ମୁମ୍ବାଇ: ଷ୍ଟାର କିଡ୍ସଙ୍କ ମଧ୍ୟରେ କରୀନା କପୁର ଖାଁ ଓ ସୈଫ ଅଲୀ ଖାଁଙ୍କ ପୁଅ ତୈମୁର ଅଲୀ ଖାଁ ସବୁବେଳେ ଚର୍ଚ୍ଚାରେ ରହିଥାନ୍ତି। କେତେବେଳେ ଫଟୋ ଓ ଭିଡିଓକୁ ନେଇ ତ କେତେବେଳେ ନିଜ କାର୍ଯ୍ୟକଳାପକୁ ନେଇ। ସେହିପରି ସୋହା ଅଲୀ ଖାଁଙ୍କ ଝିଅ ଇନାୟା ମଧ୍ୟ ଇଣ୍ଟରନେଟ ବେଶ୍ ସକ୍ରିୟ ରହିଥାନ୍ତି। ଏହି ୨ ଷ୍ଟାରକିଡ୍ସଙ୍କୁ ପ୍ରଶଂସକ ବେଶ୍ ପସନ୍ଦ ମଧ୍ୟ କରନ୍ତି। ତେବେ ଷ୍ଟାର କିଡ୍ ଭାବେ ତୈମୁର ଏତେ ପପୁଲାର ଯେ, ସବୁ କିଡ୍ସମାନେ ତାଙ୍କୁ ଅନୁକରଣ କରିବାକୁ ଚାହିଁଥାନ୍ତି। ଜାଣିଛନ୍ତି କି, ସୋହାଙ୍କ ଝିଅ ଇନାୟା ମଧ୍ୟ ତୈମୁରଙ୍କୁ ଫଲୋ କରନ୍ତି। ଇନାୟା ଓ ତୈମୁର ସମ୍ପର୍କରେ ଭାଇ ଭଉଣୀ ଥିବା ବେଳେ ଦୁହିଁଙ୍କ ମଧ୍ୟରେ ବୟସର ତାରତମ୍ୟ ମାତ୍ର ୯ମାସ। ତେଣୁ ପ୍ରାୟ ସମୟରେ ୨ଜଣ ଏକାଠି ସମୟ ବିତାଇଥାନ୍ତି। ଦୁହିଁଙ୍କୁ ଦେଖିଲେ ସେମାନଙ୍କ ଭିତରେ ଥିବା ବଣ୍ଡିଂ ସ୍ପଷ୍ଟ ବାରି ହୋଇପଡ଼େ। କିନ୍ତୁ ଇନାୟା ସବୁବେଳେ ତୈମୁରଙ୍କୁ କପି କରିଥାନ୍ତି। ଏହି କଥା ଆମେ କହୁନାହୁଁ ବରଂ ଇନାୟାଙ୍କ ମା’ ସୋହା କହିଛନ୍ତି।
ନିକଟରେ ସୋହା ଏକ ଫଟୋ ଶେୟାର କରିଥିଲେ। ଯେଉଁଥିରେ ଇନାୟା ଓ ତୈମୁର ଦୁହେଁ ବେଟମ୍ୟାନର କଷ୍ଟ୍ୟୁମ୍ ପିନ୍ଧିଥିବା ଦେଖିବାକୁ ମିଳିଛି। ଦୁହିଁଙ୍କୁ ମଧ୍ୟରୁ କେହି ରୋବିନ ହେବାକୁ ଚାହୁଁ ନ ଥିଲେ ବୋଲି ସୋହା କହିଛନ୍ତି। ଇନାୟା ତୈମୁରଙ୍କ ପ୍ରତି କଥାକୁ ବେଶ୍ ଧ୍ୟାନ ସହକାରେ ଶୁଣନ୍ତି ଏବଂ ତାଙ୍କର ପ୍ରତିଟି କାର୍ଯ୍ୟକଳାପକୁ ଫଲୋ କରିବାକୁ ଚେଷ୍ଟା କରିଥାନ୍ତି। କେବଳ ସେତିକି ନୁହେଁ ସେ ତୈମୁରଠାରୁ ଅଧିକ ଚାଲକ୍ ହେବାକୁ ଚାହାନ୍ତି ବୋଲି ମା’ ସୋହା ଅଲୀ ଖାଁ କହିଛନ୍ତି। କୁହାଯାଏ ଘରେ ବଡ଼ ଭାଇ କିମ୍ବା ଭଉଣୀ ଥିଲେ ତାଙ୍କଠାରୁ ସାନ ଭାଇ ଓ ଭଉଣୀମାନେ ଖୁବ୍ଶୀଘ୍ର ସବୁ ଜିନିଷ୍ ଶିଖିବାକୁ ଚେଷ୍ଟା କରିଥାନ୍ତି।
