ଓଡ଼ିଶାରେ ନାହିଁ ଜମତାରା ଗ୍ୟାଙ୍ଗର ଲିଙ୍କ୍‌
9:30 amDecember 16, 2020December 16, 2020 / 43

ଭୁବନେଶ୍ୱର,୧୬।୧୨(ବ୍ୟୁରୋ): ଡିଜିଟାଲ୍‌ ଯୁଗରେ ଡିଜିଟାଲ୍‌ ଲୁଟ୍‌ ସମଗ୍ର ବିଶ୍ୱ ପାଇଁ ଏକ ସମସ୍ୟା ଭାବେ ଉଭା ହୋଇଛି। ସାମାନ୍ୟ ସତର୍କ ନ ରହିଲେ ଠକେଇର ଶିକାର ହେବାକୁ ପଡିବ। ଜନସାଧାରଣଙ୍କୁ ଆହୁରି ଚାଲାକ ଓ ସେଚେତନ ହେବାକୁ ପଡିବ। ସାଧାରଣତଃ ଅସଚେତନ ଲୋକମାନେ ଯେ କୌଣସି କଲ୍‌ ଆସିଲେ କଥା ହୋଇ ସବିଶେଷ ତଥ୍ୟ ପ୍ରଦାନ କରିଥାନ୍ତି। ହେଲେ ଏହାଦ୍ୱାରା ସେମାନଙ୍କୁ ଠକାମିର ଶିକାର ହେବାକୁ ପଡିଥାଏ। ତେଣୁ ସାବଧାନ! ସତର୍କ ନ ରହିଲେ ଗୋଟିଏ ସେକେଣ୍ଡରେ ଉଡ଼ିଯିବ ନିଜସ୍ବ ଝାଳବୁହା ଧନ। ସାଇବର ଠକେଇ କରୁଥିବା ଜମତାରା ଗ୍ୟାଙ୍ଗକୁ ନେଇ ଆଲର୍ଟରେ ରହିଛି ଓଡ଼ିଶା ପୋଲିସ। ଯଦିଓ ଓଡ଼ିଶାରେ ଜମତାରା ଗ୍ୟାଙ୍ଗର ଲିଙ୍କ୍‌ ନାହିଁ, ତଥାପି ଆମକୁ ସତର୍କ ରହିବାକୁ ପଡ଼ିବ। ସାଇବର ଠକେଇରୁ ନିଜକୁ ବଞ୍ଚାଇବା ପାଇଁ ସବୁବେଳେ ସତର୍କ ରହିବାକୁ ପଡ଼ିବ ବୋଲି ପୋଲିସ କମିଶନର ଡ. ସୁଧାଂଶୁ ଷଡ଼ଙ୍ଗୀ କହିଛନ୍ତି।
ମଙ୍ଗଳବାର ପୋଲିସ ଭବନରେ ଆୟୋଜିତ ଖବରଦାତା ସମ୍ମିଳନୀରେ କମିଶନର ଡ. ଷଡ଼ଙ୍ଗୀ କହିଲେ, ଚଳିତ ବର୍ଷ ରାଜ୍ୟରେ ୧୦୦ରୁ ଊର୍ଦ୍ଧ୍ୱ ସାଇବର ଠକେଇ ମାମଲା ହେଲାଣି। ଫୋନ୍‌ ପେ କଥା କହି ମଧ୍ୟ ଆକାଉଣ୍ଟରୁ ଟଙ୍କା ଲୁଟି ନେଉଛନ୍ତି ସାଇବର ଠକ। ତେବେ ଭାରତରେ ୮୦ପ୍ରତିଶତ ଠକେଇ ଜମତାରା ଗ୍ୟାଙ୍ଗ କରୁଛି। ସବୁ ରାଜ୍ୟର ପୋଲିସ ଏବେ ସେମାନଙ୍କୁ ଖୋଜୁଛନ୍ତି। କିନ୍ତୁ ସେମାନେ ନୂଆ ନୂଆ ଉପାୟ ଅବଲମ୍ବନକରି ଠକିବାରେ ସଫଳ ହେଉଛନ୍ତି। ବରିଷ୍ଠ ନାଗରିକମାନେ ଏଥିପ୍ରତି ବିଶେଷ ଭାବରେ ଧ୍ୟାନ ଦିଅନ୍ତୁ। ବ୍ୟାଙ୍କଗୁଡ଼ିକ ମଧ୍ୟ ଏନେଇ ପଦକ୍ଷେପ ନେଲେଣି। ତେଣୁ ଏବେ ଜମତାରା ଗ୍ୟାଙ୍ଗ ଶହେଥର ଚେଷ୍ଟା କଲା ପରେ ଥରେ ସଫଳ ହେଉଛି ବୋଲି ଷଡଙ୍ଗୀ ସୂଚନା ଦେଇଛନ୍ତି।
ଗ୍ୟାଙ୍ଗ୍‌ ସମ୍ପର୍କରେ…
ଝାଡ଼ଖଣ୍ଡର ଜମତାରା ଗ୍ୟାଙ୍ଗ୍‌ର ସଦସ୍ୟମାନେ ନିଜକୁ ଏସ୍‌ବିଆଇ ତଥା ବିଭିନ୍ନ ବ୍ୟାଙ୍କର କର୍ମଚାରୀ ଓ ଅଧିକାରୀ ବୋଲି ପରିଚୟ ଦେଇ ଗ୍ରାହକଙ୍କୁ ପ୍ରଥମେ ଆକାଉଣ୍ଟ ବନ୍ଦ ହେବାର ଭୟ ଦେଖାଇଥାନ୍ତି। ସମସ୍ୟା ସମାଧାନ କଥା କହି କୌଶଳକ୍ରମେ ଏଟିଏମ୍‌ର ୧୬ଟିକିଆ ନମ୍ବର ମାଗିନେଇଥାନ୍ତି। ଏଟିଏମ୍‌ କାର୍ଡରେ ଲେଖାଥିବା ନମ୍ବର ନ ଦେଲେ ଉଭୟ କାର୍ଡ ଓ ଆକାଉଣ୍ଟକୁ ବନ୍ଦ କରି ଦିଆଯିବାର ଧମକ ଦେଇଥାନ୍ତି। ଠକମାନେ ଲୁଟିବା ଯୋଜନା କରୁଥିବାର ଏକ ଭିଡିଓ ଜାରି କରି ଲୋକଙ୍କୁ ସତର୍କ କରାଉଛି ପୋଲିସ। ଏଭଳି ଫୋନ୍‌ କଲ୍‌ଠାରୁ ଦୂରେଇ ରହିବାକୁ ପରମର୍ଶ ଦେଇଛନ୍ତି ପୋଲିସ କମିଶନର ଡ. ସୁଧାଂଶୁ ଷଡ଼ଙ୍ଗୀ।