କେନ୍ଦୁଝର, ୧୬ା୫ (ସ୍ବ.ପ୍ର.): ଘଟଗାଁ ରେଞ୍ଜ ଅନ୍ତର୍ଗତ ଅଟେଇ ସଂରକ୍ଷିତ ଜଙ୍ଗଲରେ ପୁଣି ୨ ଟି ଟ୍ରାପ କ୍ୟାମେରା ଚୋରି ହୋଇଛି। ଏନେଇ ଘଟଗାଁ ଥାନାରେ ରିପୋର୍ଟ ହୋଇଛି। ଘଟଗାଁ ଫରେଷ୍ଟର ଜତିନ୍ଦ୍ର ସାହୁ ଘଟଣାର ତଦନ୍ତ ପାଇଁ ଘଟଗାଁ ଥାନାରେ ଏତଲା ଦେଇଛନ୍ତି। ଅଟେଇ ସଂରକ୍ଷିତ ଜଙ୍ଗଲର କାଦବାହାଳି ଉତ୍ତର ବିଟ ଅଞ୍ଚଳରେ ଏହି ଚୋରି ହୋଇଛି। ତେବେ ଚୋରି କରିଥିବା ଲୋକଙ୍କୁ ଖୁବଶୀଘ୍ର ଠାବ କରାଯିବ ବୋଲି ବନ ବିଭାଗ କହିଛି । ଏଠାରେ ସୂଚନଯୋଗ୍ୟ ଯେ, ପୂର୍ବରୁ କିଛି ମାସ ତଳେ ଏଭଳି ଏକ କ୍ୟାମେରା ଚୋରି ହୋଇଥିଲେ ହେଁ ଚୋର ଧରା ପଡି ନ ଥିବା ବେଳେ ଏଭଳି ଆଉ ଏକ ଚୋରି ବନ ବିଭାଗ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି।
ପ୍ରକାଶ ଯେ, ଘଟଗାଁ ବନାଞ୍ଚଳ ଅଟେଇ ସଂରକ୍ଷିତ ଜଙ୍ଗଲରେ ବାଘର ଗତିବିଧି ଜାଣିବା ପାଇଁ ମୋଟ ୫୫ଟି ଟ୍ରାପ କ୍ୟାମେରା ଲାଗିଛି । ଟ୍ରାପ କ୍ୟାମେରା ପ୍ରତି ୧୫ ଦିନରେ ଥରେ ଖୋଲି ଯାଞ୍ଚ କରାଯାଉଛି । ତେବେ ଯାଞ୍ଚ ସମୟରେ ୨ଟି ନ ଥିବା ଜଣାପଡିଥିଲା । ଏଥିପୂର୍ବରୁ ମାର୍ଚ୍ଚ ମାସ ୯ ତାରିଖରେ ପାଟଣା ରେଞ୍ଜ ପାଟଣା ସେକ୍ସନ ତଣ୍ଡୋ ବିଟ ଅଟେଇ ସଂରକ୍ଷିତ ଜଙ୍ଗଲରେ ମହାବଳ ବାଘର ଗତିବିଧି ଜାଣିବା ପାଇଁ ବନ ବିଭାଗ ପକ୍ଷରୁ ବିଭିନ୍ନ ସ୍ଥାନରେ ୧୦ଟି ଟ୍ରାପ କ୍ୟାମେରା ଲଗାଯାଇଥିଲା । ଭୁବନେଶ୍ୱରରୁ ଏକ ସ୍ବତନ୍ତ୍ର ଟିମ୍ ଆସି ପାଟଣା ରେଞ୍ଜର ଅଟେଇ ସଂରକ୍ଷିତ ଜଙ୍ଗଲରେ ଟ୍ରାପ ଲଗାଇଥିଲେ । ତେବେ ଏହି ୧୦ଟି ଟ୍ରାପ କ୍ୟାମେରା ମଧ୍ୟରୁ ପାଟଣା ରେଞ୍ଜର ଅଟେଇ ସଂରକ୍ଷିତ ଜଙ୍ଗଲରେ ୨ଟି ଟ୍ରାପ କ୍ୟାମେରା ଚୋରି ହୋଇଥିବା ବନ ବିଭାଗ ନଜରକୁ ଆସିବା ପରେ ପାଟଣା ଫରେଷ୍ଟର ଚିତ୍ତରଞ୍ଜନ ପରିଡା ଘଟଗାଁ ଥାନାରେ ଏତଲା ଦେଇଛନ୍ତି। ଅଟେଇ ସଂରକ୍ଷିତ ଜଙ୍ଗଲର ରୋହିଣୀଦୁମା ଏବଂ ବଡପିଛୁଳାରେ ୨ଟି ଟ୍ରାପ କ୍ୟାମେରା ଚୋରି ହୋଇଥିବା ବନ ବିଭାଗ ଜାଣିବା ପରେ ଏତଲା ଦିଆଯାଇଥିଲେ ମଧ୍ୟ ଅଦ୍ୟାବଧି ଚୋରଙ୍କୁ ଠାବ କରିବାରେ ପୋଲିସ ଏବଂ ବନ ବିଭାଗ ବିଫଳ ହୋଇଛି । ଏହାପରେ ପୁଣି ଏକ ଟ୍ରାପ କ୍ୟାମେରା ଚୋରି ହୋଇଥିବା ନେଇ ଥାନାରେ ରିପୋର୍ଟ ହୋଇଛି । ଘଟଗାଁ ରେଞ୍ଜ ଦେଓବନ୍ଧ ସେକ୍ସନ ବାରବାଙ୍କ ସଂରକ୍ଷିତ କୁଆଝରଣ ଘାଟି ଅଣ୍ଡରପାସ ନିକଟରେ ଗତ ୮ତାରଖରେ ଗୋଟିଏ ଟ୍ରାପ କ୍ୟାମେରାକୁ କେହି ଭାଙ୍ଗି ଦେଇଥିବା ଜଣାପଡିଛି । ଭାଙ୍ଗି ଯାଇଥିବା ଟ୍ରାପ କ୍ୟାମେରା ବନ ବିଭାଗ ଉଦ୍ଧାର କରିଛି । ତେବେ କିଏ ଏବଂ କାହିଁକି ଜଙ୍ଗଲ ଭିତରେ ପଶି ଟ୍ରାପ କ୍ୟାମେରା ଚୋରି କରିଛି ସେ ଦିଗରେ ପୋଲିସ ତଦନ୍ତ ଆରମ୍ଭ କରିଛି । ସଂରକ୍ଷିତ ଜଙ୍ଗଲ ଭିତରେ ପଶିବା ମନା ଥିବାବେଳେ କେହି ଶିକାରୀ ଅଟେଇ ଜଙ୍ଗଲରେ ଶିକାର କରିବାକୁ ଯାଇ ଧରା ପଡିିବା ଭୟରେ ଟ୍ରାପ କ୍ୟାମେରା ଚୋରୀ କରିଥିବା ଅନୁମାନ କରାଯାଉଛି । ଜଙ୍ଗଲରେ ପାଦଚଲା ପେଟ୍ରୋଲିଂ ଠିକ ଭାବରେ କରାଯାଉ ନ ଥିବାରୁ ଏବଂ ଜଙ୍ଗଲରେ ବାହାର ଲୋକଙ୍କ ପ୍ରବେଶ ହେଉଛି । ବନ ବିଭାଗ କ୍ୟାମେରାର ସୁରକ୍ଷା ଦେଇ ପାରୁ ନ ଥିବାବେଳେ ମହାବଳ ବାଘର ସୁରକ୍ଷା କିପରି କରିବ ତାହା ଏବେ ଆଲୋଚନାର ବିଷୟ ହୋଇଛି । ବାଘକୁ ୨୪ ଘଣ୍ଟିଆ ନିରିକ୍ଷଣ କରିବାକୁ ଜଣେ ଏସିଏଫଙ୍କ ନେତୃତ୍ୱରେ ୫ଜଣିଆ ଟିମ ଗଠନ କରାଯାଇଛି । ପାଟଣା ଏବଂ ଘଟଗାଁ ରେଞ୍ଜର କର୍ମଚାରୀମାନେ ଏହାକୁ ସହଯୋଗ କରୁଛନ୍ତି । ଏତେ ସବୁ ବ୍ୟବସ୍ଥା କରାଯାଇଥିଲେ ମଧ୍ୟ ଟ୍ରାପ କ୍ୟାମେରା ଚୋରି ବନ ବିଭାଗର ଢିଲା ପେଟ୍ରୋଲିଂକୁ ପଦାରେ ପକାଇଛି । ଅଟେଇ ସଂରକ୍ଷିତ ଜଙ୍ଗଲରେ ଏକ ମହାବଳ ବାଘ ସହ ଏକ କଲାରାପତରିଆ ବାଘ ରହିଥିବାବେଳେ ଏହି ଘଟଣା ପରେ ବାଘର ସୁରକ୍ଷା ନେଇ ପରିବେଶବିତ୍ମାନ ଚିନ୍ତାପ୍ରକଟ କରିଛନ୍ତି ।
