ନୂଆଦିଲ୍ଲୀ,୧୨ା୩(ପି.ଟି.):ବିଶ୍ୱରେ ସବୁଠାରୁ ପ୍ରଦୂଷିତ ୨୦ ସହର ମଧ୍ୟରୁ ଭାରତର ୧୩ ସହର ରହିଛି। ସୁଇସ୍ ଏୟାର କ୍ୱାଲିଟି ଟେକ୍ନୋଲୋଜି କମ୍ପାନୀ ‘ଆଇକ୍ୟୁ ଏୟାର’ ପକ୍ଷରୁ ମଙ୍ଗଳବାର ଜାରି କରାଯାଇଥିବା ‘ବିଶ୍ୱ ବାୟୁ ଗୁଣବତ୍ତା ରିପୋର୍ଟ ୨୦୨୪’ ଅନୁଯାୟୀ, ମେଘାଳୟର ବର୍ନିହାଟ ହେଉଛି ବିଶ୍ୱର ସବୁଠୁ ପ୍ରଦୂଷିତ ସହର। ସେହିପରି ଭାରତର ରାଜଧାନୀ ଦିଲ୍ଲୀ ମଧ୍ୟ ସବୁଠାରୁ ପ୍ରଦୂଷିତ ରାଜଧାନୀ ହୋଇଥିବା ନେଇ ‘ଆଇକ୍ୟୁ ଏୟାର’ ପକ୍ଷରୁ କରାଯାଇଥିବା ଏକ ଅଧ୍ୟୟନରେ କୁହାଯାଇଛି। ୨୦୨୪ରେ ଭାରତ ବିଶ୍ୱର ପଞ୍ଚମ ସବୁଠାରୁ ପ୍ରଦୂଷିତ ଦେଶ ହୋଇଥିବା ଏହି ରିପୋର୍ଟ କହିଛି। ୨୦୨୩ରେ ଭାରତ ଏହି ତାଲିକାର ତୃତୀୟ ସ୍ଥାନରେ ଥିଲା।
୨୦୨୩ଠାରୁ ୨୦୨୪ରେ ଭାରତର ପିଏମ୍ ୨.୫ ସାନ୍ଧ୍ରତାରେ ୭% ହ୍ରାସ ଲକ୍ଷ୍ୟ କରାଯାଇଛି। ୨୦୨୩ରେ ଭାରତର ବାର୍ଷିକ ହାରାହାରି ପିଏମ୍ ୨.୫ ସାନ୍ଧ୍ରତା ୫୪.୪ ମାଇକ୍ରୋଗ୍ରାମ/କ୍ୟୁବିକ୍ ମିଟର ଥିବାବେଳେ ୨୦୨୪ରେ ଏହି ସଂଖ୍ୟା ସାମାନ୍ୟ ଖସି ୫୦.୬ ମାଇକ୍ରୋଗ୍ରାମ/କ୍ୟୁବିକ୍ ମିଟରରେ ପହଞ୍ଚିଛି। ବିଶ୍ୱର ସବୁଠାରୁ ୧୦ ପ୍ରଦୂଷିତ ସହର ମଧ୍ୟରେ ଭାରତର ୬ ସହର ଥିବା ଏହି ରିପୋର୍ଟ କହିଛି। ଦିଲ୍ଲୀରେ ଲଗାତର ଭାବେ ଉଚ୍ଚ ପ୍ରଦୂଷଣ ସ୍ତର ରେକର୍ଡ ହୋଇଛି। ଏହାର ବାର୍ଷିକ ହାରାହାରି ପିଏମ୍ ୨.୫ ସାନ୍ଧ୍ରତା ୧୦.୮.୩ ମାଇକ୍ରୋଗ୍ରାମ/କ୍ୟୁବିକ୍ ମିଟର ରହିଛି, ଯାହା ଗତବର୍ଷ ୧୦୨.୪ ମାଇକ୍ରୋଗ୍ରାମ/କ୍ୟୁବିକ୍ ମିଟର ରହିଥିଲା। ବିଶ୍ୱର ୨୦ ପ୍ରଦୂଷିତ ସହର ମଧ୍ୟରେ ଥିବା ୧୩ ଭାରତୀୟ ସହର ହେଉଛି ବର୍ନିହାଟ, ଦିଲ୍ଲୀ, ନୂଆଦିଲ୍ଲୀ, ପଞ୍ଜାବର ମୁଲ୍ଲାନପୁର, ହରିୟାଣାର ଫରିଦାବାଦ, ଗୁରୁଗ୍ରାମ, ଉତ୍ତରପ୍ରଦେଶର ଲୋନି, ଗ୍ରେଟରନୋଏଡା, ନୋଏଡା, ମୁଜାଫରନଗର, ରାଜସ୍ଥାନର ଗଙ୍ଗାନଗର, ଭିଓ୍ବାଡ଼ି, ହନୁମାନଗଡ଼। ୩୫% ଭାରତୀୟ ସହରର ପ୍ରଦୂଷଣ ସ୍ତର ବିଶ୍ୱ ସ୍ବାସ୍ଥ୍ୟ ସଙ୍ଗଠନ (ଡବ୍ୟୁଏଚ୍ଓ) ପକ୍ଷରୁ ଜାରି କରାଯାଇଥିବା ସୀମା ୫ ମାଇକ୍ରୋଗ୍ରାମ/କ୍ୟୁବିକ୍ ମିଟରଠାରୁ ଅତିକମ୍ରେ ୧୦ ଗୁଣା ଅଧିକ ରହିଥିବା ନେଇ ଏହି ଅଧ୍ୟୟନ କହିଛି। ଏହି ରିପୋର୍ଟ ଅନୁଯାୟୀ, ବିଶ୍ୱର ୨୦ ପ୍ରଦୂଷିତ ସହର ମଧ୍ୟରେ ପାକିସ୍ତାନର ୪ ଏବଂ ଚାଇନାର ଗୋଟିଏ ସହର ରହିଛି। ଆଫ୍ରିକୀୟ ଦେଶ ଚାଡ୍ ବିଶ୍ୱର ସବୁଠାରୁ ପ୍ରଦୂଷିତ ହୋଇଥିବାବେଳେ ବାଂଲାଦେଶ ଏବଂ ପାକିସ୍ତାନ ଯଥାକ୍ରମେ ବିଶ୍ୱର ଦ୍ୱିତୀୟ ଏବଂ ତୃତୀୟ ସବୁଠୁ ପ୍ରଦୂଷିତ ଦେଶ ହୋଇଥିବା ଏହି ରିପୋର୍ଟ କହିଛି। ସବୁଠାରୁ ପ୍ରଦୂଷିତ ଦେଶ ତାଲିକାର ଚତୁର୍ଥ ଏବଂ ପଞ୍ଚମ ସ୍ଥାନରେ ଯଥାକ୍ରମେ ଡେମୋକ୍ରାଟିକ୍ ରିପବ୍ଲିକ ଅଫ୍ କଙ୍ଗୋ ଏବଂ ଭାରତ ରହିଛନ୍ତି।
