ନୂଆଦିଲ୍ଲୀ,୧୦।୮: ଟୋକିଓ ଅଲିମ୍ପିକ୍ସ ୨୦୨୦ରେ ଭାରତର ବୃହତ ସଫଳତା ପରେ, ବର୍ତ୍ତମାନ ସମସ୍ତଙ୍କ ଆଖି ଆଗାମୀ ଅଲିମ୍ପିକ୍ସ ଉପରେ କେନ୍ଦ୍ରୀତ ହୋଇଛି। ଏହି ସମୟରେ କ୍ରିକେଟ ପ୍ରଶଂସକଙ୍କ ପାଇଁ ଏକ ବଡ ଖୁସି ଖବର ଆସିଛି। ୨୦୨୮ ମସିହାରେ ଅନୁଷ୍ଠିତ ହେବାକୁ ଥିବା ଲସ ଆଞ୍ଜେଲସ ଅଲିମ୍ପିକ୍ସରେ କ୍ରିକେଟ ଅନ୍ତର୍ଭୁକ୍ତ କରିବାର ପ୍ରୟାସ ଅଛି ବୋଲି ଆନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ନିଶ୍ଚିତ କରିଛି। ଆଇସିସି ଦ୍ୱାରା ଜାରି ଏକ ବିବୃତ୍ତିରେ କୁହାଯାଇଛି ଯେ ଏନେଇ ଏକ ୱାର୍କିଂ ଗ୍ରୁପ ଗଠନ କରାଯାଇଛି, ଯାହା ଅଲିମ୍ପିକ ଗେମ୍ସରେ କ୍ରିକେଟ ଅନ୍ତର୍ଭୁକ୍ତ କରିବାର ପ୍ରକ୍ରିୟା ପାଇଁ କାର୍ଯ୍ୟ ରହିବ। ଅଲିମ୍ପିକ୍ସ ୨୦୨୮, ୨୦୩୨ ଏବଂ ଆଗାମୀ ଅଲିମ୍ପିକ୍ସରେ କ୍ରିକେଟ ଅନ୍ତର୍ଭୁକ୍ତ କରିବାକୁ ଚେଷ୍ଟା କରାଯିବ ବୋଲି ଆଇସିସି କହିଛି।
ଅଲିମ୍ପିକ୍ସରେ କ୍ରିକେଟ ଅନ୍ତର୍ଭୁକ୍ତ କରିବାର ଯୋଜନା ଦୀର୍ଘ ଦିନ ଧରି ଜାରି ରହିଛି। ଭାରତ ପକ୍ଷରୁ ବିସିସିଆଇ ଏହା ମଧ୍ୟ କହିଛି ଯେ ଯଦି ଏଭଳି ଘଟେ ତେବେ ଭାରତ ନିଶ୍ଚିତ ଭାବେ ଏଥିରେ ଅଂଶଗ୍ରହଣ କରିବ। ବର୍ତ୍ତମାନ ଟୋକିଓ ଅଲିମ୍ପିକ୍ସ ୨୦୨୦ ଶେଷ ହେବା ପରେ ପ୍ୟାରିସ ଅଲିମ୍ପିକ୍ସ ପାଇଁ ପ୍ରସ୍ତୁତି ଆରମ୍ଭ ହୋଇସାରିଛି। ଆମେ ଭବିଷ୍ୟତ ପ୍ରତି ଦୃଷ୍ଟି ଦେଉଥିବା ବିସିସିଆଇ କହିଛି।
ଆଇସିସି କହିଛି ଯେ ଆମେରିକାରେ ପ୍ରାୟ ୩୦ ନିୟୁତ କ୍ରିକେଟ ପ୍ରଶଂସକ ରହିଛନ୍ତି। ତେଣୁ ଆମେ ୨୦୨୮ରେ ଅନୁଷ୍ଠିତ ହେବାକୁ ଥିବା ଅଲିମ୍ପିକ୍ସରେ କ୍ରିକେଟ ଅନ୍ତର୍ଭୁକ୍ତ କରିବାକୁ ଚେଷ୍ଟା କରୁଛୁ। ଯଦି କ୍ରିକେଟ ଅଲିମ୍ପିକ୍ସରେ ଅନ୍ତର୍ଭୁକ୍ତ ହୁଏ, ତେବେ ଏହା ଅତ୍ୟନ୍ତ ଲାଭଦାୟକ ପ୍ରମାଣିତ ହେବ। ବର୍ତ୍ତମାନ ସୁଦ୍ଧା କ୍ରିକେଟ କେବଳ ଥରେ ଅଲିମ୍ପିକ୍ସରେ ଅନ୍ତର୍ଭୁକ୍ତ ହୋଇଥିଲା, ଏଥିରେ ମଧ୍ୟ ଦୁଇଟି ଟିମ୍ ଅଂଶଗ୍ରହଣ କରିଥିଲେ। ସମ୍ପ୍ରତି ଯେତେବେଳେ ଭାରତୀୟ ମହାଦେଶ ସମେତ ବିଶ୍ୱର ବହୁ ଦେଶରେ କ୍ରିକେଟ ବହୁତ ଲୋକପ୍ରିୟ ହୋଇପାରିଛି, ସେତେବେଳେ ଏହାକୁ ଅଲିମ୍ପିକ୍ସରେ ଅନ୍ତର୍ଭୁକ୍ତ କରିବାକୁ ଉଦ୍ୟମ ଚାଲିଛି।
