ନୟାଗଡ଼ ଅଫିସ,୧୫ା୧୨: ଶ୍ରୀଜଗନ୍ନାଥ ସଂସ୍କୃତିର ଆଦିପୀଠ ତଥା ପ୍ରମୁଖ ପର୍ଯ୍ୟଟନ କେନ୍ଦ୍ର ଭାବେ ପରିଚିତ ନୟାଗଡ଼ ଜଲା ଖଣ୍ଡପଡ଼ା ବ୍ଲକ ଅଧନ ପ୍ରଭୁ ଶ୍ରୀନୀଳମାଧବ ଜୀଉଙ୍କ ବିଜେ କଣ୍ଟିଲୋଙ୍କ ପୀଠ। ଏଠାରେ ହଜାର ବର୍ଷ ତଳୁ ପୁରାତନ ଭୈମୀ ଏକାଦଶୀ ମାଘ ମେଳା ହୋଇ ଆସୁଛି। ତେବେ ମାଘ ମେଳାକୁ ସମ୍ପୂର୍ଣ୍ଣ ଭାବେ ବନ୍ଦ କରିବାକୁ ପଡିଆ ବିକ୍ରି କରାଯିବାକୁ ମସୁଧା ଚାଲିଛି। ଏହା ଜଣାପଡିବା ପରେ କଣ୍ଟିଲୋ ଓ ଏହାର ଆଖପାଖ ଅଞ୍ଚଳରେ ବିରୋଧ ଦେଖା ଦେଇ ପ୍ରତିବାଦ ଉଠିଛି। ସ୍ଥାନୀୟ ବାସିନ୍ଦା ଜିଲାପାଳଙ୍କୁ ଭେଟି ଏପରି ନ କରିବାକୁ ଫେରାଦ ହେବାକୁ ନିଷ୍ପତ୍ତି ହୋଇଛି। ଲୋକଙ୍କ ଦାବି ପୂରଣ ନ ହେଲେ ଆନ୍ଦୋଳନ କରାଯିବାକୁ ସ୍ଥିର ହୋଇଛି। ପ୍ରଭୁ ଶ୍ରୀନୀଳ ମାଧବଙ୍କ କ୍ଷେତ୍ରର ବିକାଶ ପାଇଁ ରାଜ୍ୟ ସରକାର ଶହେ କୋଟି ଅର୍ଥ ମଞ୍ଜୁର କରିଥିବାରୁ କଣ୍ଟିଲୋ ପଞ୍ଚାୟତ ସହିତ ବଡ଼ ବାଣପୁର, ସିଧାମୂଳା, ବେନ ଗାଡିଆ, ଧନ ଚାଙ୍ଗଡ଼ା,ପଥର ଚକଡା ଓ କେନ୍ଦୂପଳି ପଞ୍ଚାୟତର ପ୍ରାୟ ୭୦ ହଜାର ଅଧିବାସୀ ଭୂୟସୀ ପ୍ରଶଂସା କରିଥିଲେ। କିନ୍ତୁ ବିକାଶ ନାଁରେ ଶ୍ରୀ ଜୀଉଙ୍କ ହଜାର ହଜାର ବର୍ଷ ର ବହୁ ପ୍ରାଚୀନ ପୁରାତନ ଭୌମ ଏକାଦଶୀ ମାଘ ମେଳା ପଡିଆ କୁ ବିକ୍ରି ପାଇଁ ଉଦ୍ୟମକୁ ନିନ୍ଦା କରାଯାଇଛି। ଶ୍ରୀଜୀଉଙ୍କ କ୍ଷେତ୍ରର ବିକାଶ ପାଇଁ ବିସ୍ଥାପିତମାନଙ୍କୁ ମାଘ ମେଳା ପଡ଼ିଆରେ ଅବସ୍ଥାପିତ କରିବା ପାଇଁ ସ୍ଥିର ହୋଇଥିବା ଜଣାପଡିଛି। କଣ୍ଟିଲୋ ଗୋଟିଏ ଏକକ ଗ୍ରାମ ପଞ୍ଚାୟତ ହୋଇଥିବାରୁ ଏଠି ବାସ କରୁଥିବା ପ୍ରାୟ ୨୦ ହଜାର ଅଧିବାସୀମାନଙ୍କ ମଧ୍ୟରୁ ପ୍ରାୟ ଶତକଡ଼ା ୯୦ ଭାଗ ମାତ୍ର ଅଧା ଡିସିମିଲ କିମ୍ବା ଗୋଟିଏ ଡିସିମିଲ ଘର ବାଡ଼ିରେ ୨ କିମ୍ବା ୩ ପରିବାର ରହି ଆସୁଛନ୍ତି। କଣ୍ଟିଲୋରେ ଘର କରିବା ପାଇଁ ଜମିର ଘୋର ଅଭାବ ଓ ଅସୁବିଧା ରହିଛି। ପ୍ରଶାସନ ସବୁ କଥା ବିଚାରକୁ ନେଇ ପଦକ୍ଷେପ ନ ନେଲେ କଣ୍ଟିଲୋ ଅଶାନ୍ତ ହୋଇପଡିବ ବୋଲି ଆଲୋଚନା ଚାଲିଛି।
