ଯାଜପୁର,୧।୧୦(ହର୍ଷବର୍ଦ୍ଧନ ବେହେରା)ଗ୍ରାମାଞ୍ଚଳର ବିପିଏଲ୍ ପରିବାର ଦୀନଦୟାଲ ଗ୍ରାମଜ୍ୟୋତି ଯୋଜନାର ସଫଳତା ପାଇବାରେ ଏଯାଏ ବଞ୍ଚିତ ରହିଛନ୍ତି। ଏଥିରେ କେତେଜଣ ଅଧିକାରୀ ଓ ଠିକାଦାର ଅଧାପନ୍ତରିଆ କାମ କରି ମାଲାମାଲ ହୋଇଥିବାବେଳେ ସମ୍ପୃକ୍ତ ଶ୍ରମିକମାନେ ତାଙ୍କ ପାଉଣା ପାଇନାହାନ୍ତି। ଏନେଇ ଶ୍ରମିକମାନେ ବାରମ୍ବାର ଦିଲ୍ଲୀର ଠିକାସଂସ୍ଥା ଏବଂ ବିଭାଗୀୟ ଅଧିକାରୀଙ୍କ ଦ୍ୱାରସ୍ଥ ହେଉଥିଲେ ହେଁ କେବଳ ମିଥ୍ୟା ପ୍ରତିଶ୍ରୁତି ଛଡ଼ା ଅନ୍ୟ କିଛି ଲାଭ ମିଳୁ ନ ଥିବା ମତପ୍ରକାଶ ପାଇଛି।
କେନ୍ଦ୍ର ସରକାରଙ୍କ ୭୦ ପ୍ରତିଶତ ଏବଂ ରାଜ୍ୟ ସରକାରଙ୍କ ୩୦ ପ୍ରତିଶତ ଆର୍ଥିକ ସହାୟତାରେ ଦୀନଦୟାଲ ଗ୍ରାମଜ୍ୟୋତି ଯୋଜନା ୨୦୧୭ରେ ଆରମ୍ଭ ହୋଇଥିଲା। ଦିଲ୍ଲୀର ବିନ୍ଧ୍ୟ ଟେଲିଲିଙ୍କସ୍ ଲିମିଟେଡ(ଭିଟିଏଲ୍) କମ୍ପାନୀକୁ ଏହି କାର୍ଯ୍ୟ ସମ୍ପାଦନ ପାଇଁ ଅନୁମତି ମିଳିଥିଲା। ଯାଜପୁର ସମେତ ମୟୂରଭଞ୍ଜ, କେନ୍ଦୁଝର, ଭଦ୍ରକ, ବାଲେଶ୍ୱର ଜିଲା ପାଇଁ ଏହି ପ୍ରକଳ୍ପ କାର୍ଯ୍ୟ ଆରମ୍ଭ ହୋଇ ୨୦୨୦ରେ ଶେଷ ହୋଇଥିଲା। ତେବେ ଏହି ଯୋଜନାରେ ପ୍ରାୟ ୨ଶହରୁ ଊର୍ଦ୍ଧ୍ୱ ଶ୍ରମିକ ଓ ଛୋଟ ଠିକାଦାର ବିଭିନ୍ନ କାର୍ଯ୍ୟରେ ନିୟୋଜିତ ଥିଲେ। ତନ୍ମଧ୍ୟରୁ ପ୍ରାୟ ୨୨ଜଣ ଶ୍ରମିକ ଓ ଠିକାଦାରଙ୍କୁ ବକେୟା ପାଉଣା ପ୍ରଦାନ ନ କରି ଦିଲ୍ଲୀର ଠିକାସଂସ୍ଥା ଇତିମଧ୍ୟରେ ୨ୟ ପର୍ଯ୍ୟାୟ କାର୍ଯ୍ୟ କରିବା ଆରମ୍ଭ କରି ଦେଇଥିବା ଅଭିଯୋଗ ହୋଇଛି। ୨ୟ ପର୍ଯ୍ୟାୟରେ ଏହି ଠିକାସଂସ୍ଥା ବର୍ତ୍ତମାନ ଯାଜପୁର ଜିଲାର ପାଣିକୋଇଲି ନିକଟସ୍ଥ ସାହାପୁର, ବୈତରଣୀ ରୋଡ୍, ସିଂହପୁର ଓ ବରୀ ପ୍ରଭୃତି ଅଞ୍ଚଳରେ ନୂତନ ବିଦ୍ୟୁତ୍ ଷ୍ଟ୍ରକ୍ଚର ନିର୍ମାଣ କାର୍ଯ୍ୟ ଜାରି ରଖିଛି। ପୂର୍ବରୁ ଏହି ପ୍ରକଳ୍ପ ପାଇଁ ୩୬୩କୋଟି ଟଙ୍କା ମଞ୍ଜୁର ହୋଇଥିଲା। ହେଲେ ଗୋଟିଏ ପଟେ ଭିଟିଏଲ୍ ଠିକାସଂସ୍ଥା ଶ୍ରମିକ ଓ ଠିକାଦାରଙ୍କୁ ଠକିଥିବା ଅଭିଯୋଗ ହୋଇଥିବାବେଳେ ଅନ୍ୟପଟେ ବିପିଏଲ୍ ଉପଭୋକ୍ତାମାନେ ବିଦ୍ୟୁତ୍ ସଂଯୋଗ ପାଇଁ ଚାହିଁ ରହିଛନ୍ତି। ଏଥିରେ ଅଧିକାଂଶ ଯୋଗ୍ୟ ଉପଭୋକ୍ତାଙ୍କୁ ବର୍ତ୍ତମାନ ପର୍ଯ୍ୟନ୍ତ ବିଦ୍ୟୁତ୍ ସେବା ମିଳିପାରି ନ ଥିବାବେଳେ କେତେଜଣ ଥିଲାବାଲା ଲୋକ ଏହାର ଫାଇଦା ନେଉଥିବା ଅଭିଯୋଗ ହେଉଛି। ଏହାବାଦ୍ ଏହି ପ୍ରକଳ୍ପରେ ବ୍ୟବହୃତ ବିଦ୍ୟୁତ ତାର ଓ ଅନ୍ୟାନ୍ୟ ସାଜ ସରଞ୍ଜାମ ନିମ୍ନମାନର ବୋଲି ସାଧାରଣରେ ଅଭିଯୋଗ ହେଉଛି। ଫଳରେ ଏହି ପ୍ରକଳ୍ପ ନାମରେ ବିପୁଳ କୋଟି ଟଙ୍କା ହରିଲୁଟ ହୋଇଥିବା କୁହାଯାଇଛି। ଓପିଟିସିଏଲ୍ ଓ ଟିପିଏନଏଓଡିଏଲ କର୍ତ୍ତୃପକ୍ଷ ବିନା ଯାଞ୍ଚରେ ଠିକାସଂସ୍ଥା ଭିଟିଏଲ୍କୁ ଯୋଜନାର ଅଧିକାଂଶ ଅର୍ଥ ପ୍ରଦାନ କରିଥିବାବେଳେ ଶ୍ରମିକ ଠିକାଦାରମାନଙ୍କୁ କାହିଁକି ସେମାନଙ୍କ ପ୍ରାପ୍ୟ ପ୍ରଦାନ କରାଯାଇନାହିଁ କିମ୍ବା ସଂସ୍ଥା ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ ବୋଲି ସେମାନେ ପ୍ରଶ୍ନ ଉଠାଇଛନ୍ତି। ସେମି ଠିକାଦାରମାନେ କାର୍ଯ୍ୟ ଅନୁସାରେ ସେମାନଙ୍କ ଅର୍ଥ ପାଇପାରି ନ ଥିବାରୁ ଶ୍ରମିକମାନଙ୍କୁ ସେମାନଙ୍କ ପ୍ରାପ୍ୟ ଦେଇପାରିନାହାନ୍ତି ବୋଲି ସଫେଇ ଦେଉଛନ୍ତି। ଫଳରେ ସେତେବେଳେ କାର୍ଯ୍ୟ କରିଥିବା ଶ୍ରମିକମାନେ ସେମାନଙ୍କ ପାଉଣା ନ ପାଇ ଭୋକଉପାସରେ କାଳ କାଟୁଛନ୍ତି ବୋଲି ଅଭିଯୋଗ କରିଛନ୍ତି। ଏପରିକି ସଂସ୍ଥାର ବରିଷ୍ଠ କନିଷ୍ଠ ଯନ୍ତ୍ରୀ, ଅଧିକାରୀମାନେ ଏମାନଙ୍କୁ ଦେଖାଦର୍ଶନ ନ ଦେଇ ପ୍ରାପ୍ୟ ରାଶି ଫାଙ୍କିବାକୁ ପଛାଇନାହାନ୍ତି । ଫଳରେ ସମ୍ପୃକ୍ତ ଶ୍ରମିକ ଓ ଠିକାଦାରଙ୍କ ମଧ୍ୟରେ ଦିନକୁ ଦିନ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। ନିଜର ପ୍ରାପ୍ୟରାଶି ଅସୁଲ କରିବାକୁ ଯାଇ ଏହି ଶ୍ରମିକ ଓ ଠିକାଦାରମାନେ ଯାଜପୁର ଜିଲାର ପାଣିକୋଇଲି ଠାରେ ଥିବା ଉକ୍ତ ସଂସ୍ଥାର ଷ୍ଟକ ୟାର୍ଡରେ ପୂର୍ବରୁ ଏକାଧିକ ଥର ତାଲା ପକାଇ ଦେଇଥିଲେ । ଅପରପକ୍ଷେ ସମ୍ପୃକ୍ତ ସଂସ୍ଥା ବକେୟା ଅର୍ଥରାଶି ପଇଠ ନକରି ଓଲଟି ଆନ୍ଦୋଳନକାରୀଙ୍କ ନାମରେ ପାଣିକୋଇଲି ଥାନାରେ ଲିଖିତ ଅଭିଯୋଗ କରିବାକୁ ପଛାଇ ନ ଥିଲା। ମାତ୍ର ପୋଲିସ ସମ୍ପୃକ୍ତ ସଂସ୍ଥାର ତ୍ରୁଟି ସମ୍ପର୍କରେ ଅବଗତ ହେବା ପରେ ସମସ୍ୟାର ସମାଧାନ କରିବାକୁ ଉଦ୍ୟମ ଜାରି ରଖିଥିବା ସୂଚନା ମିଳିଛି। ଏବେ ମାମଲା ଥାନାରେ ପହଞ୍ଚିବା ପରେ ଶ୍ରମିକ ଓ ଠିକାଦାରଙ୍କ ଦେୟ ପଇଠ କରିବାକୁ ଅଣଓଡ଼ିଆ ଠିକାସଂସ୍ଥା ପକ୍ଷରୁ ତାରିଖ ପରେ ତାରିଖ ଦିନ ଧାର୍ଯ୍ୟ କରାଯାଉଛି, ହେଲେ ଏଯାଏ ତାହା ଫଳପ୍ରଦ ହୋଇପାରିନାହିଁ। ଯେଉଁଥିପାଇଁ ବକେୟା ପାଉଣା ପାଇବା ଆଶାରେ ଶ୍ରମିକ ଓ ଠିକାଦାରମାନେ ଥାନାକୁ ଦୌଡ଼ି ଦୌଡ଼ି ନୟାନ୍ତ ହୋଇ ପଡ଼ିଲେଣି ବୋଲି ଅଭିଯୋଗ ହେଉଛି। ଏ ସଂକ୍ରାନ୍ତରେ ଯାଜପୁର ରୋଡ୍ ଟାଟା ପାୱାର ଡିଭିଜନର ନିର୍ବାହୀ ଯନ୍ତ୍ରୀ ପ୍ରମୋଦ କୁମାର ନାୟକଙ୍କ ମତାମତ ନେବାକୁ ତାଙ୍କ ମୋବାଇଲ ଫୋନକୁ ଶନିବାର ସନ୍ଧ୍ୟାରେ ଯୋଗାଯୋଗ କରିଥିଲେ ହେଁ ସେ ଫୋନ କଲ୍ ଗ୍ରହଣ କରି ନଥିଲେ।
