ପୁରୀ ଅଫିସ,୧୧।୯: ପାର୍ବଣ ଋତୁ ଆରମ୍ଭ ହୋଇଯାଇଥିବା ବେଳେ ଆଉ ମାସେ ପରେ କାର୍ତ୍ତିକ ମାସ ଆରମ୍ଭ ହେବ। ତେବେ ୨ ବର୍ଷ ପରେ ଚଳିତବର୍ଷ କାର୍ତ୍ତିକ ମାସରେ ଅଧିକ ସଂଖ୍ୟାରେ ହବିଷିଆଳି ପୁରୀକୁ ଆସିବାକୁ ଥିବାରୁ ଏହାକୁ ଦୃଷ୍ଟିରେ ରଖି ଜିଲା ପ୍ରଶାସନ ପକ୍ଷରୁ ବିଭିନ୍ନ ପ୍ରକାରର ସ୍ବତନ୍ତ୍ର ବ୍ୟବସ୍ଥା ଆରମ୍ଭ ହୋଇଯାଇଛି। କାର୍ତ୍ତିକରେ ରାଈଦାମୋଦର ବ୍ରତ ପାଳନ କରିବା ପାଇଁ ବ୍ୟବସ୍ଥା କରାଯାଉଛି। କରୋନା ଯୋଗୁ ଗତ ୨ବର୍ଷ ଧରି ରାଜ୍ୟ ସରକାରଙ୍କ ଦ୍ୱାରା ଏହି ବ୍ୟବସ୍ଥା ବନ୍ଦ ଥିବାବେଳେ ଚଳିତବର୍ଷ ପୁଣି କାର୍ଯ୍ୟକାରୀ ହେଉଛି। ହବିଷିଆଳିମାନେ ରହିବା ପାଇଁ ସ୍ଥାୟୀ କୋଠାର ବ୍ୟବସ୍ଥା ହୋଇଥିବା ବେଳେ ଦୈନିକ ମହାପ୍ରଭୁଙ୍କ ଦର୍ଶନ, ମହାପ୍ରସାଦ ସେବନ, ଭଜନ କୀର୍ତ୍ତନ ଓ ଅନ୍ୟ ଆନୁଷଙ୍ଗିକ ବ୍ୟବସ୍ଥା କରାଯାଇଛି। ହବିଷିଆଳିମାନେ ବିନା ମୂଲ୍ୟରେ ଏହି ସୁବିଧା ପାଇପାରିବେ ବୋଲି ଜିଲା ପ୍ରଶାସନ ସୂଚନା ଦେଇଛି। ଏ ନେଇ ପଞ୍ଜୀକରଣ ଆସନ୍ତା ୧୩ ତାରିଖରୁ ଆରମ୍ଭ ହୋଇ ୨୯ତାରିଖ ପର୍ଯ୍ୟନ୍ତ ଚାଲିବ। ରାଜ୍ୟ ସରକାରଙ୍କର ଏହି ଯୋଜନାର ସୁବିଧା ପାଇବାକୁ ଚାହୁଁଥିବା ହବିଷିଆଳିମାନେ ପଞ୍ଜୀକରଣ କରିବେ। ଜିଲାପାଳଙ୍କ କାର୍ଯ୍ୟାଳୟରେ ପହଞ୍ଚି କିମ୍ବା ହ୍ବାଟ୍ସଆପ୍ ନମ୍ବର(୯୪୩୭୩୩୩୮୨୩)ରେ ଯୋଗାଯୋଗ କରି ପଞ୍ଜୀକରଣ କରିପାରିବେ। ଏ ନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ କରି ସର୍ବସାଧାରଣଙ୍କୁ ସୂଚନା ଦିଆଯାଇଛି।
ଅନ୍ୟପକ୍ଷେ ପ୍ରସ୍ତୁତି ସମ୍ପର୍କରେ ଉପଜିଲାପାଳ ଭବତାରଣ ସାହୁ କହିଛନ୍ତି, ୨୫୦୦ରୁ ଊର୍ଦ୍ଧ୍ୱ ହବିଷିଆଳିଙ୍କ ରହଣି, ମହାପ୍ରସାଦ ସେବନ ପାଇଁ ବ୍ୟବସ୍ଥା କରାଯାଉଛି। ପଞ୍ଜୀକରଣ ସଂଖ୍ୟା ସ୍ପଷ୍ଟ ହେବା ପରେ ପ୍ରସ୍ତୁତିରେ ସାମାନ୍ୟ ପରିବର୍ତ୍ତନ ଆସିପାରେ। ସମ୍ପ୍ରତି ଆମେ ଅଢ଼େଇ ହଜାର ବୃଦ୍ଧାଙ୍କ ପାଇଁ ବ୍ୟବସ୍ଥା କରୁଛୁ। ଜିଲା ପ୍ରଶାସନ ତରଫରୁ ଏମାନଙ୍କ ପାଇଁ ନରେନ୍ଦ୍ରପୋଖରୀ ନିକଟରେ ହୋଇଥିବା ଏକ ସ୍ବତନ୍ତ୍ର କୋଠାର ବ୍ୟବସ୍ଥା କରାଯାଇଥିବା ବେଳେ ପ୍ରଶାସନ ଏମାନଙ୍କ ଯାତାୟାତ ମଧ୍ୟ ବିନା ମୂଲ୍ୟରେ ଯୋଗାଇଦେବ। ପ୍ରତ୍ୟହ ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ ପାଇଁ ବଡ଼ ଯାନର ବ୍ୟବସ୍ଥା କରାଯିବ। ହବିଷିଆଳିମାନେ ଏହି ଯାନରେ ଶ୍ରୀମନ୍ଦିର ଯାଇପାରିବେ। ସେହିଭଳି ଭଜନ କୀର୍ତ୍ତନର ବ୍ୟବସ୍ଥା ମଧ୍ୟ କରାଯିବ। ତେବେ ନିର୍ଦ୍ଧାରିତ ସମୟ ମଧ୍ୟରେ ବ୍ୟକ୍ତିମାନେ ପଞ୍ଜିକରଣ କରିନିଅନ୍ତୁ। ଉକ୍ତ ସମୟ ପରେ ପଞ୍ଜୀକରଣ କରାଯିବ ନାହିଁ। ସେହିଭଳି କରୋନା ପୂର୍ବ ବର୍ଷ ଜିଲା ପ୍ରଶାସନ ସଫଳ ଭାବେ ଏହି ଯୋଜନାକୁ ପରିଚାଳିତ କରିଥିଲା। କରୋନା ଆଶଙ୍କା ହଟିଯାଇଥିବା ହେତୁ ଚଳିତବର୍ଷ ଅଧିକ ହବିଷିଆଳି ପୁରୀ ଆସିବା ନେଇ ଜିଲା ପ୍ରଶାସନ ଆକଳନ କରୁଛି। ହବିଷିଆଳି କୋଠାରେ ଯଥେଷ୍ଟ ପରିମାଣର ହବିଷିଆଳି ରହିବା ନେଇ ବ୍ୟବସ୍ଥା ହୋଇଛି। ଆବଶ୍ୟକ ପଡ଼ିଲେ ଅତିରିକ୍ତ ରହଣି ବ୍ୟବସ୍ଥା ମଧ୍ୟ କରିବୁ ବୋଲି ଉପଜିଲାପାଳ ଭବତାରଣ ସାହୁ କହିଛନ୍ତି।
