ଭଞ୍ଜନଗର,୧୮।୯(ବାବୁଲା ପ୍ରଧାନ) : ଗଞ୍ଜାମ ଜିଲା ଭଞ୍ଜନଗର ଶ୍ରୀଅରବିନ୍ଦ ଶକ୍ତିପୀଠର ତୃତୀୟ ପ୍ରତିଷ୍ଠା ଦିବସ ଗୁରୁବାର ପାଳିତ ହୋଇଯାଇଛି । ଏହି ଅବସରରେ ଶକ୍ତିପୀଠର ମ୍ୟାନେଜିଂ ଟ୍ରଷ୍ଟି ତଥା ଆସ୍ପୃହା ମଣ୍ଡଳର ଆବାହକ ଲଲାଟେନ୍ଦୁ ସାମନ୍ତ ସଭାରେ ଅଧ୍ୟକ୍ଷତା କରିଥିଲେ। ଗଞ୍ଜାମ ଜିଲା ଆବାହକ ଶଶଧର ବେହେରା, ମହିଳା ପାଠଚକ୍ରର ସଭାନେତ୍ରୀ ଜ୍ୟୋତିର୍ମୟୀ ପ୍ରଧାନ, ପ୍ରଫେସର କୃତିବାସ ବିଶ୍ୱାଳ ପ୍ରମୁଖ ଅତିଥି ଭାବେ ଯୋଗ ଦେଇଥିଲେ।
ସକାଳେ କୃତିବାସ ବିଶ୍ୱାଳ ମାତୃପତାକା ଉତ୍ତୋଳନ କରିଥିଲେ । ମଧୁସ୍ମିତା ସାହୁ ଦୁର୍ଗାସ୍ତୋତ୍ର ପାଠ କରିଥିବାବେଳେ ଲିପି ଅପା ‘ମା’ ବହି ପାଠ ଓ ରତ୍ନମଞ୍ଜରୀ ପାଢ଼ୀ ପ୍ରାର୍ଥନା ବହି ପାଠ କରିଥିଲେ । ତପସ୍ୱିନୀ ପ୍ରଧାନ ମାତୃ ସଙ୍ଗୀତ ଗାନ କରିଥିଲେ । ମୁଖ୍ୟ ଅତିଥି ଭାଗିରଥି ମହାପାତ୍ର ଶ୍ରୀଅରବିନ୍ଦଙ୍କ ଯୋଗଦର୍ଶନ ଏବଂ ଆଗାମୀ ଦିନରେ ପୃଥିବୀରେ ଏକ ନୂତନ ମାନବ ସମାଜ ଗଠନ କ୍ଷେତ୍ରରେ ଶ୍ରୀଅରବିନ୍ଦଙ୍କ ଯୋଗଦର୍ଶନର ଉପାଦେୟତା ସମ୍ପର୍କରେ ଆଲୋକପାତ କରିଥିଲେ। ସମ୍ମାନିତ ଅତିଥି ଶଶଧର ବେହେରା ଓ ଗୀତା ଅପା ସାଙ୍ଗଠନିକ ଆଲୋଚନା କରିଥିଲେ।
ଏହି କାର୍ଯ୍ୟକ୍ରମରେ ପୋଲସରା, ଆସିକା, ବୁଗୁଡ଼ା, ଜଗନ୍ନାଥପ୍ରସାଦ, ବେଲଗୁଣ୍ଠା, ବାଲିଗୁଡ଼ା ଓ ଉଦୟଗିରି ଅଞ୍ଚଳରୁ ବହୁ ମାତୃପ୍ରେମୀ ଯୋଗଦେଇଥିଲେ। ମ୍ୟାନେଜିଂ ଟ୍ରଷ୍ଟି ଲଲାଟେନ୍ଦୁ ସାମନ୍ତ ଧନ୍ୟବାଦ ଅର୍ପଣ କରିଥିଲେ। ଟ୍ରଷ୍ଟି ରମେଶ ବେହେରା, ବାବୁଲା ପ୍ରଧାନ, ଅବିନାଶ ମହାରଣା, ସୁନନ୍ଦା ବେହେରା ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।