ଯାଜପୁର ଟାଉନ, ୧୭ା୧(ଡି.ଏନ.ଏ.):ଯାଜପୁର ସହର କୁସୁମା ରୋଡ୍ ଶୀତଳେଶ୍ୱର ଗ୍ରାମର କୋରେଶା ବିବି ନାମକ ଜଣେ ସଂଖ୍ୟାଲଘୁ ମହିଳା ସୋମବାର ଯାଜପୁର ଜିଲାପାଳଙ୍କ ଜରିଆରେ ରାଷ୍ଟ୍ରପତିଙ୍କୁ ଇଚ୍ଛାମୃତ୍ୟୁ ପାଇଁ ଆବେଦନ କରିଛନ୍ତି। କୋରେଶା ଜିଲା ପ୍ରଶାସନ ଓ ପୌରପ୍ରଶାସନ ଜୁଲମ୍ ସହି ନ ପାରି ଏହି ପଦକ୍ଷେପ ନେଇଥିବା କହିଛନ୍ତି। କୋରେଶା ଓ ତାଙ୍କ ଏକମାତ୍ର ଝିଅକୁ ଇଚ୍ଛାମୃତ୍ୟୁ ପ୍ରଦାନ କରିବା ପାଇଁ ଉପଜିଲାପାଳଙ୍କୁ ସେ ଦାବିପତ୍ର ପ୍ରଦାନ କରିଛନ୍ତି।
ସୂଚନାଯୋଗ୍ୟ, ଯାଜପୁର ସହରର କୁସୁମା ସମ୍ମୁଖରେ ବହୁତଳବିଶିଷ୍ଟ ପ୍ରଶାସନିକ ଭବନ ନିର୍ମାଣ ପାଇଁ ପ୍ରଶାସନ ପକ୍ଷରୁ ଜମି ଅଧିଗ୍ରହଣ କରାଯାଉଛି। କୋରେଶାଙ୍କ ସେଠାରେ ଏକ ଘର ରହିଛି। ସେହି ଘରେ ସେ ଏକ ବ୍ୟବସାୟ ପ୍ରତିଷ୍ଠାନ ଖୋଲି ନିଜର ପରିବାର ପ୍ରତିପୋଷଣ କରିଆସୁଛନ୍ତି। ମାତ୍ର ରାସ୍ତା ସମ୍ପ୍ରସାରଣ ପାଇଁ ଜିଲା ପ୍ରଶାସନ ତାଙ୍କର ପ୍ଲଟ୍ ନଂ.୪୦୬/୧୪୪୭ ଏବଂ ଖାତା ନଂ.୫୦୩/୩୦୫ରେ ଥିବା ଜାଗା ଓ ଘରକୁ ଜମି ଅଧିଗ୍ରହଣ ନିୟମ ଅନୁଯାୟୀ ନ ନେଇ ସିଧାସଳଖ କ୍ରୟ କରିବା ପାଇଁ ଚାହୁଁଛି। ଏଥିରେ ତାଙ୍କୁ ଉଚିତ ପ୍ରାପ୍ୟ ମିଳିନାହିଁ ବୋଲି କୋରେଶା ଅଭିଯୋଗ କରିଛନ୍ତି। ତାଙ୍କ ଘରକୁ ଜମି ଅଧିଗ୍ରହଣ ନିୟମ ଅନୁଯାୟୀ ନେବା ପାଇଁ ପ୍ରଶାସନକୁ ବହୁବାର ଅନୁରୋଧ କଲାପରେ ମଧ୍ୟ ପ୍ରଶାସନ ଏଥିପ୍ରତି କର୍ଣ୍ଣପାତ କରୁନାହିଁ। ଯାହା ଫଳରେ ତାଙ୍କର ବହୁ କ୍ଷତି ହେବାର ସମ୍ଭାବନା ଅଛି ବୋଲି ସେ ପ୍ରକାଶ କରିଛନ୍ତି। ଫଳରେ ପ୍ରଶାସନର ଜୁଲମରୁ ଅତିଷ୍ଠ ହୋଇ ରାଷ୍ଟ୍ରପତି ତାଙ୍କୁ ଏବଂ ତାଙ୍କ ଝିଅକୁ ଇଚ୍ଛାମୃତ୍ୟୁ ପାଇଁ ଅନୁମତି ଦେବାକୁ ଜିଲାପାଳଙ୍କ ମାଧ୍ୟମରେ ସେ ଅନୁରୋଧ କରିଛନ୍ତି।
