ନୂଆଦିଲ୍ଲୀ,୨୪ା୮(ପି.ଟି.): ଉତ୍ତର-ପୂର୍ବ କିମ୍ବା ଅନ୍ୟ କୌଣସି ଅଞ୍ଚଳକୁ ମିଳିଥିବା ସମ୍ବିଧାନର ସ୍ବତନ୍ତ୍ର ବ୍ୟବସ୍ଥା ଉପରେ ହସ୍ତକ୍ଷେପ କରିବାର କୌଣସି ଉଦ୍ଦେଶ୍ୟ କେନ୍ଦ୍ର ସରକାରଙ୍କର ନାହିଁ। ସରକାରଙ୍କ ତରଫରୁ ସଲିସିଟର ଜେନେରାଲ ତୁଷାର ମେହେଟ୍ଟା ବୁଧବାର ସୁପ୍ରିମକୋର୍ଟଙ୍କୁ ଏହା ଜଣାଇଛନ୍ତି। ଜମ୍ମୁ-କଶ୍ମୀରରୁ ସମ୍ବିଧାନର ଅନୁଚ୍ଛେଦ ୩୭୦କୁ କେନ୍ଦ୍ର ସରକାର ଯେଉଁଭଳି ଭାବରେ ଉଚ୍ଛେଦ କଲେ, ସେହିପରି ଉତ୍ତର-ପୂର୍ବାଞ୍ଚଳ ରାଜ୍ୟଗୁଡ଼ିକରୁ ସ୍ବତନ୍ତ୍ର ବ୍ୟବସ୍ଥାକୁ ଉଠାଇଦେବା ଆଶଙ୍କା କରାଯାଉଛି ବୋଲି ଆଇନଜୀବୀ ମନୀଷ ତିଓ୍ବାରୀ କହିବା ପରେ ସଲିସିଟର ଜେନେରାଲ ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ଗଠିତ ୫ ଜଣିଆ ସାମ୍ବିଧାନିକ ପୀଠରେ ଏହାକୁ ଖଣ୍ଡନ କରିଥିଲେ।
ଅନୁଚ୍ଛେଦ ୩୭୦ ଉଚ୍ଛେଦକୁ ଚ୍ୟାଲେଞ୍ଜ କରି ଦାଏର ଏକାଧିକ ପିଟିଶନର ଶୁଣାଣି ସାମ୍ବିଧାନିକ ପୀଠରେ ଚାଲିଥିବାବେଳେ ଅରୁଣାଚଳପ୍ରଦେଶ ବିଧାୟକ ପଦି ରିଚୋଙ୍କ ତରଫରୁ କଂଗ୍ରେସ ନେତା ତଥା ଲୋକ ସଭା ସଦସ୍ୟ ତିଓ୍ବାରୀ ଉପସ୍ଥିତ ରହି ଏକ ଇଣ୍ଟରଭେନ୍ଶନ ଦାଏର କରିଥିଲେ। କୌଣସି ଆଶଙ୍କା ନାହିଁ ଏବଂ ଆଶଙ୍କା ସୃଷ୍ଟି କରାଯିବାର ଆବଶ୍ୟକତା ନାହିଁ ବୋଲି ମେହେଟ୍ଟା କହିଥିଲେ। ସ୍ଥାୟୀ ଏବଂ ଅସ୍ଥାୟୀ ବ୍ୟବସ୍ଥା ମଧ୍ୟରେ ପାର୍ଥକ୍ୟ ଦେଖିବାକୁ ପଡ଼ିବ। କୌଣସି ସ୍ବତନ୍ତ୍ର ବ୍ୟବସ୍ଥାକୁ ଛୁଇଁବା କେନ୍ଦ୍ର ସରକାରଙ୍କ ଉଦ୍ଦେଶ୍ୟ ନୁହେଁ ବୋଲି ସଲିସିଟର ଜେନେରାଲ ସ୍ପଷ୍ଟ କରିଦେଇଥିଲେ।
