ଚୌଦ୍ୱାର,୧୨।୧୨(ଡି.ଏନ୍.ଏ.): ୫୫ନମ୍ବର ଜାତୀୟ ରାଜପଥର ଚୌଦ୍ୱାର ପୌରାଞ୍ଚଳ ଅନ୍ତର୍ଗତ ଧୂମାବତୀ ଛକ ରାସ୍ତା ମଝିରେ ଶୁକ୍ରବାର ଜଣେ ମହିଳାଙ୍କ ଉନ୍ମତ୍ତକାଣ୍ଡ ଦେଖିବାକୁ ମିଳିଛି। ଏଥିଯୋଗୁ ରାସ୍ତା ଉଭୟ ପାର୍ଶ୍ୱରେ ଶହଶହ ଗାଡ଼ି ମୋଟର ଅଧଘଣ୍ଟାଏ ପର୍ଯ୍ୟନ୍ତ ଯାତାୟାତରେ ବାଧାପ୍ରାପ୍ତ ହୋଇଥିଲା। ଶୁକ୍ରବାର ଅପରାହ୍ନ ୪ଟାରେ ଜଣେ ମହିଳା ହଠାତ୍ ପାଟିତୁଣ୍ଡ କରିବା ସହ ରାସ୍ତା ମଝିରେ ଶୋଇ ଯାଇଥିଲେ। ଫଳରେ ଉକ୍ତ ରାସ୍ତାରେ ଗାଡ଼ି ଚଳାଚଳ ବନ୍ଦ ହୋଇ ଯାଇଥିଲା। ଘଟଣା ସମ୍ପର୍କରେ ଖବରପାଇ ସ୍ଥାନୀୟ ଲ’ ସଂଗଠନର ସଦସ୍ୟ ମାନସ ସାହୁ ଓ ଧନେଶ୍ୱର ସାହୁ ପହଞ୍ଚତ୍ ମହିଳାଙ୍କୁ ବୁଝାଶୁଝା କରି ରାସ୍ତାରୁ ଉଠାଇବା ପରେ ଗାଡ଼ି ଚଳାଚଳ ସ୍ବାଭାବିକ ହୋଇଥିଲା। ମହିଳା ଜଣକ ହେଲେ ଭୁବନେଶ୍ୱର ଶହୀଦ୍ ନଗର ତାରିଣୀ ବଜାରର ଲକ୍ଷ୍ମୀ ହରିପାଳ। ତାଙ୍କ କହିବା ଅନୁଯାୟୀ, ତାଙ୍କ ସ୍ବାମୀ ନିର୍ଯାତନା ଦେବାରୁ ଶୁକ୍ରବାର ସେ ଆଠଗଡ଼ସ୍ଥିତ ଶାଶୁଘରୁ ଅଟୋରିକ୍ସାରେ ଯାଉଥିଲେ। ତେବେ ଧୂମାବତୀ ଛକ ପାଖରେ ଅଟୋ ଡ୍ରାଇଭର ଜଣକ ତାଙ୍କୁ ମାଡ଼ମାରି ତାଙ୍କର ବ୍ୟାଗ୍ ଓ ମନିପର୍ସ ଛଡ଼ାଇନେଇ ରାସ୍ତା ଉପରେ ଓହ୍ଲାଇଦେଇ ଚାଲି ଯାଇଥିଲେ। ଲ’ ସଂଗଠନର ସଦସ୍ୟମାନେ ତାଙ୍କ ପାଇଁ ଖାଦ୍ୟପେୟର ବ୍ୟବସ୍ଥା କରିବା ସହ ତାଙ୍କୁ ବସ୍ରେ ଭୁବନେଶ୍ୱର ପଠାଇଥିଲେ।
