ଓ୍ବେଲିଂଟନ, ୧୩ା୧୨ (ଏପି)- କାଇଲ ଜେମିସନ୍ଙ୍କ ଉଚ୍ଚକୋଟୀର ବୋଲିଂ ଯୋଗୁ ସ୍ଥାନୀୟ ରିଜର୍ଭ ବେସିନ୍ଠାରେ ଚାଲିଥିବା ନ୍ୟୁଜିଲାଣ୍ଡ ବିପକ୍ଷ ଦ୍ୱିତୀୟ କ୍ରିକେଟ ଟେଷ୍ଟରେ ଓ୍ବେଷ୍ଟଇଣ୍ଡିଜ ଫଲୋଅନ୍ର ସମ୍ମୁଖୀନ ହୋଇଛି। ଜେମିସନ ମାତ୍ର ୩୪ରନ ବିନିମୟରେ ୫ଉଇକେଟ ଅକ୍ତିଆର କରିଥିଲେ। ଫଳରେ ଘରୋଇ ଦଳର ପ୍ରଥମ ଇନିଂସ ସ୍କୋର ୪୬୦ ଜବାବରେ ଭ୍ରମଣକାରୀ ଦଳ ଶନିବାର ଦ୍ୱିତୀୟ ଦିନ ଖେଳ ଶେଷ ସୁଦ୍ଧା ୮ ଉଇକେଟ ବିନିୟମରେ ୧୨୪ ରନ କରିଛି। ଫଲୋଅନ ଏଡାଇବା ଲାଗି ଓ୍ବେଷ୍ଟଇଣ୍ଡିଜକୁ ଆହୁରି ୧୩୬ ରନ ଆବଶ୍ୟକ ରହିଥିବାବେଳେ ହାତରେ ଆଉ ମାତ୍ର ଦୁଇଟି ଉଇକେଟ ରହିଛି। ଉଇକେଟକିପର ଜୋଶୁଆ ଡା’ ସିଲ୍ଭା ୨ ଏବଂ ଚେମର ହୋଲ୍ଡର ୫ ରନ କରି ଅପରାଜିତ ରହିଛନ୍ତି।
ଓ୍ବେଷ୍ଟଇଣ୍ଡିଜ ଦଳର ବ୍ୟାଟିଂ ବିପର୍ଯ୍ୟୟ ଘଟାଇଥିବା ଜେମିସନ ମାତ୍ର ୫ଟି ଟେଷ୍ଟ ମ୍ୟାଚରେ ଏଥରକୁ ମିଶାଇ ଦୁଇଥର ୫ ଉଇକେଟ ସଫଳତା ହାସଲ କରିଛନ୍ତି। ତାଙ୍କ ସଂକ୍ଷିପ୍ତ ଟେଷ୍ଟ କ୍ୟାରିୟରରେ ସେ ଏପର୍ଯ୍ୟନ୍ତ ଗୋଟିଏ ଅର୍ଦ୍ଧଶତକ ହାସଲ କରିଥିବା ବେଳେ ଦୁଇଟି ଇିନଂସରେ ୪୦ କିମ୍ବା ତା’ଠାରୁ ଅଧିକ ରନ ସଂଗ୍ରହ କରି ନିଜକୁ ଜଣେ ଅଲରାଉଣ୍ଡର ଭାବେ ପ୍ରତିଷ୍ଠା କରିବା ଦିଗରେ ଅଗ୍ରସର ହେଉଛନ୍ତି। ଜେମିସନ୍ ଶନିବାର ତାଙ୍କର ଓପନିଂ ଓଭରରେ କ୍ରମାଗତ ଦୁଇଟି ଡେଲିଭରିରେ ଦୁଇଜଣକୁ ଆଉଟ କରିବା ପରେ ତାଙ୍କ ପରବର୍ତ୍ତୀ ବଲ୍ରେ ସେ ଏଲ୍ବିଡବ୍ଲ୍ୟୁ ଅପିଲ କରି ବିଫଳ ହୋଇଥିଲେ। ସେ ଅଳ୍ପକେ ହ୍ୟାଟ୍ରିକ୍ରୁ ବଞ୍ଚତ୍ତ ହୋଇଥିଲେ। ସେ ବିପକ୍ଷ ଦଳର ଟପ୍ ସ୍କୋରର ଜର୍ମେନ ବ୍ଲାକ୍ଉଡ୍ (୬୯)ଙ୍କ ଉଇକେଟ ବ୍ୟତୀତ ଜନ୍ କ୍ୟାମ୍ପବେଲ (୧୪), ସାମରା ବ୍ରୁକ୍ସ (୧୪), ରୋଷ୍ଟନ ଚେଜ୍ (୦), ଅଧିନାୟକ ଜାସନ ହୋଲ୍ଡର (୯) ଏବଂ ଅଲଜାରି ଜୋଶେଫ୍ (୦)ଙ୍କୁ ଆଉଟ କରିଥିଲେ। ୫ମ ଉଇକେଟରେ ଜର୍ମେନ ବ୍ଲାକଉଡ୍ ଏବଂ ସାମରା ବ୍ରୁକ୍ସଙ୍କ ମଧ୍ୟରେ ୬୮ରନର ପାର୍ଟନରଶିପକୁ ସେ ଭାଙ୍ଗି ଦେଇଥିଲେ। ପୂର୍ବରୁ ସକାଳେ ପୂର୍ବଦିନର ଅସମାପ୍ତ ସ୍କୋର ୨୯୪/୬ ରୁ ବ୍ୟାଟିଂ ଆରମ୍ଭ କରିଥିବା ନ୍ୟୁଜିଲାଣ୍ଡ ଆଉ ୧୬୬ରନ ଯୋଗକରି ଅବଶିଷ୍ଟ ୪ଉଇକେଟ ହରାଇଥିଲା। ୧୧୭ରନ କରି ଅପରାଜିତ ରହିଥିବା ହେନରି ନିକୋଲ୍ସ ୧୭୪ରନ କରି ଆଉଟ ହୋଇଥିଲେ।
ସଂକ୍ଷିପ୍ତ ସ୍କୋର
ନ୍ୟୁଜିଲାଣ୍ଡ ପ୍ରଥମ ଇନିଂସ: ୪୬୦/ଅଲଆଉଟ ( ହେନରି ନିକୋଲ୍ସ-୧୭୪, ଓ୍ବାଗନର-୬୬, ଓ୍ବିଲ ୟଙ୍ଗ୍-୪୩, ଡେରିଲ ମିଚେଲ-୪୨, ଗାବ୍ରିଲ-୩/୯୩, ଅଲ୍ଜାରି ଯୋଶେଫ୍-୩/୧୦୯, ରୋଷ୍ଟନ ଚେଜ୍-୨/୫୪, ଚେମର ୨/୧୧୦)।
ଓ୍ବେଷ୍ଟଇଣ୍ଡିଜ ପ୍ରଥମ ଇନିଂସ: ୧୨୪/୮ (ଜର୍ମେନ ବ୍ଲାକ୍ଉଡ୍-୬୯, ଜେମିସନ-୫/୩୪, ଟିମ୍ ସୌଦି-୩/୨୯)।
