ଠାକୁରମୁଣ୍ଡା,୪ା୭: ମୟୂରଭଞ୍ଜ ଜିଲା କରଞ୍ଜିଆ ଥାନା ଅଞ୍ଚଳରେ ଡାହାଣୀ ସନ୍ଦେହରେ ଜଣେ ମହିଳାଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି। ଏକ ଧାରୁଆ ଅସ୍ତ୍ରରେ ହତ୍ୟାକାରୀ ମହିଳାଙ୍କ ମୁଣ୍ଡ କାଟି ନେଇଯାଇଥିବା ଜଣାପଡିଛି। ପୋଲିସ ମୁଣ୍ଡବିହୀନ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ମୃତ ମହିଳା ଜଣକ ହେଲେ କରଞ୍ଜିଆ ବ୍ଲକ ପାଟବିଲ ପଞ୍ଚାୟତ ଅଧୀନ ବାଲିଭୋଳ ଗ୍ରାମର ସ୍ବର୍ଗତ ଚୈତନ୍ୟ ହାଁସଦାଙ୍କ ସ୍ତ୍ରୀ ଯମୁନା(୬୩)। ଏହି ଘଟଣାରେ ପୋଲିସ ୨ ଜଣଙ୍କୁ ଅଟକ ରଖି ପଚରାଉଚୁରା କରୁଛି।
ପୋଲିସ ସୂଚନା ଅନୁଯାୟୀ, ଶନିବାର ପୁଅ ଲକ୍ଷ୍ମଣ ହାଁସଦା ଓ ବୋହୂଙ୍କ ସହ ବୃଦ୍ଧା ଯମୁନା ନିକଟସ୍ଥ ବାଲିଭୋଳ ହାଟକୁ ଯାଇଥିଲେ। ସେଠାରେ ସେ ହାଣ୍ଡିଆ ପିଇ ହାଟପଡ଼ିଆର ଗୋଟିଏ ପାର୍ଶ୍ୱରେ ଶୋଇପଡିଥିଲେ। ହାଟ ସରିବା ପରେ ପୁଅ ବୋହୂ ତାଙ୍କୁ ଉଠାଇବାକୁ ଚେଷ୍ଟା କରି ବିଫଳ ହୋଇଥିଲେ। ସେଠାରେ ସେ ରାତିଯାକ ରହିଥିଲେ। ରବିବାର ସକାଳେ ଲକ୍ଷ୍ମଣ ମା’ଙ୍କୁ ଆଣିବାକୁ ଯାଇଥିବା ବେଳେ ତାଙ୍କ ମୁଣ୍ଡ କାଟି କେହି ହତ୍ୟା କରିଥିବା ଦେଖିବାକୁ ପାଇଥିଲେ। ଖବରପାଇ କରଞ୍ଜିଆ ଥାନା ଆଇଆଇସି ରଞ୍ଜନ ସେଠୀ ଏବଂ ଏସ୍ଡିପିଓ ସୁଦର୍ଶନ ଗାଙ୍ଗଇ ସାଇଣ୍ଟିଫିକ୍ ଟିମ୍ ଓ ସନ୍ଧାନୀ କୁକୁର ସହ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛନ୍ତି। ଏନେଇ ଥାନାରେ ଏକ ହତ୍ୟା ମାମଲା(ନଂ.୧୭୭/୨୧) ରୁଜୁ ହୋଇଛି। ଲକ୍ଷ୍ମଣଙ୍କ ଅଭିଯୋଗ ଅନୁଯାୟୀ ଗତ ଏକ ସପ୍ତାହ ପୂର୍ବରୁ ନିକଟସ୍ଥ ଜାମୁନାଳିଆ ଗ୍ରାମକୁ ଏକ ଶୁଦ୍ଧିକ୍ରିୟା କାମରେ ଯାଇଥିବା ବେଳେ ସେଠାରେ କେତେଜଣ ଲୋକଙ୍କ ସହ ଯମୁନାଙ୍କ ଝଗଡ଼ା ହୋଇଥିଲା। ୨ ଦିନ ତଳେ କିଛି ବ୍ୟକ୍ତି ଯମୁନାଙ୍କୁ ଆକ୍ରମଣ କରିଥିଲେ। ତେବେ ଡାହାଣୀ ସନ୍ଦେହରେ ଯମୁନାଙ୍କୁ ହତ୍ୟା କରାଯାଇଥିବା ସନ୍ଦେହ କରି ତଦନ୍ତ କରାଯାଉଥିବା ଆଇଆଇସି ସେଠୀ କହିଛନ୍ତି।
