ଆଙ୍କରା,୪।୨: ତୁର୍କୀର ଜଣେ ମହିଳା ତାଙ୍କ ସ୍ବାମୀଙ୍କୁ ଗୁଳି କରି ହତ୍ୟା କରିଛନ୍ତି। କାରଣ ଗତ ୧୦ ବର୍ଷରୁ ଅଧିକ ହେବ ସେ ମାନସିକ,ଶାରୀରିକ ଏବଂ ବଳାତ୍କାର ପରି ନିର୍ଯାତନାର ଶିକାର ହୋଇଆସୁଛନ୍ତି। ଏପରିକି ସ୍ବାମୀ ତାଙ୍କୁ ଜୀବନରୁ ମାରି ଦେବା ପାଇଁ ବାରମ୍ବାର ଧମକାଉଥିଲେ। ତାଙ୍କ ଜୀବନ ପ୍ରତି ବିପଦ ଥିବାରୁ ସେ ସ୍ବାମୀଙ୍କୁ ଗୁଳି କରିଥିବା ପୋଲିସ ନିକଟରେ ସ୍ବୀକାର କରିଛନ୍ତି।
ତୁର୍କୀର ଆଣ୍ଟାଲ୍ୟା ସହରରେ ରହୁଥିବା ୩୧ ବର୍ଷୀୟା ମେଲେକ ଇପେକଙ୍କ ରମଜାନ ଅବସରରେ ବିବାହ ହୋଇଥିଲା। ରିପୋର୍ଟ ଅନୁଯାୟୀ ମେଲେକ ୧୨ ବର୍ଷ ତଳେ ବିବାହ କରିଥିଲେ। ସ୍ବାମୀ ତାଙ୍କୁ ମାରପିଟ୍ କରିବା ସହ ନିର୍ଯାତନା ଦେଇ ଆସୁଥିଲେ। ଏପରିକି ତାଙ୍କୁ ଘରେ ବାନ୍ଧି ବଳାତ୍କାର କରୁଥିଲେ। ଏ ବିଷୟରେ କାହାକୁ ଜଣାଇଲେ ଜୀବନରେ ମାରି ଦେବାକୁ ଧମକାଉଥିଲେ। ତେଣୁ ପୋଲିସ ନିକଟକୁ ଯିବା ପାଇଁ ସେ ଭୟ କରୁଥିଲେ।
ମେଲକ ଅଭିଯୋଗ କରିଛନ୍ତି, ତାଙ୍କ ସ୍ବାମୀ କହୁଥିଲେ ତୁମକୁ କେହି ରକ୍ଷା କରିପାରିବେ ନାହିଁ। ଯଦି ମୋତେ ପୋଲିସରେ ଦିଅ ତେବେ ଜେଲ୍ରୁ ଫେରିବା ପରେ ତୁମକୁ ଏବଂ ପିଲାଙ୍କୁ ମାରିଦେବି।
ମେଲକ ପୋଲିସ ନିକଟରେ କହିଛନ୍ତି, ମୋ ସ୍ବାମୀଙ୍କୁ ମାରିବାକୁ ମୁଁ ଚାହୁଁ ନ ଥିଲି। ମାତ୍ର ମୋ ନିକଟରେ କୌଣସି ଉପାୟ ନ ଥିଲା। ଯଦି ମୁଁ ତାଙ୍କୁ ମାରି ନ ଥାନ୍ତି ସେ ମୋତେ ଏବଂ ଦୁଇ ପିଲାଙ୍କୁ ଜୀବନରେ ମାରି ଦେଇଥାନ୍ତେ।
