ଧାମନଗର,୨୭।୬(ଦେବେନ୍ଦ୍ର ଆନ୍ଦିଆ): ଭଦ୍ରକ ଜିଲା ଧାମନଗର ବ୍ଲକ ଅଧୀନ ମୁସ୍ତଫାପୁର ପଞ୍ଚାୟତର ଗୋବିନ୍ଦାଗଡ଼ିଆଠାରୁ ଦୋବଲ ପଞ୍ଚାୟତର ରାମେଶ୍ୱରପୁର ପର୍ଯ୍ୟନ୍ତ ନିର୍ମିତ ଗେଙ୍ଗୁଟି ନଦୀବନ୍ଧ ଗତବର୍ଷ ମରାମତି ସହ ପ୍ରଶସ୍ତୀକରଣ ହୋଇଥିଲା। ହେଲେ ବର୍ଷା ଗଲାନି, ନଦୀବନ୍ଧ ପାର୍ଶ୍ୱରୁ ମାଟି ଧୋଇବା ଓ କିଛି ସ୍ଥାନରେ ଧସିବା ଆରମ୍ଭ କରିଛି। ଗତ ବର୍ଷାଋତୁ ପରେ ବନ୍ଧ ଅବସ୍ଥା ଖରାପ ହୋଇଛି। ଗୋବିନ୍ଦାଗଡ଼ିଆ, ବେଲମଳା, ରଘୁନାଥପୁର, ଦୋବଲ, ସୋଧ ଓ କୋଳେଇପଦା, ରାମେଶ୍ବରପୁର ପାଖରେ ସ୍ଥାନେ ସ୍ଥାନେ ବନ୍ଧ ପାର୍ଶ୍ୱ ଧସିଗଲାଣି। ପ୍ରାୟ ୪ କିଲୋମିଟର ଏହି ବନ୍ଧର ବିଭିନ୍ନ ସ୍ଥାନରେ ରେନ୍କଟ ହେବା ସହ ପାର୍ଶ୍ୱ ଧାରଗୁଡ଼ିକ ଫାଟିଯାଇଛି। ଏପରିକି ବନ୍ଧ ଉପରେ ହୋଇଥିବା ପିଚୁ କେତକ ସ୍ଥାନରେ ଉଠିଯାଇଛି। ବେଲମଳା ଓ ରଘୁନାଥପୁର ପାଖରେ ନଦୀପଠାରେ ଇଟା ପଡୁଥିବାରୁ କୋଇଲା, ବାଲି ବୋଝେଇ ଭାରିଯାନ ଚଳାଚଳ ଯୋଗୁ ନଦୀବନ୍ଧ ଦୁର୍ବଳ ହେଉଥିବା ସ୍ଥାନୀୟ ଲୋକେ ପ୍ରକାଶ କରିଛନ୍ତି।
ସୁଦୃଢ଼ୀକରଣ କାର୍ଯ୍ୟର ବର୍ଷଟିଏ ମଧ୍ୟରେ ଗେଙ୍ଗୁଟି ନଦୀବନ୍ଧ ନଷ୍ଟ ଆରମ୍ଭ ହେଲାଣି। ଫଳରେ ନଦୀବନ୍ଧ କାର୍ଯ୍ୟର ସ୍ବଚ୍ଛତା ଉପରେ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ବର୍ଷକ ତଳେ ଗୋବିନ୍ଦାଗଡ଼ିଆଠାରୁ ରାମେଶ୍ବରପୁର ପର୍ଯ୍ୟନ୍ତ ନଦୀବନ୍ଧ ସୁଦୃଢ଼ୀକରଣ କାର୍ଯ୍ୟ ଶେଷ ହୋଇଥିଲା। ବନ୍ଧର ଉଚ୍ଚତା ଓ ଚଉଡ଼ା ବୃଦ୍ଧି ହେବା ସହ ପିଚୁ କରାଯାଇଥିଲା। ହେଲେ ସାମାନ୍ୟ ବର୍ଷାରେ ବନ୍ଧ ଅବସ୍ଥା ଶୋଚନୀୟ ହୋଇଛି। ବର୍ଷାଜଳ ନିଷ୍କାସନ ହୋଇ ନଦୀବନ୍ଧ କଡ଼ରେ ରେନ୍କଟ ସୃଷ୍ଟି ହୋଇଛି। ଠାଏ ଠାଏ ପିଚୁ ଉଠିଯାଇଥିବା ବେଳେ ମଝି ରାସ୍ତାରେ ଗାଢ଼ ହେଲାଣି। ବେଲମଳା ଓ ରଘୁନାଥପୁର ନିକଟରେ ନଦୀବନ୍ଧ ଦୁର୍ବଳ ହୋଇଗଲାଣି। ସେହିପରି ସୋଧ, କୋଳେଇପଦା ପାଖରେ ବନ୍ଧରେ ପଡ଼ିଥିବା ପିଚୁ ଉଠିଯାଇଛି।
ବନ୍ୟା ସମୟରେ ବେଲମଳା ପାଖରୁ ରାମେଶ୍ୱରପୁର ପର୍ଯ୍ୟନ୍ତ ବିଭିନ୍ନ ସ୍ଥାନରେ ନଦୀବନ୍ଧରେ ଘାଇ ହୋଇଥାଏ। ୨୦୧୯-୨୦୨୦ରେ ପ୍ରାୟ ୯ କୋଟି ୯୬ଲକ୍ଷ ଟଙ୍କା ବ୍ୟୟରେ ନଦୀବନ୍ଧ ମରାମତି ସହ ସୁଦୃଢ଼ୀକରଣ କାର୍ଯ୍ୟ ଆରମ୍ଭ ହୋଇଥିଲା। କରୋନା ପାଇଁ କାର୍ଯ୍ୟ ପ୍ରଭାବିତ ହୋଇ ୨୦୨୨ରେ ଶେଷ ହୋଇଥିଲା। ବିଭାଗୀୟ ଅଧିକାରୀଙ୍କ ଆବଶ୍ୟକ ତଦାରଖ ଅଭାବରୁ ଠିକାଦାର ନିମ୍ନମାନର କାମ କରିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଏ ସମ୍ପର୍କରେ ଧାମନଗର ଜଳସମ୍ପଦ ବିଭାଗର ସହକାରୀ ଯନ୍ତ୍ରୀ ଧିରେନ କୁମାର ପାଣି କହିଛନ୍ତି, ନଦୀବନ୍ଧ ସମସ୍ୟା ନେଇ ବିଭାଗର ଏସ୍ସିଙ୍କୁ ଅବଗତ କରାଯାଇଛି। ଖୁବ୍ଶୀଘ୍ର ସମାଧାନ ହୋଇଯିବ।
