ଛତ୍ରପୁର,୧୬ା୧୨(ଦିଲ୍ଲୀପ ସାମଲ): ନକଲି ଫୋନ ପେ ବ୍ୟବହାର କରି ବ୍ୟବସାୟୀମାନଙ୍କୁ ଠକେଇ କରୁଥିବା ଅଭିଯୋଗର ତଦନ୍ତ ପରେ ଛତ୍ରପୁର ପୋଲିସ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ସେ ହେଲେ ନଳିନୀକାନ୍ତ ଜେନା। ସେ ନକଲି ଫୋନ ପେ ଦ୍ୱାରା ଠକିବା ସହ ବ୍ୟବସାୟୀଙ୍କୁ ଠକିବା ପାଇଁ ନକଲି ଚେକ୍ ମଧ୍ୟ ବ୍ୟବହାର କରୁଥିଲେ। ଛତ୍ରପୁର ଥାନା ପରିସରରେ ଫୋନ ପେ ଦ୍ୱାରା କିପରି ଠକେଇ କରୁଛନ୍ତି ସେ ନେଇ ସେ ଡେମୋ ଦେଖାଇଥିଲେ।
ଖବରରୁ ଜଣାପଡିଛି, ଗଞ୍ଜାମ ଜିଲା ଛତ୍ରପୁର ଜାତୀୟ ରାଜପଥ ପାର୍ଶ୍ୱରେ ମା’ ସନ୍ତୋଷୀ ଟ୍ରେଡ଼ର୍ସ ନାମକ ଏକ ଲୁହା ଦୋକାନ ରହିଛି। ଗତ ଡିସେମ୍ବର ୧୪ରେ ଗୋପାଳପୁର ଆର୍ମି ପବ୍ଲିକ ସ୍କୁଲ ପରିସରରେ କାମ ହେଉଥିବା କହି ବ୍ରହ୍ମପୁର ସଦର ଥାନା ଅନ୍ତର୍ଗତ ପାଣ୍ଡିଆଝୁଲି ଗ୍ରାମର ନଳିନୀକାନ୍ତ ମା’ ସନ୍ତୋଷୀ ଟ୍ରେଡ଼ର୍ସରୁ ୯୧ ହଜାର ୩୦୦ ଟଙ୍କାର ଲୁହା ସାମଗ୍ରୀ କିଣିଥିଲେ।ଏହି ସାମଗ୍ରୀ ଗୋପାଳପୁର ଆର୍ମି ପବ୍ଲିକ ସ୍କୁଲକୁ ଏକ ଗାଡି ଯୋଗେ ନେଇଥିଲେ। ମା’ ସନ୍ତୋଷୀ ଟ୍ରେଡ଼ର୍ସ ମାଲିକଙ୍କୁ ଫୋନ ପେ ଯୋଗେ ୯୧ ହଜାର ୩୦୦ ଟଙ୍କା ପୈଠ କରିଥିବା ଅଭିଯୁକ୍ତ ନଳିନୀକାନ୍ତ କହିବା ସହ ସ୍କ୍ରିନଶଟ୍ ମଧ୍ୟ ପଠାଇଥିଲେ। ମାତ୍ର ଏହା ସମ୍ପୃକ୍ତ ବ୍ୟବସାୟୀଙ୍କ ଆକାଉଣ୍ଟରେ ଜମା ହୋଇ ନ ଥିଲା। ପରେ ନଳିନୀକାନ୍ତ ତାଙ୍କୁ ସରଭର ଡାଉନ ଥିବା କହିବା ସହ ତାଙ୍କୁ ଆର୍ମି ପବ୍ଲିକ ସ୍କୁଲର ଏକ ଚେକ୍ ୪ ଲକ୍ଷ ୩୫ ହଜାର ଟଙ୍କାର ଦେଇ ପୁଣି ସାମଗ୍ରୀ ଦେବାକୁ କହିଥିଲେ। ଦୁଇ ଦିନ ପରେ ମଧ୍ୟ ଟ୍ରେଡ଼ର୍ସ ମାଲିକଙ୍କ ଆକାଉଣ୍ଟକୁ ଟଙ୍କା ନ ଆସିବାରୁ ସେ ବାଧ୍ୟ ହୋଇ ଛତ୍ରପୁର ଥାନାରେ ଅଭିଯୋଗ କରିଥିଲେ। ଏହାକୁ ଭିତ୍ତିକରି ନଂ. ୭୭୩/୨୫ରେ ଏକ ମାମଲା ରୁଜୁକରି ପୋଲିସ ଏହାର ତଦନ୍ତ କରି ନଳିନୀକାନ୍ତଙ୍କୁ ଚମାଖଣ୍ଡି ଥାନା ଅନ୍ତର୍ଗତ ଜଗନ୍ନାଥପୁର ଛକ ନିକଟରୁ ଗିରଫ କରିଥିଲା। ପଚରାଉଚରା ପରେ ଅଭିଯୁକ୍ତ ନକଲି ଫୋନ ପେ ମାଧ୍ୟମରେ ଟଙ୍କା ହେର ଫେର କରୁଥିବା ମାନିଥିଲେ। ଏଥିପାଇଁ ସେ ବିଭିନ୍ନ ନକଲି ଆପ୍ଲିକେଶନର ବ୍ୟବହାର କରୁଛନ୍ତି। ଏପରିକି ସେ ଦେଇଥିବା ଚେକ୍ ମଧ୍ୟ ନକଲି ଥିବା ପଚରାଉଚରା ବେଳେ କହିଛନ୍ତି। ତାଙ୍କଠାରୁ ପୋଲିସ ୩ଟି ନକଲି ଚେକ୍ ମଧ୍ୟ ଜବତ କରିଛି। ଠକେଇ ସାମଗ୍ରୀଗୁଡିକ ହିଞ୍ଜିଳିକାଟୁ ଅଞ୍ଚଳରେ ବିକ୍ରି କରାଯାଇଥିବା ପୋଲିସ ଜାଣିବା ପରେ ଏହାର ଅଧିକ ତଦନ୍ତ ଜାରି ରଖିଛି l ନଳିନୀକାନ୍ତ ଏଭଳି ବହୁ ସ୍ଥାନରେ ଠକେଇ କରିଥିବା ଥାନା ଅଧିକାରୀ ସବ୍ୟସାଚୀ ମଲ୍ଲ କହିଛନ୍ତି ।
