ଦାରିଙ୍ଗବାଡ଼ି,୩୦ା୪(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ସିମନବାଡ଼ି ଫିଡରରେ ୧୦ ଘଣ୍ଟା ହେଲା ୮ ପଞ୍ଚାୟତ ଅଞ୍ଚଳରେ ବିଦ୍ୟୁତ୍ ସେବା ଠପ୍ ହୋଇଯାଇଛି। କୌଣସି ବର୍ଷା ପବନ ନ ଥାଇ ମଧ୍ୟ ସକାଳ ପ୍ରାୟ ୮ରୁ ଏହି ସେବା ଅଚଳ ହୋଇପଡ଼ିଛି। ଫଳରେ ଉକ୍ତ ଫିଡରର ଶ୍ରାନିକେତା, ସିମନବାଡ଼ି, କିରିକୁଟି, ତିଲୋରୀ, ବୁଡ଼ାଗୁଡା, ଗୁମିକିଆ, କୋଟଗଡ଼ ବ୍ଲକ ପକାରୀ, ବାଲିଗୁଡ଼ା ବ୍ଲକ ଋତୁଙ୍ଗିଆ ପର୍ଯ୍ୟନ୍ତ ଏହି ସେବା ଅଚଳ ହୋଇପଡ଼ିଛି।
ପ୍ରକାଶ ଯେ, ଜି. ଉଦୟଗିରି ଠାରୁ ରାଇକିଆ ଏବଂ କ. ନୂଆଗାଁ ଦେଇ ଦାରିଙ୍ଗବାଡ଼ିକୁ ୩୩ କେଭି ବିଦ୍ୟୁତ ସଂଯୋଗ ହୋଇଛି। ସେହିପରି ଦାରିଙ୍ଗବାଡ଼ିଠାରୁ ୧୧ କେଭି ବିଦ୍ୟୁତ୍ ସଂଯୋଗ ଏହି ସବୁ ପଞ୍ଚାୟତ ଅଞ୍ଚଳକୁ ହୋଇଛି। ବାରମ୍ବାର ଏହି ଫିଡର ଅଚଳ ହୋଇପଡୁଥିବା ଯୋଗୁ ସରକାର ଦାରିଙ୍ଗବାଡ଼ି ପରେ ସିମନବାଡ଼ିଠାରେ ଅତ୍ୟାଧୁନିକ ସବଷ୍ଟେଶନ ସ୍ଥାପନ କଲେ କିନ୍ତୁ ତାକୁ କାର୍ଯ୍ୟକ୍ଷମ କରାଯାଇ ପାରିନାହିଁ। ଫଳରେ ଦାରିଙ୍ଗବାଡ଼ି ସବଷ୍ଟେଶନ ଉପରେ ଏହି ସବୁ ପଞ୍ଚାୟତ ନିର୍ଭର କରିବାକୁ ପଡୁଛି। ଫଳରେ ଅତ୍ୟଧିକ ଲୋଡ୍ ସହ ଲମ୍ବା ରାସ୍ତା ପର୍ଯ୍ୟନ୍ତ ବିଦ୍ୟୁତ୍ ଖୁଣ୍ଟ ଓ ତାର ରହିଥିବା ଓ ଜଙ୍ଗଲ ଭିତରେ ଯାଇଥିବାରୁ ଗଛ ଡାଳ ପଡ଼ି ବିଦ୍ୟୁତ ଅଚଳ ହୋଇପଡୁଛି। ବାରମ୍ବାର ଅଚଳ ହୋଇପଡୁଥିଲେ ତାକୁ ମରାମତି କରିବା ଓ ଫଲ୍ଟ ଖୋଜିବାରେ ଦିନ ତମାମ ସମୟ ଅତିବାହିତ ହେଉଛି। ଫଳରେ ଉପଭୋକ୍ତାଙ୍କୁ ସଠିକ୍ ଓ ସବୁଦିନିଆ ବିଦ୍ୟୁତ୍ ମିଳିବା ମୁସ୍କିଲ ହେଉଥିବା ଅଭିଯୋଗ ହେଉଛି।
ଖବର ଲେଖା ହେବା ସୁଦ୍ଧା ବିଦ୍ୟୁତ୍ ଯୋଗାଣ ହୋଇ ନ ଥିବା ଜଣାପଡ଼ିଛି। ଏନେଇ ବିଭାଗର ସହକାରୀ ଯନ୍ତ୍ରୀ ଶିବ ପ୍ରସାଦ ନାୟକଙ୍କ ସହ ଯୋଗାଯୋଗ କରାଯିବାରୁ ସେ କହିଛନ୍ତି, ଉକ୍ତ ଫିଡରରେ ପ୍ରାୟ ୪ଟି ଫଲ୍ଟ ବାହାରିଛି। ଆହୁରି ଫଲ୍ଟ ରହିଛି କର୍ମଚାରୀ କାର୍ଯ୍ୟରେ ନିୟୋଜିତ ରହିଥିବା ସେ କହିଛନ୍ତି। ଆହୁରି ସମୟ ଲାଗିବ ବୋଲି ଦାରିଙ୍ଗବାଡ଼ି ସବ୍ଷ୍ଟେଶନର ସହକାରୀ ଯନ୍ତ୍ରୀ କହିଛନ୍ତି।