ଢେଙ୍କାନାଳ ଅଫିସ୍, ୫।୬: ବନ୍ୟା, ବାତ୍ୟା ଭଳି ପ୍ରାକୃତିକ ବିପର୍ଯ୍ୟୟ ସମୟରେ ଉଦ୍ଧାର କାର୍ଯ୍ୟ ତ୍ୱରାନ୍ବିତ କରିବା, ଭିଭିଆଇପିଙ୍କ ଗସ୍ତ ସୁଗମ ଲାଗି ଢେଙ୍କାନାଳରେ ନିର୍ମିତ ହେବ ହେଲିପ୍ୟାଡ୍। ଏଥିଲାଗି ସହର ଉପକଣ୍ଠ ମହିଷାପାଟରେ ୨ଟି ସରକାରୀ ଜମି ଚିହ୍ନଟ କରାଯାଇଛି। ଆବଶ୍ୟକ ସମୀକ୍ଷା, ପରୀକ୍ଷାନିରୀକ୍ଷା ପରେ ସେଥିରୁ ଗୋଟିଏରେ ହେଲିପ୍ୟାଡ୍ ନିର୍ମାଣ କରାଯିବ। ସେହିପରି କଙ୍କଡ଼ାହାଡ଼ ବ୍ଲକ ବୀରାଶାଳରେ ଥିବା ରାଜ୍ୟର ଅନ୍ୟତମ ପୁରାତନ ଏୟାରଷ୍ଟ୍ରିପ୍କୁ ଜରୁରୀ ସମୟରେ ବ୍ୟବହାର କରିବା ଲାଗି ଉନ୍ନତୀକରଣ କରାଯିବ। ଏଥିଲାଗି ପ୍ରସ୍ତୁତ ହୋଇଛି ନୀଳନକ୍ସା।
ଶିଳ୍ପ ଜିଲା ଢେଙ୍କାନାଳରେ ଏକାଧିକ ଜାତୀୟସ୍ତରୀୟ ଅନୁଷ୍ଠାନ ରହିଛି। ବିଭିନ୍ନ ସମୟରେ ବହୁ ପଦସ୍ଥ ଅଧିକାରୀ ଆସୁଛନ୍ତି। ଆପତକାଳୀନ ସମୟରେ ଉଦ୍ଧାର କାର୍ଯ୍ୟ ତ୍ୱରାନ୍ବିତ ହେଉ କି ଗୁରୁତରଙ୍କୁ ଏୟାରଲିଫ୍ଟ କରିବା, ଏସବୁ କ୍ଷେତ୍ରରେ ଏକ ହେଲିପ୍ୟାଡର ଆବଶ୍ୟକତା ଦୀର୍ଘଦିନ ହେଲା ଅନୁଭୂତ ହେଉଥିଲା। ବିଳମ୍ବରେ ହେଉପଛେ, ଏଥିପ୍ରତି ବେସାମରିକ ବିମାନ ଚଳାଚଳ ମନ୍ତ୍ରଣାଳୟର ଶୁଭଦୃଷ୍ଟି ପଡ଼ିଛି। ନିକଟରେ ମନ୍ତ୍ରଣାଳୟର ଯୁଗ୍ମ ସଚିବ ଉଷା ପାଢ଼ୀ ଏ ନେଇ ଭିଡିଓ କନ୍ଫରେନ୍ସରେ ଜିଲାପାଳ ସରୋଜ କୁମାର ସେଠୀଙ୍କ ସହିତ ଆଲୋଚନା କରିଥିଲେ। ଏହାପରେ ଜିଲା ପ୍ରଶାସନ ପକ୍ଷରୁ ସହର ଉପକଣ୍ଠ ମହିଷାପାଟ ରେଙ୍ଗାଲି କଲୋନୀ ନିକଟରେ ୨ଟି ଜମି ଚିହ୍ନଟ କରାଯାଇଛି। ତନ୍ମଧ୍ୟରେ ପୂର୍ତ୍ତ ବିଭାଗର ୨ ଏକର ୬୩ ଡେସିମିଲ ଏବଂ ରାଜସ୍ବ ବିଭାଗର ୬ ଏକର ବିଶିଷ୍ଟ ଜମି ରହିଛି। ଏ ସମ୍ପର୍କରେ ବିଧିବଦ୍ଧ ଭାବେ ପ୍ରଶାସନ ପକ୍ଷରୁ ପ୍ରସ୍ତାବ ଦିଆଯିବ। ଏହାପରେ ବିଭାଗୀୟ ବିଶେଷଜ୍ଞମାନେ ଚିହ୍ନଟ ଜାଗା ପରିଦର୍ଶନ କରି ଅନୁଧ୍ୟାନ, ଯାଞ୍ଚ ଏବଂ ପରୀକ୍ଷାନିରୀକ୍ଷା କରିବେ। ଜାଗା ଚୂଡ଼ାନ୍ତ ହେବା ପରେ କୌଣସି ଗୋଟିଏ ସ୍ଥାନରେ ହେଲିପ୍ୟାଡ ନିର୍ମାଣ କରାଯିବ।
ସେହିପରି ୫୩ ଏକର ବିଶିଷ୍ଟ ବୀରାଶାଳ ଏୟାରଷ୍ଟ୍ରିପ୍ ଉନ୍ନତୀକରଣ କାର୍ଯ୍ୟ ଜାରି ରହିଛି। ଏହାକୁ ଆବଶ୍ୟକ ସମୟରେ ଜରୁରୀ କାର୍ଯ୍ୟରେ ବ୍ୟବହାର କରାଯିବା ଲାଗି ବ୍ୟବସ୍ଥିତ କରାଯାଉଛି। ୭ କୋଟି ଟଙ୍କା ବ୍ୟୟରେ ହ୍ୟାଙ୍ଗର (ବିମାନ ରହିବା ଗୃହ) ନିର୍ମାଣ କାର୍ଯ୍ୟ ଚାଲିଛି। ଏୟାରଷ୍ଟ୍ରିପ୍ ତାଲିମକେନ୍ଦ୍ରରେ ୫୦ଜଣ ଛାତ୍ରୀଛାତ୍ର ପାଇଲଟ ତାଲିମ ନେଉଛନ୍ତି। ସମ୍ଭାବ୍ୟ ଜରୁରୀ ସ୍ଥିତିକୁ ନଜରରେ ରଖି ବୀରାଶାଳ ସ୍ବାସ୍ଥ୍ୟକେନ୍ଦ୍ରକୁ ଏକ ଆମ୍ବୁଲାନ୍ସ ପ୍ରଦାନ କରାଯାଇଛି।
ଏ ସଂକ୍ରାନ୍ତରେ ଜିଲାପାଳ ସୂଚନା ଦେଇ କହିଛନ୍ତି, ପ୍ରାକୃତିକ ବିପର୍ଯ୍ୟୟ ସମୟରେ ଉଦ୍ଧାର କାର୍ଯ୍ୟ, ଭିଭିଆଇପିଙ୍କ ଗସ୍ତ ସମେତ ଅନ୍ୟାନ୍ୟ ଜରୁରୀ କାର୍ଯ୍ୟ ପାଇଁ ଏକ ହେଲିପ୍ୟାଡ୍ ନିର୍ମାଣ କରାଯିବାକୁ ଯୋଜନା ରହିଛି। ରାଜ୍ୟ ସରକାରଙ୍କ ନିଷ୍ପତ୍ତିକ୍ରମେ ବୀରାଶାଳରେ ଏୟାରଷ୍ଟ୍ରପ୍ର ଉନ୍ନତୀକରଣ କାର୍ଯ୍ୟ ଜାରି ରହିଛି।
