ଭୁବନେଶ୍ୱର, ୨୦।୧୦(ବ୍ୟୁରୋ): ଆଇନା ଏବଂ ୟୁନିସେଫ୍ ଓଡ଼ିଶା ସହଭାଗିତାରେ କଲ୍ଲୋଳ-୨୦୨୧ କ୍ଷୁଦ୍ର ଚଳଚ୍ଚିତ୍ର ପ୍ରତିଯୋଗିତା’ର ସପ୍ତମ ସଂସ୍କରଣ ଉଦ୍ଘାଟନ ଉତ୍ସବ ମଙ୍ଗଳବାର ଏକ ହୋଟେଲରେ ଅନୁଷ୍ଠିତ ହୋଇଯାଇଛି। ଚଳିତବର୍ଷ ‘ଋତୁସ୍ରାବ ସ୍ବଚ୍ଛତା ଓ ସ୍ବାସ୍ଥ୍ୟରକ୍ଷା’ ବିଷୟବସ୍ତୁକୁ ନେଇ କ୍ଷୁଦ୍ର ଚଳଚ୍ଚିତ୍ର ଆହ୍ବାନ କରାଯାଇଛି। ମଙ୍ଗଳବାର ଏହାର ପୋଷ୍ଟର ଉନ୍ମୋଚିତ ହୋଇଯାଇଛି। କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ୟୁନିସେଫ ଦ୍ୱାରା ଆୟୋଜିତ ରେଡ୍ ଡଟ୍ କ୍ୟାମ୍ପେନର ଆମ୍ବାସାଡର ତଥା ଓଡ଼ିଆ ଅଭିନେତ୍ରୀ ଅର୍ଚ୍ଚିତା ସାହୁ ଯୋଗଦେଇ କହିଛନ୍ତି, ଆମେ ଯେଉଁ ସମସ୍ୟାଗୁଡ଼ିକୁ ସାମ୍ନା କରିଛେ ତାକୁ ଆମ ଆଗାମୀ ପଢ଼ି ଯେପରି ସାମ୍ନା ନ କରନ୍ତୁ ା ଏଥିପାଇଁ ଆମକୁ ସଚେତନ ହେବା ସହ ଆମ ଉତ୍ତରପୀଢ଼ି କିପରି ସଚେତନ ହେବେ ସେଥିପ୍ରତି ଧ୍ୟାନ ଦେବାକୁ ହେବ। ୟୁନିସେଫ୍ ଓଡ଼ିଶାର ମୁଖ୍ୟ ଡ. ମୋନିକା ନେଲସନ୍ ଯୋଗଦେଇ କହିଥିଲେ, ଋତୁସ୍ରାବକୁ ନେଇ ସମାଜରେ ଚାଲିଥିବା ଭୁଲଧାରଣାକୁ ଭାଙ୍ଗିବା ଏବଂ ଏଥିସହ ଜଡ଼ିତ ଭୟ ଓ ଲଜ୍ଜାକୁ ଦୂର କରିବା ଦିଗରେ ଏହା ପ୍ରଥମ ପଦକ୍ଷେପ ହୋଇପାରେ। ଏହି ଚଳଚ୍ଚିତ୍ର ନିର୍ମାଣ କର୍ମଶାଳା ମାଧ୍ୟମରେ କିଶୋରମାନେ ସ୍କ୍ରିପ୍ଟ ଲେଖିବା, ଚଳଚ୍ଚିତ୍ରର ସୁଟିଂ ଏବଂ ସମ୍ପାଦନା ଶିଖିବେ। ପରେ ଏହା ଦ୍ୱାରା ପ୍ରସ୍ତୁତ ସିନେମାରେ ସେମାନଙ୍କର ଦୃଷ୍ଟିକୋଣ ଏବଂ ଚିନ୍ତାଧାରାର ପ୍ରକୃତ ପ୍ରତିନିଧିତ୍ୱ କରିବେ। ଏହି କର୍ମଶାଳା ପିଲାମାନଙ୍କୁ ଦେଇଥିବା ସମ୍ଭାବନାକୁ ନେଇ ଆମେ ଉତ୍ସାହିତ ଏବଂ ସେମାନଙ୍କର ଚଳଚ୍ଚିତ୍ର ଦେଖିବା ପାଇଁ ଆମେ ଖୁବ୍ ଆଗ୍ରହୀ।
ଏହି ଅବସରରେ ଆଇନାର ସମ୍ପାଦିକା ସ୍ନେହ ମିଶ୍ର କହିଥିଲେ, ଋତୁସ୍ରାବକୁ ନେଇ ସମାଜରେ ଏବେ ମଧ୍ୟ ଅନେକ ଭୁଲ ଧାରଣା ଚାଲିଆସୁଛି, ଯାହାକୁ ବଦଳାଇବା ନିହାତି ଆବଶ୍ୟକ ା ଏହି ବର୍ଷର ସହଯୋଗୀ ଅନୁଷ୍ଠାନ ଆଇଆର୍ସି, ୟୁଥ୍ ଫର୍ ୱାଟର ଓ ସୁଜାନାର ସହଭାଗିତାରେ ଏହି କାର୍ଯ୍ୟକ୍ରମରେ ଆମେ ଓଡ଼ିଶା ବାହାରୁ ମଧ୍ୟ ଚଳଚ୍ଚିତ୍ରର ଆସିବାର ଆଶା ରଖିଛୁ। ଏହି ବର୍ଷ ଚଳଚ୍ଚିତ୍ର ନିର୍ମାତାଙ୍କୁ ଫିଲ୍ମ ପାଇଁ ଅଧିକ ସମୟ ଦିଆଯାଇଛି। ଯାହା ଫଳରେ ବିଷୟବସ୍ତୁକୁ ନେଇ ସୁନ୍ଦର ସୁନ୍ଦର ପରିକଳ୍ପନା କରିବା ପାଇଁ ସେମାନଙ୍କୁ ଯଥେଷ୍ଟ ସମୟ ମିଳିବ। ସବୁଠାରୁ ଗୁରୁତ୍ୱପୁର୍ଣ୍ଣ କଥା ହେଲା ପିଲାମାନେ ସେମାନଙ୍କ କଥାକୁ ନେଇ ଚଳଚ୍ଚିତ୍ର ତିଆରି କରିବେ। ଅନ୍ୟମାନଙ୍କ ମଧ୍ୟରେ ୟୁନିସେଫ୍ର କମ୍ୟୁନିକେଶନ ବିଶେଷଜ୍ଞ ରାଧିକା ଶ୍ରୀବାସ୍ତବ ପିଲାଙ୍କର ସହଭାଗିତାକୁ ଗୁରୁତ୍ୱ ଦେଇଥିଲେ। ୟୁନିସେଫ୍ର ୱାସ୍ ବିଶେଷଜ୍ଞ ସିପ୍ରା ସକ୍ସେନା କହିଥିଲେ, ଏହା କେବଳ ଝିଅ ବା ମହିଳାଙ୍କ ସମସ୍ୟା ନୁହେଁ, ପୁରୁଷମାନେ ମଧ୍ୟ ଏ ବିଷୟରେ ଆଲୋଚନା କରିବା ଦରକାର।
