ସିଡ୍ନୀ, ୭।୧(ପି.ଟି.): ଗୁରୁବାରଠାରୁ ଏଠାରେ ଆରମ୍ଭ ହେବାକୁ ଯାଉଥିବା ତୃତୀୟ ଟେଷ୍ଟ ମ୍ୟାଚରେ ଏକ ନୂଆ କଥା ଦେଖିବାକୁ ମିଳିବ। ପ୍ରଥମଥର ପାଇଁ ଏକ ପୁରୁଷ ମ୍ୟାଚରେ ଜଣେ ମହିଳା ମ୍ୟାଚ ଅଫିସିଆଲ ଦାୟିତ୍ୱରେ ରହିବେ। ସେ ହେଉଛନ୍ତି ଅଷ୍ଟ୍ରେଲିଆର କ୍ଲେୟାର ପୋଲୋସାକ। ସେ ସିଡ୍ନୀ ଟେଷ୍ଟରେ ଚତୁର୍ଥ ଅମ୍ପାୟରର ଦାୟିତ୍ୱ ନିର୍ବହା କରିବେ।
ନ୍ୟୁ ସାଉଥ୍ଓ୍ବେଲ୍ସର ୩୨ ବର୍ଷୀୟା କ୍ଲେୟାର ପୂର୍ବରୁ ପ୍ରଥମ ମହିଳା ଅନ୍ ଫିଲ୍ଡ ଅମ୍ପାୟର ଭାବ ପୁରୁଷ ଦିନିକିଆ ମ୍ୟାଚ ଆଇସିସିର ଡିଭିଜନ ୨ ଲିଗ୍ରେ ଦାୟିତ୍ୱ ନିର୍ବାହ କରିଛନ୍ତି। ୨୦୧୯ରେ ଓ୍ବିଣ୍ଡହୋକ୍ରେ ନାମ୍ବିଆ ଏବଂ ଓମାନ ମଧ୍ୟରେ ଅନୁଷ୍ଠିତ ମ୍ୟାଚକୁ ସେ ପରିଚାଳନା କରିଥିଲେ। ଭାରତ- ଅଷ୍ଟ୍ରେଲିଆ ତୃତୀୟ ଟେଷ୍ଟରେ ଅନ୍ ଫିଲ୍ଡ ଅମ୍ପାୟର ଭାବେ ଦୁଇ ପୂର୍ବତନ ଦ୍ରୁତ ବୋଲର ପଲ ଓ୍ବିଲସନ ଓ ପଲ ରିଫିଲ ମ୍ୟାଚ ପରିଚାଳନା କରିବେ। ସେହିପରି ଟିଭି ଅମ୍ପାୟର ଭାବେ ବ୍ରୁସ୍ ଓକ୍ସେନଫୋର୍ଡ ଦାୟିତ୍ୱରେ ରହିବେ। ଅଷ୍ଟ୍ରେଲିଆର ପୂର୍ବତନ କ୍ରିକେଟର ଡେଭିଡ ବୁନ୍ ମ୍ୟାଚ ରେଫରି ଭାବେ ଦାୟିତ୍ୱ ସମ୍ପାଦନ କରିବେ।
ଆଇସିସି ନିୟମ ଅନୁସାରେ ଘରୋଇ କ୍ରିକେଟ ବୋର୍ଡ ଚତୁର୍ଥ ଅମ୍ପାୟର ନିଯୁକ୍ତ କରିଥାନ୍ତି। କ୍ଲେୟାର ନ୍ୟୁ ସାଉଥ୍ ଓ୍ବେଲ୍ସର ଗୋଲବର୍ନ ସହରରେ ରହୁଛନ୍ତି। ସେ ମଧ୍ୟ ପ୍ରଥମ ମହିଳା ମ୍ୟାଚ ଅଫିସିଆଲ ଭାବେ ଅଷ୍ଟ୍ରେଲିଆରେ ଲିଷ୍ଟ ଏ ଗେମ୍ରେ ମ୍ୟାଚ ପରିଚାଳନା କରି ସମସ୍ତଙ୍କ ଦୃଷ୍ଟିଆକର୍ଷଣ କରିଥିଲେ।
ଚତୁର୍ଥ ଅମ୍ପାୟରଙ୍କ ଦାୟିତ୍ୱ
ଅନ୍ଫିଲ୍ଡ ଅମ୍ପାୟରଙ୍କଠାରୁ ଚତୁର୍ଥ ଅମ୍ପାୟରଙ୍କ ଦାୟିତ୍ୱ ସମ୍ପୂର୍ଣ୍ଣ ଅଲଗା । ଚତୁର୍ଥ ଅମ୍ପାୟର ପଡିଆକୁ ନୂଆ ବଲ, ଫିଲ୍ଡ ଅମ୍ପାୟରଙ୍କ ପାଇଁ ପାନୀୟ ଆଣିଥାନ୍ତି। ସେ ଲାଇଟ୍ ମିଟରର ବ୍ୟାଟେରି ଚେକ୍ କରିଥାନ୍ତି। ଲଞ୍ଚ୍ ଓ ଚା’ ପାନ ବିରତି ଅବସରରେ ସେ ପିଚ୍ ନିରୀକ୍ଷଣ କରିବା ସହ ଖେଳ ଆରମ୍ଭ ହେବା ନେଇ ସବୁଜ ସଙ୍କେତ ଦେଇଥାନ୍ତି। ଏଥିସହିତ ନୂଆ ବେଲ୍ ମଧ୍ୟ ସେ ଆଣିଥାନ୍ତି। ଆବଶ୍ୟକ ପଡିଲେ ଚତୁର୍ଥ ଅମ୍ପାୟର ତୃତୀୟ ଅମ୍ପାୟରଙ୍କ ଦାୟିତ୍ୱ ନିର୍ବାହ କରିଥାନ୍ତି। ଅନ୍ଫିଲ୍ଡ ଅମ୍ପାୟର କିଛି ସମସ୍ୟାରେ ପଡିଲେ ତୃତୀୟ ଅମ୍ପାୟର ତାଙ୍କ ଦାୟିତ୍ୱ ନେଇଥାନ୍ତି। ଏପରି ସ୍ଥଳେ ଚତୁର୍ଥ ଅମ୍ପାୟର ତୃତୀୟ ଅମ୍ପାୟରଙ୍କ ଦାୟିତ୍ୱ ସମ୍ଭାଳିଥାନ୍ତି।
