ବ୍ରହ୍ମପୁର,୨୧ା୧୨(ଅଶୋକ କୁମାର ସାହୁ)ଗଞ୍ଜାମ ଜିଲାରେ ପୂର୍ବାପେକ୍ଷା ମାଛ ଉତ୍ପାଦନ ବଢ଼ିଛି। ଆନ୍ଧ୍ରପ୍ରଦେଶରୁ ମାଛ ଆମଦାନୀ କମିବାରେ ଲାଗିଛି। ଜିଲାର ଚାହିଦା ପୂରଣ କରିବାରେ ଗଞ୍ଜାମ ଆଉ କେଇ ପାଦ ପଛରେ ରହିଛି।
ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗର ତଥ୍ୟ ଅନୁସାରେ ଗଞ୍ଜାମ ଜିଲାକୁ ବର୍ଷକୁ ୭୭ ହଜାର ମେଟ୍ରିକ ଟନ ମାଛ ଆବଶ୍ୟକ ପଡୁଛି। କିନ୍ତୁ ୨୦୨୨-୨୩ ଆର୍ଥିକ ବର୍ଷରେ ଉତ୍ପାଦିତ ହୋଇଛି ୭୧୮୦୫ମେଟ୍ରିକ ଟନ। ୨୦୨୧-୨୨ରେ ୭୦୨୩୬ ହଜାର ମେଟ୍ରିକ ଟନ ମାଛ ଉତ୍ପାଦିତ ହୋଇଥିଲା। ତେବେ ବାର୍ଷିକ ୫ ହଜାର ମେଟ୍ରିକ ଟନ ମାଛ ନିଅଣ୍ଟ ପଡୁଥିବା ସରକାରୀ ସୂତ୍ରରୁ ଆକଳନ କରାଯାଇଛି। କିନ୍ତୁ ବେସରକାରୀ ଭାବେ ଏହା ଆହୁରି ଅଧିକ ହେବ ବୋଲି ବ୍ୟବସାୟୀଙ୍କ ମତ। ଏହି ଆବଶ୍ୟକତାକୁ ପୂରଣ କରିବା ପାଇଁ ଆନ୍ଧ୍ର ଉପରେ ନିର୍ଭର କରିବାକୁ ପଡୁଛି। ମାଛର ଚାହିଦା ପୂରଣ କରିବା ପାଇଁ ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗ ପକ୍ଷରୁ ବିଭିନ୍ନ ଯୋଜନା କରାଯାଇଛି। ଏହି ଯୋଜନାରେ ୫ଟି ସ୍କିମରେ ଚାଷୀଙ୍କୁ ବିଭାଗ ପକ୍ଷରୁ ପ୍ରୋତ୍ସାହନ ଦିଆଯାଉଛି। ଜିଲାର ୨୨ ବ୍ଲକରେ ଅନେକ ବ୍ୟକ୍ତିଗତ ପୋଖରୀ ଓ ଗୋଷ୍ଠୀଗତ ପୋଖରୀ ରହିଛି। ଅନେକ ହିତାଧିକାରୀ ମାଛ ଚାଷ କରିଛନ୍ତି। ଆଉ କେତେକ ଗାଁରେ ଗ୍ରାମ୍ୟ ପୋଖରୀଗୁଡିକୁ ନେଇ ବିବାଦ ଦେଖାଦେଉଥିବାରୁ ସେଥିରେ ମାଛ ଚାଷ ହୋଇପାରୁନାହିଁ। ଗ୍ରାମଗୁଡିକରେ ଅନେକ ସ୍ବୟଂ ସହାୟକ ଗୋଷ୍ଠୀ (ଏସଏଚଜି)କୁ ରୋଜଗାର ଦେବା ପାଇଁ ମାଛ ଚାଷରେ ଅନ୍ତର୍ଭୁକ୍ତ କରାଯାଇଛି। ମତ୍ସ୍ୟଚାଷୀମାନଙ୍କୁ ବିଭାଗ ପକ୍ଷରୁ ବିଭିନ୍ନ କର୍ମଶାଳା ମାଧ୍ୟମରେ ସଚେତନ କରାଯାଉଛି। ୨୦୨୨-୨୩ ଆର୍ଥିକ ବର୍ଷରେ ପ୍ରକଳ୍ପ ଖର୍ଚ୍ଚ ଦେଢ଼ ଲକ୍ଷ ଟଙ୍କା ଥିବାବେଳେ ୨୦୨୩-୨୪ ଆର୍ଥିକ ବର୍ଷରେ ମୁଖ୍ୟମନ୍ତ୍ରୀ ମତ୍ସ୍ୟଜୀବୀ କଲ୍ୟାଣ ଯୋଜନା ଅନୁଯାୟୀ ଏହା ୪ ଲକ୍ଷ ଟଙ୍କାକୁ ବୃଦ୍ଧି କରାଯାଇଛି। ଏଥିରେ ୬୦ ପ୍ରତିଶତ ସବସିଡ ବ୍ୟବସ୍ଥା ବି ରହିଛି। ଗତବର୍ଷ ୨୩୫ ଏସଏଚଜିଙ୍କୁ ମାଛ ଚାଷ ପାଇଁ ଚିହ୍ନଟ କରାଯାଇଥିଲା। ସେମାନେ ୪୫୦.୪୨ ହେକ୍ଟର ପୋଖରୀରେ ମାଛ ଚାଷ କରିଥିଲେ। ସେମାନଙ୍କୁ ୪ କୋଟି ୫ ଲକ୍ଷ ଟଙ୍କା ସବସିଡ ମିଳିଛି। ସେହିପରି କୁଣ୍ଡରେ ମାଛ ଚାଷ କରିବା ସ୍କିମରେ ୨୭୦ ଟ୍ୟାଙ୍କ ଟାର୍ଗେଟ ଥିବାବେଳେ ୨୭୮ ଟ୍ୟାଙ୍କରେ ମାଛ ଚାଷ ହୋଇଛି। ଏହାଦ୍ୱାରା ୬୨ ଚାଷୀ ଲାଭାନ୍ବିତ ହୋଇଛନ୍ତି। ଚଳିତବର୍ଷ ଡିସେମ୍ବର ସୁଦ୍ଧା ୨୦୧ ଏସଏଚଜିଙ୍କୁ ଚିହ୍ନଟ କରାଯାଇ କାର୍ଯ୍ୟାଦେଶ ଦିଆଯାଇଛି। ସେହିପରି ଖାରିପାଣି ଚିଙ୍ଗୁଡି ଚାଷ ସ୍କିମରେ କଲଚର ଓ କେପଚର ପଦ୍ଧତିରେ ୬୪୬୪ ମେଟ୍ରିକ ଟନ ଚିଙ୍ଗୁଡି ଉପତ୍ାଦିତ ହୋଇଛି। ଅନ୍ୟ ସ୍କିମରେ ମତ୍ସ୍ୟ ପରିବାରର ୩୫୦ ଛାତ୍ର୍ରୀଛାତ୍ରଙ୍କୁ ମେଧାବୃତ୍ତି ପ୍ରଦାନ କରାଯାଇଛି। ଆଉ ଏକ ସ୍କିମରେ ୩୫୦ ଚାଷୀଙ୍କୁ ୬୯.୧୩ ଲକ୍ଷ ଟଙ୍କାର ଜାଲ ପ୍ରଦାନ କରାଯାଇଛି। ସେହିପରି ମତ୍ସ୍ୟ ପୋଖରୀ ଯୋଜନାରେ ୫୨ ଜଣ ଚାଷୀ ୩୦ ହେକ୍ଟର ପୋଖରୀରେ ମାଛ ଚାଷ କରି ଲାଭାନ୍ବିତ ହୋଇଥିବାବେଳେ ୧୧୪.୨୦ ଲକ୍ଷ ଟଙ୍କା ସବସିଡି ପାଇଛନ୍ତି। ଚଳିତବର୍ଷ ୪୫ ହେକ୍ଟର ପୋଖରୀରେ ମାଛ ଚାଷ କରିବା ଲକ୍ଷ୍ୟଧାର୍ଯ୍ୟ କରାଯାଇଛି। ତେଣୁ ମାଛ ଚାଷର ବିକାଶ ହୋଇଛି ବୋଲି ମୁଖ୍ୟ କାର୍ଯ୍ୟାଳୟର ସହକାରୀ ମତ୍ସ୍ୟ ଅଧିକାରୀ ସନ୍ତୋସ୍ମିତା ପ୍ରଧାନ କହିଛନ୍ତି। ଏ ସଂକ୍ରାନ୍ତରେ ଜିଲା ମତ୍ସ୍ୟ ଅଧିକାରୀ ନିମାଇଁ ଚରଣ ବସ୍ତିଆ କୁହନ୍ତି ଗଞ୍ଜାମରେ ମାଛ ଉତ୍ପାଦନ ବଢ଼ି ଚାଲିଛି। ଲୋକେ ଏବେ ଏହି ଚାଷ କରିବାକୁ ଆଗଭର ହେଲେଣି। ସ୍ବୟଂ ସହାୟକ ଗୋଷ୍ଠୀଗୁଡିକ ବି ଏଥିରେ ସମ୍ପୃକ୍ତ ହେଲେଣି। ଚାହିଦା ତୁଳନାରେ ଯାହା ଅଭାବ ପଡୁଛି ତାହା କିଛି ନୁହଁ। ଆସନ୍ତା ବର୍ଷକୁ ଗଞ୍ଜାମ ଅନ୍ୟ ଜିଲାକୁ ମାଛ ରପ୍ତାନୀ କରିବ ଏଥିରେ ସନ୍ଦେହ ନାହିଁ ବୋଲି କହିଛନ୍ତି।
