ବୁଗୁଡ଼ା,୧୮।୨(ଡି.ଏନ୍.ଏ.): ଗଞ୍ଜାମ ଜିଲା ବୁଗୁଡ଼ା ବ୍ଲକରେ ମଣ୍ଡିରେ ଧାନ ବିକ୍ରି ପାଇଁ ଟୋକନ ମିଳିଥିଲେ ହେଁ ସୋସାଇଟି ଧାନ ନେଉ ନ ଥିବାରୁ ଚାଷୀ ମୁଣ୍ଡରେ ହାତଦେଇ ବସିଥିବା ବେଳେ କିଛି ଚାଷୀ ବାଧ୍ୟ ହୋଇ ବେପାରୀଙ୍କୁ କମ୍ ଦରରେ ଧାନ ବିକିବାକୁ ବାଧ୍ୟ ହେଉଥିବା ଦେଖିବାକୁ ମିଳିଛି। ଗତ ବର୍ଷ ୧. ୨୭ ଲକ୍ଷ କୁଇଣ୍ଟାଲ ଧାନ ବିଭିନ୍ନ ସୋସାଇଟି ମାଧ୍ୟମରେ କ୍ରୟ କରାଯାଇଥିବା ବେଳେ ଚଳିତବର୍ଷ ପ୍ରାୟ ୨ ଲକ୍ଷ କୁଇଣ୍ଟାଲ ଧାନ ଅମଳ ହୋଇଥିଲେ ହେଁ ୧୩ ତାରିଖ ସୁଦ୍ଧା ବିଭିନ୍ନ ଚାଷୀଙ୍କଠାରୁ ୧ ଲକ୍ଷ ୨୭ ହଜାର କୁଇଣ୍ଟାଲ ଧାନ ଉଠିଥିବା ଜଣାପଡ଼ିଛି l ୧୩ ତାରିଖ ସୁଦ୍ଧା ୨ ହଜାର ୧୭୬ ଜଣ ଚାଷୀ ଟୋକନ ଧରି ବସଛନ୍ତି। ୮୦ ହଜାର କୁଇଣ୍ଟାଲ ଧାନ ବିଭିନ୍ନ ଚାଷୀଙ୍କ ପାଖରେ ଜମା ହୋଇରହିଛି l ଗୋଲିଆ ପେକ୍ସ ଅଧୀନରେ ୨୪୩ ଟୋକନ ପଡ଼ି ରହିଥିବା ବେଳେ ୬୯୮୧.୫୯ କୁଇଣ୍ଟାଲ ଧାନ ଜମା ରହିଛି । ସେହିପରି ବିରଞ୍ଚିପୁରରେ ୧୧୩ ଟୋକନ ୨୬୦୫.୯୯ କୁଇଣ୍ଟାଲ, ବାଲିପଦର ରେ ୧୯୬ ଟୋକନକୁ ୨୮୯୬.୨୧ କୁଇଣ୍ଟାଲ, ଭାମସିଆଳିରେ ୪୮ ଟୋକନକୁ ୪୨୯.୩୮ କୁଇଣ୍ଟାଲ, ଏ.କରଡ଼ାବାଡ଼ିରେ ୨୧୯ ଟୋକନକୁ ୫୦୪୭.୯୨ କୁଇଣ୍ଟାଲ, ଗୋଳାବନ୍ଧରେ ୨୭୫ ଟୋକନକୁ ୯୩୩୮.୪୮ କୁଇଣ୍ଟାଲ, ବୁଗୁଡ଼ାରେ ୨୫୬ ଟୋକନକୁ ୭୮୭୦.୯୭ କୁଇଣ୍ଟାଲ, ମାଣିତରାରେ ୨୪୬ ଟୋକନକୁ ୬୯୩୯.୦୧ କୁଇଣ୍ଟାଲ, ପାଙ୍ଗିଡ଼ିରେ ୧୦୦ ଟୋକନକୁ ୧୬୭୩.୩୭ କୁଇଣ୍ଟାଲ, ଖୋଳ ଖାଳିରେ ୧୭୧ ଟୋକନକୁ ୫୨୧୫.୭ କୁଇଣ୍ଟାଲ, ମୋଟାବାଡ଼ିରେ ୮୩ ଟୋକନକୁ ୧୩୭୯.୧୨କୁଇଣ୍ଟାଲ, ବି.କରଡ଼ାବାଡ଼ିରେ ୧୮୭ ଟୋକନକୁ ୩୯୭୯.୪୪ କୁଇଣ୍ଟାଲ, ଅନ୍ତରପଡାରେ ୧୬୪ ଟୋକନକୁ ୪୦୫୨ କୁଇଣ୍ଟାଲ ଓ କରଚୁଲିରେ ୮୬ ଜଣ ଟୋକନ ଧରି ବସିଥିବା ବେଳେ ୧୪୯୮.୫୪ କୁଇଣ୍ଟାଲ ଧାନ ଜମାହୋଇ ରହିଥିବା ଜଣାପଡ଼ିଛି। ଏନେଇ ଜିଲା ମୁଖ୍ୟ ଯୋଗାଣ ନିରୀକ୍ଷକ ଉମାଶଙ୍କର ପତିଙ୍କୁ ପଚାରିବାରୁ ସେ ଫିଲଡ୍ ଭେରିଫିକେଶନ ପରେ ପୁଣି ପ୍ୟାକ୍ସଗୁଡ଼ିକୁ ଧାନ ଉଠାଣ ପାଇଁ ଅନୁମତି ଦିଆଯିବ ବୋଲି କହିଛନ୍ତି। ତେବେ ଧାନ ଉଠିବ କି ନାହିଁ ସେ ଆଶଙ୍କାରେ ଚାଷୀ ହତୋତ୍ସାହ ହୋଇ ପଡ଼ିଛନ୍ତି।
