ଲୋଇସିଂହା,୯।୭(ସୁଶାନ୍ତ ବାରିକ)ବଲାଙ୍ଗୀର ଜିଲା ଆଗଲପୁର ବ୍ଲକ ସାଲେଭାଟ ଗାଈଖାଇ କ୍ଷୁଦ୍ର ଜଳସେଚନ ପ୍ରକଳ୍ପର ମାଟି ପୁନରୁଦ୍ଧାର ଓ ସରପ୍ଲସ୍ କାମ ପାଇଁ ଟେଣ୍ଡର ହୋଇଥିଲା। ନିର୍ଦ୍ଧାରିତ ସମୟରେ କାମ ନ ସରିବାରୁ ଟେଣ୍ଡର ବାତିଲ ହୋଇଯାଇଛି। ୨ ବର୍ଷ ବିତିଯାଇଥିଲେ ବି ସାନିଟେଣ୍ଡର କରାଯାଇନାହିଁ। ପ୍ରକଳ୍ପରେ ଜଳ ଧାରଣ କ୍ଷମତା ବଢାଇବା ପାଇଁ ହେବାକୁ ଥିବା ସରପ୍ଲସ କାମ ହୋଇପାରିନାହିଁ। ଫଳରେ ବିଗତ ୩ ବର୍ଷ ହେଲା ଖରିଫ ଚାଷର ଶେଷ ମୁହୂର୍ତ୍ତରେ ପାଣି ଅଭାବରୁ ଆଗଲପୁର ବ୍ଲକର ୭ ପଞ୍ଚାୟତ ଓ ସୋନପୁର ବ୍ଲକର କେତେକ ପଞ୍ଚାୟତର ଚାଷୀ କ୍ଷତି ସହି ଆସୁଥିବା ଅଭିଯୋଗ ହୋଇଛି।
ସୂଚନା ଅନୁଯାୟୀ, ୧୯୭୬ ମସିହାରେ ଗାଈଖାଇ ଜଳସେଚନ ପ୍ରକଳ୍ପ କାମ ହୋଇଥିଲା। ଉକ୍ତ ପ୍ରକଳ୍ପରୁ ଅଙ୍ଗ କେନାଲ ମାଧ୍ୟମରେ ଆଗଲପୁର ବ୍ଲକ ଲୁହୁରାମୁଣ୍ଡା, ସାଲେଭଟା, ମୁରୁସୁଣ୍ଡି, କୁଟାସିଂହା, ବକଟି ପଟୁଆପାଲି ପଞ୍ଚାୟତ ଏବଂ ସୁବର୍ଣ୍ଣପୁର ଜିଲାର ୧୨ହଜାର ହେକ୍ଟର ଜମିକୁ ଜଳସେଚନ ହେଉଛି। ରକ୍ଷଣାବେକ୍ଷଣ ଅଭାବରୁ ପ୍ରକଳ୍ପରେ ପଟୁମାଟି ଜମାହୋଇ ଜଳ ଧାରଣ କ୍ଷମତା କମି ଯାଇଥିଲା। ଦୁଇବର୍ଷ ପୂର୍ବେ ପ୍ରକଳ୍ପର ମାଟି ପୁନରୁଦ୍ଧାର ପାଇଁ ୪ କୋଟି ୩୯ ଲକ୍ଷ ଟଙ୍କା ଅନୁଦାନ ଆସିଥିଲା। ହେଲେ ସେତେବେଳେ ଅନୁଦାନ ମୁତାବକ ସନ୍ତୋଷଜନକ କାମ ହୋଇ ନ ଥିଲା। ନିର୍ଦ୍ଧାରିତ ସମୟରେ କାମ ନ ସରିବାରୁ ଅନୁଦାନ ଆମତ୍ସାତ ହୋଇଥିବା ନେଇ ଆଲୋଚନା ହେଉଛି। ପରବର୍ତ୍ତି ସମୟରେ ପୁଣି ୧କୋଟି ୨୦ ଲକ୍ଷ ଅନୁଦାନ ମିଳିଥିଲା। ଉକ୍ତ ଅନୁଦାନରେ ମାଟି ପୁନରୁଦ୍ଧାର ଓ ସରପ୍ଲସ୍ କାମ ରହିଥିଲା। ସେତେବେଳେ ସରପ୍ଲସ କାମ ହୋଇପାରି ନ ଥିଲା ା ୧୫ ଜୁନ ୨୦୨୧ ନିର୍ଦ୍ଧାରିତ ସମୟସୀମା ମଧ୍ୟରେ କାମ ନ ହେବାରୁ ଟେଣ୍ଡର ବାତିଲ ହୋଇଯାଇଥିଲା। ଏହାପରଠାରୁ ସାନିଟେଣ୍ଡର ହୋଇପାରିନାହିଁ। ତେଣୁ ସରପ୍ଲସ ଉଚ୍ଚତା ବଢାଯାଇ ନ ଥିବାରୁ ବର୍ଷା ଦିନରେ ପ୍ରକଳ୍ପରେ ପାଣି ସଂରକ୍ଷଣ ହୋଇ ନ ରହି ଅଯଥାରେ ବୋହି ଯାଉଛି। ଫଳରେ ଖରିଫ ଚାଷ ବେଳେ ଶେଷ ପର୍ଯ୍ୟାୟରେ ପାଣି ନିଅଣ୍ଟିଆ ପଡୁଥିବାରୁ ଆଗଲପୁର ବ୍ଲକର ୭ ପଞ୍ଚାୟତ ୧୨ ହଜାର ହେକ୍ଟର ଓ ସୁବର୍ଣ୍ଣପୁର ଜିଲାର ୧୨ ହଜାର ହେକ୍ଟର ଖରିଫ ଚାଷ ପ୍ରଭାବିତ ହେଉଛି। ପ୍ରକଳ୍ପରେ ଆହୁରୀ ୪ ଫୁଟ ପାଣି କ୍ଷମତା ବଢାଇବା ପାଇଁ ସରପ୍ଲସ ନିର୍ମାଣ ପାଇଁ ସାନି ଟେଣ୍ଡର କରିବାକୁ ଚାଷୀନେତା ଦିଲୀପ ବାରିକ ଦାବି କରିଛନ୍ତି। ଏହା ହେଲେ ଖରିଫରେ ଆଉ ପାଣି ନିଅଣ୍ଟିଆ ପଡିବ ନାହିଁ। ଲୁହୁରାମୁଣ୍ଡା ଏବଂ ସାଲେଭଟା ପଞ୍ଚାୟତରେ ରବିରେ ଧାନଚାଷ ହୋଇପାରିବ ବୋଲି ସେ କହିଛନ୍ତି। ଏଦିଗରେ ଯୁଦ୍ର ଜଳସେଚନ ବିଭାଗ ଓ ରାଜ୍ୟ ସରକାର ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
