ଅସ୍ତରଙ୍ଗ,୧୭।୩(ଡି.ଏନ୍.ଏ.): ପୁରୀ ଜିଲା ଅସ୍ତରଙ୍ଗ ନୂଆଗଡରେ ପୁଣି ଏକ ମାଛଧରା ବନ୍ଦର ରାଜ୍ୟ ଓ କେନ୍ଦ୍ର ସରକାରଙ୍କର ମିଳିତ ସହାୟତାରେ ପ୍ରତିଷ୍ଠା ହେବାକୁ ଯାଉଛି। ଏହି ଅବସରରେ ଅସ୍ତରଙ୍ଗ ଅଞ୍ଚଳରେ ଏକ ବୈଠକ ଆୟୋଜିତ ହୋଇଥିଲା। ଏଥିରେ ଜିଲାର ବହୁ ପ୍ରଶାସନିକ ଅଧିକାରୀ ଯୋଗଦେଇଥିଲେ। ଏହି ବନ୍ଦରଟି ବଙ୍ଗୋପସାଗରଠାରୁ ୩ କିଲୋମିଟର ଦୂରରେ ଥିବା ଦେବୀନାସୀର ଡାହାଣ ପାର୍ଶ୍ୱରେ ପ୍ରତିଷ୍ଠା କରାଯିବ। ପୂର୍ବରୁ ଅବସ୍ଥିତ ମାଛଧରା ବନ୍ଦରଟି ୧୯୯୯ ମସିହା ମହାବାତ୍ୟାରେ ବହୁ କ୍ଷତିଗ୍ରସ୍ତ ହୋଇଥିଲା। ସେହିଦିନଠାରୁ ବନ୍ଦରର ମରାମତି କଥା ପ୍ରଶାସନ ସମ୍ପୂର୍ଣ୍ଣ ଭାବେ ଭୁଲି ଯାଇଥିଲେ। ବିପଦସଙ୍କୁଳ ଅବସ୍ଥାରେ ବନ୍ଦରଟି ରହିଥିଲେ ମଧ୍ୟ ପ୍ରଶାସନିକ ସ୍ତରରେ ସ୍ଥାଣୁତା କାରଣରୁ ଏବେ ବି ଅର୍ଦ୍ଧ ଭଗ୍ନ ଅବସ୍ଥାରେ ରହିଛି। ସ୍ଥାନୀୟ ଜନସାଧାରଣ ଅଭିଯୋଗ କରୁଥିଲେ ମଧ୍ୟ କେହି କର୍ଣ୍ଣାପାତ କରୁ ନାହାନ୍ତି।
ନିର୍ବାଚନ ସମୟ ଆସିବାରୁ ଜିଲା ପ୍ରଶାସନର ଏବେ ଚେତା ପଶିଛି। ଉଭୟ ରାଜ୍ୟ ଓ କେନ୍ଦ୍ର ସରକାର ନୂତନ ବନ୍ଦର ପ୍ରତିଷ୍ଠା କରିବାକୁ ନିଷ୍ପତ୍ତି ନେଇ ଅସ୍ତରଙ୍ଗରେ ମଧ୍ୟ ଏକ ବନ୍ଦର କରିବାକୁ କହିଛନ୍ତି। ଏଥିପାଇଁ ବେଙ୍ଗାଲୁରୁର ଏକ ଅନୁଷ୍ଠାନ ସି ଆଇସିଇଏଫ ଦ୍ବାରା ସର୍ଭେ କରାଯାଇ ୮୨,୮୬ କୋଟିର ବ୍ୟୟ ଅଟକଳ କରାଯାଇଅଛି। ବନ୍ଦର ପାଇଁ ଜାଗା ରହିଥିବା ବେଳେ, ବରଫ କଳ, ମତ୍ସ୍ୟ ଅବତରଣ କେନ୍ଦ୍ର, ଡଙ୍ଗା ମରାମତି ଜାଗା, ଡଙ୍ଗା ରହିବା ଜାଗା, ସୁରକ୍ଷା କର୍ମୀ ଗୃହ, ପ୍ରଶାସନିକ ଗୃହ, ଜାଲ ମରାମତି ଗୃହ, ମୁହାଣ ଖନନ, ପାନୀୟ ଜଳ, ରାସ୍ତା, ପାଚେରି ଭଳି ବହୁ ଜିନିଷ ପ୍ରତିଷ୍ଠା ହେବାର ଯୋଜନା ରହିଛି। ଏହି ପ୍ରକଳ୍ପଟି, ସି ସାର୍ ଜେଡ,୧ ବିସି ଆର୍, ଜେଡ ୩ ଓ ସିଆର, ଜେଡ ୪ ଭିତରେ ରହୁଥିବା ବେଳେ,୧୯୬୦ ଯାନ୍ତ୍ରିକ ଡଙ୍ଗା ଚଳପ୍ରଚଳ ହେବାର ସୁବିଧା ରହିଛି। ବନ୍ଦରର ନୂତନ ନିର୍ମାଣ ନେଇ ଏକ ଜନଶୁଣାଣି ଶିବିର ମେରାଇନ ଥାନା ପରିସରରେ ଅନୁଷ୍ଠିତ ହୋଇଥିଲା। ଏଥିରେ ପୁରୀ ଉପଜିଲାପାଳ ଭବତରଣ ସାହୁ, ଅସ୍ତରଙ୍ଗ ତହସିଲଦାର ରାଜଲକ୍ଷ୍ମୀ ନାୟକ, ଜିଲା ଜଳ ମତ୍ସ୍ୟ ଅଧିକାରୀ ସୁଧାଂଶୁ ମଲ୍ଲିକ, ରାଜ୍ୟ ପ୍ରଦୂଷଣ ନିୟନ୍ତ୍ରଣ ସଂସ୍ଥା ଆଞ୍ଚଳିକ ଅଧିକାରୀ, ସ୍ଥାନୀୟ ମତ୍ସ୍ୟଜୀବୀ, ସ୍ଥାନୀୟ ସରପଞ୍ଚ, ସମିତି ସଭ୍ୟ ପ୍ରମୁଖ ଯୋଗଦେଇ ଜନ ଶୁଣାଣିର ଆଲୋଚନାରେ ଭାଗ ନେଇଥିଲେ। ଏହି ଅତ୍ୟାଧୁନିକ ମାଛଧରା ବନ୍ଦର ୩ବର୍ଷ ଭିତରେ କାର୍ଯ୍ୟକ୍ଷମ ହେବ ବୋଲି ଉପସ୍ଥିତ ଅଧିକାରୀମାନେ ପ୍ରକାଶ କରିଛନ୍ତି। କିନ୍ତୁ ଏହି ଜନଶୁଣାଣି ଶିବିର ବିଷୟରେ ଗଣମାଧ୍ୟମ ପ୍ରତିନିଧିଙ୍କୁ ଉପେକ୍ଷା କରାଯାଇଥିଲା। ଏଭଳି ଘଟଣା ସମସ୍ତ ଗଣମାଧ୍ୟମ ପ୍ରତିନିଧିଙ୍କୁ ମର୍ମାହତ କରିଥିବା ସଂଘ ସଭାପତି ପ୍ରଶାନ୍ତ କୁମାର ବାରିକ ଅଭିଯୋଗ କରିଛନ୍ତି।
