ ଏହି ନୂଆ ରେକର୍ଡ କରିଛନ୍ତି। ଓଲ୍ଡ ଟ୍ରାଫର୍ଡରେ ଆଣ୍ଡରସନ ଏହି ଚମତ୍କାର ପ୍ରଦର୍ଶନ କରିଥିଲେ ଏବଂ ୫୧ ତମ ଥର ପାଇଁ ଇନିଂସରେ ୫ ଉଇକେଟ ନେଇଥିଲେ। ମ୍ୟାଚର ପ୍ରଥମ ୭ ଓଭରରେ ସେ ୩ ରନ ପାଇଁ ୫ଟି ଉଇକେଟ ନେଇଥିଲେ। ଏବେ ଅନ୍ତର୍ଜାତୀୟ କ୍ରିକେଟରେ ତାଙ୍କର ୯୦୪ ଉଇକେଟ ରହିଛି। ସେ ଟେଷ୍ଟରେ ମୋଟ ୬୧୭ ଉଇକେଟ, ଦିନିକିଆରେ ୨୬୯ ଉଇକେଟ ଏବଂ ଟି -୨୦ ଅନ୍ତର୍ଜାତୀୟ କ୍ୟାରିୟରରେ ୧୮ଟି ଉଇକେଟ ନେଇଛନ୍ତି।
୨୦୦୨ ମସିହାରେ ଆନ୍ତର୍ଜାତିକ ପଦାର୍ପଣ କରିଥିବା ଆଣ୍ଡରସନ, କ୍ୟାରିୟରରେ ୧୦୦୦ ଉଇକେଟ ନେଇଥିବା ୧୪ତମ ଖେଳାଳି। ସେ ଆଣ୍ଡି କ୍ୟାଡିକ (୨୦୦୫), ମାର୍ଟିନ ବିକନେଲ (୨୦୦୪), ଡିଭନ ମଲକମ (୨୦୦୨) ଏବଂ ୱାସିମ ଆକ୍ରାମ (୨୦୦୧)ଙ୍କ ପରେ ଏହା କରିବାରେ ପଞ୍ଚମ ଦ୍ରୁତ ବୋଲର ଅଟନ୍ତି। ଟେଷ୍ଟ କ୍ରିକେଟରେ ଇଂଲଣ୍ଡ ପାଇଁ ୧୬୨ଟି ମ୍ୟାଚରେ ହାରାହାରି ୨୬.୬୭ ହାରରେ ୬୧୭ ଉଇକେଟ ନେଇ ବିଶ୍ୱର ସର୍ବୋତ୍ତମ ଦ୍ରୁତ ବୋଲର ହୋଇଛନ୍ତି।
