ତେନ୍ତୁଳିଖୁଣ୍ଟି, ୨୧।୨(ଡି.ଏନ୍.ଏ.):ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକରେ ସୋମବାର ଜିଲାପାଳଙ୍କ ମିଳିତ ଅଭିଯୋଗ ଶୁଣାଣି ଅନୁଷ୍ଠିତ ହୋଇଯାଇଛି। ଜିଲାପାଳ ଡ. କମଳ ଲୋଚନ ମିଶ୍ର, ଜିଲା ପରିଷଦ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅନ୍ୟା ଦାସ, ଏସ୍ପି ଏସ୍.ସୁଶ୍ରୀ, ଡିଏଫ୍ଓ ଜି.ଜଗଦୀଶ ରାଓ, ଜିଲା ମୁଖ୍ୟ ଉଦ୍ୟାନ ଅଧିକାରୀ ଜି. ଭେଙ୍କଟ ରେଡ୍ଡୀ, ସହକାରୀ ଜିଲା ପଶୁ ଚିକିତ୍ସାଧିକାରୀ ଦିଲୀପ କୁମାର କବିରାଜ, ବିଦ୍ୟୁତ୍ ବିଭାଗ ନିର୍ବାହୀ ଯନ୍ତ୍ରୀ ଅଭିଜିତ ପାଢ଼ୀ, ବିଡିଓ ଦୁର୍ଯ୍ୟୋଧନ ଭୋଇ, ବ୍ଲକ ଅଧ୍ୟକ୍ଷା ନୀଳେନ୍ଦ୍ରୀ ନାୟକ ଓ ଉପାଧ୍ୟକ୍ଷ ରାଜେନ୍ଦ୍ର ବିଶୋଇଙ୍କ ସମେତ ବ୍ଲକସ୍ତରୀୟ ଓ ଜିଲାସ୍ତରୀୟ ଅଧିକାରୀ ଉପସ୍ଥିତ ଥିଲେ। ଅଧିକାରୀମାନେ ୫୧ଟି ଅଭିଯୋଗର ଶୁଣାଣି କରିଥିଲେ।
ପରଜାବାରଙ୍ଗପଦର ପଞ୍ଚାୟତ ଖାତିଗୁଡ଼ା ଗ୍ରାମ ପାଇଁ ବସୁଧା ଯୋଜନାରେ ଜଳଯୋଗାଣ ପ୍ରକଳ୍ପ ରହିଛି। ସେଠାରୁ କିନ୍ତୁ ଖାତିଗୁଡ଼ା ଗ୍ରାମର ପାଇକସାହି, କୁମ୍ଭାର ସାହି, ଗୌଡ଼ସାହି ସମେତ ଖାତିଗୁଡା ବଜାର ଅଞ୍ଚଳକୁ ପାଣି ମିଳୁନାହିଁ। ଏହାର ସମାଧାନ କରିବା ନେଇ ଗ୍ରାମବାସୀ ଅଭିଯୋଗ କରିଥିଲେ। ଖାତିଗୁଡାସ୍ଥିତ ଉପର ଶିବିମନ୍ଦିରର ପୂଜାର୍ଚ୍ଚନା ପାଇଁ ଜଳ ସମସ୍ୟା ରହୁଛି ତା’ର ସମାଧାନ କରିବାକୁ ଖବରଦାତା ଚିଦାନନ୍ଦ ସାହୁ ଅନୁରୋଧ କରିଥିଲେ। ବିଜାପଦରରୁ ବରଡ଼ାଝୋଡ଼ି ଦେଇ ଡାଇକ ପର୍ଯ୍ୟନ୍ତ ରାସ୍ତା ପାଇଁ ଭୀମସେନ ପାଣିଗ୍ରାହୀ ଅନୁରୋଧ କରିଥିଲେ। ବରଡ଼ାଝୋଡ଼ିର ବିଦ୍ୟାଳୟ ପୁନଃ ଚାଲୁ କରିବାକୁ ତେନ୍ତୁଳିଖୁଣ୍ଟି ସମିତି ସଭ୍ୟା ଅନୁରୋଧ କରିଥିଲେ। ଝରିଗୁମ୍ମାରୁ ଘୁମରେଶ୍ୱର ପର୍ଯ୍ୟନ୍ତ ରାସ୍ତା ପାଇଁ ଝରିଗୁମ୍ମା ସରପଞ୍ଚ ମଦନ ମୋହନ ଦଳପତି ଦାବି ରଖିଥିଲେ। ପାତ୍ରପୁଟ ସମିତି ସଭ୍ୟ ଦିଲୀପ ପ୍ରଧାନୀ ଘୁମରେଶ୍ୱର ଶୈବପୀଠରେ ପାନୀୟ ଜଳ ସୁବିଧା କରିବାକୁ ଅନୁରୋଧ କରିଥିଲେ। ଲଦିପଦର ଓ ପାଙ୍ଗଣମରା ଆଦି ଗ୍ରାମକୁ ପାନୀୟ ଜଳ ସୁବିଧା କରିବା ସହ ମୁଣ୍ଡାଗୁଡ଼ାରୁ ମଙ୍ଗର ଦୋରା ରାସ୍ତା ପାଇଁ ମଧ୍ୟ ଦାବି କରାଯାଇଛି। ଜିଲାପାଳ ମିଶ୍ର ଅଭିଯୋଗ ଶୁଣି ବିଭାଗୀୟ ଅଧିକାରୀଙ୍କୁ ତୁରନ୍ତ ସମାଧାନ ପାଇଁ ନିର୍ଦ୍ଦେଶ ଦେଇଥିଲେ।
