ବ୍ରଜରାଜନଗର,୨୦ା୫(ଡି.ଏନ୍.ଏ.): ବ୍ରଜରାଜନଗର ଉପନିର୍ବାଚନରେ ତ୍ରିମୁଖୀ ନୁହେଁ, ଚତୁର୍ମୁଖୀ ପ୍ରତିଦ୍ୱନ୍ଦ୍ୱିତା ହେବ ବୋଲି କହିଛନ୍ତି ସିପିଆଇ ପ୍ରାର୍ଥୀ ରମେଶ ତ୍ରିପାଠୀ। ଏକ ଖବରଦାତା ସମ୍ମିଳନୀରେ ସେ ଏହି ଘୋଷଣା କରିଛନ୍ତି। ସିପିଆଇର ରାଜ୍ୟ ନେତୃତ୍ୱ ତାଙ୍କ ଉପରେ ଭରସା କରି ଟିକେଟ ଦେଇଛନ୍ତି। ଏହାକୁ ସେ ସାକାର କରି ଦେଖାଇବେ।
ସେ ଆହୁରି କହିଛନ୍ତି, ଏହି ସ୍ଥାନ ହେଉଛି ସ୍ବର୍ଗତ ପ୍ରସନ୍ନ ପଣ୍ଡାଙ୍କ ମାଟି। ଏ ମାଟିର ସନ୍ତାନମାନେ ସର୍ବଦା ଅଣସରକାରରେ ଲଢ଼େଇ କରି ନିଜ ଅଧିକାର ସାବ୍ୟସ୍ତ କରିଆସିଛନ୍ତି। ଏଠାରୁ ସ୍ବର୍ଗତ ପଣ୍ଡା ୬ଥର ବିଧାୟକ ଭାବେ ନିିର୍ବାଚିତ ହୋଇ ଓଡ଼ିଶା ବିଧାନସଭାରେ ବ୍ରଜରାଜନଗରକୁ ଚର୍ଚ୍ଚାରେ ରଖିଆସୁଥିଲେ। ୧୯୯୭ରେ ତାଙ୍କ ଦେହାନ୍ତ ପରେ ଆଜିପର୍ଯ୍ୟନ୍ତ ଯେତେ ନେତା ବିଧାନସଭା ଯାଇଛନ୍ତି, ସେମାନେ କେବଳ ନିଜ ସମସ୍ୟା ବିଷୟରେ ଚିନ୍ତା କରିଛନ୍ତି। ଏଠାରେ କଳକାରଖାନା ଥାଇ ମଧ୍ୟ ସ୍ଥାନୀୟ ନିଯୁକ୍ତି ନାହିଁ। ବନ୍ଦ ପଡ଼ିଥିବା ପେପର ମିଲ୍ ଖୋଲିବା ଦିଗରେ କୌଣସି ରାଜନୈତିକ ଦଳ ଆନ୍ତରିକତା ଦେଖାଇନାହାନ୍ତି। ବାସଚ୍ୟୁତଙ୍କୁ ଥଇଥାନ କରିବା ହେଉ କି ଠିକା ଶ୍ରମିକଙ୍କୁ ସ୍ଥାୟୀ ନିଯୁକ୍ତି ଦିଗରେ ସ୍ଥାନୀୟ ନେତା ବା ଅନ୍ୟ ଦଳର ସରକାର ପଦକ୍ଷେପ ନେଇନାହାନ୍ତି। ଆଗାମୀ ଦିନରେ ଏହି ଦିଗରେ ଆନ୍ଦୋଳନ ଜାରି ରହିବ। ତାଙ୍କ ଦଳ ପ୍ରତି ବିପୁଳ ଜନସମର୍ଥନ ରହିଛି। ତେଣୁ ଚଳିତ ଉପନିର୍ବାଚନରେ ଚତୁର୍ମୁଖୀ ଲଢ଼େଇ ହେବ ବୋଲି ପ୍ରାର୍ଥୀ ତ୍ରିପାଠୀ ପ୍ରକାଶ କରିଥିଲେ। ଖବରଦାତା ସମ୍ମିଳନୀରେ ଦଳର ଅନିତ ଚକ୍ରବର୍ତ୍ତୀ, ଅଭୟ ସାହୁ, ଅଶୋକ ଦାସ ପ୍ରମୁଖ ରାଜ୍ୟ ନେତୃତ୍ୱ ମଞ୍ଚାସୀନ ଥିଲେ।
