ନୂଆଦିଲ୍ଲୀ: ଭାରତୀୟ ଅର୍ଥ ବ୍ୟବସ୍ଥାରେ ଏବେ ସୁଧାର ପରିଲକ୍ଷିତ ହେଉଛି। ଦେଶରେ ବିଭିନ୍ନ କ୍ଷେତ୍ର ଉତ୍ସାହଜନକ ସ୍ଥିତିକୁ ଫେରୁଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର କହିଛନ୍ତି। ଫେଡେରେଶନ ଅଫ୍ ଇଣ୍ଡିଆନ ଚାମ୍ବର୍ସ ଅଫ୍ କମର୍ସ ଆଣ୍ଡ ଇଣ୍ଡଷ୍ଟ୍ରି(ଫିକି) ୯୩ତମ ଭର୍ଚୁଆଲ ବାର୍ଷିକ ସାଧାରଣ ବୈଠକକୁ ସମ୍ବୋଧିତ କରି ସେ କହିଛନ୍ତି, ୨୦୨୦ ଭାରତ ଲାଗି ବହୁ ଘଟଣାବହୁଳ। ଦେଶ ଅନେକ ଉତ୍ଥାନ ପତନ ସାମ୍ନା କରିଛି। ଅର୍ଥ ବ୍ୟବସ୍ଥାରେ ସୁଧାର ଆଣିବା ଲାଗି ସରକାର ରୋଡ୍ମ୍ୟାପ ପ୍ରସ୍ତୁତ କରିଛନ୍ତି। ଦେଶର ସ୍ଥିତିରେ ସୁଧାର ଦ୍ରୁତଗାମୀ ହେଉଥିବା ସେ ସ୍ପଷ୍ଟ କରିଛନ୍ତି।
ଏହି ଅବସରରେ ମୋଦି ଫିକିର ଭର୍ଚୁଆଲ ଆନୁଆଲ ଏକ୍ସପୋକୁ ମଧ୍ୟ ଶୁଭାରମ୍ଭ କରି କହିଛନ୍ତି, ଉଦ୍ୟୋଗୀ, କୃଷକ, ଯୁବକ ଏବଂ ଲୋକଙ୍କ ଲାଗି ଋଣ ବ୍ୟବସ୍ଥା ଉପରେ ସରକାର କାର୍ଯ୍ୟକ୍ରମ ଜାରି ରଖିଛନ୍ତି। ଏଭଳି ସମୟରେ ଘରୋଇ ବଜାରର ଚାହିଦା ପୂରଣ ଲାଗି ଦେଶର ଘରୋଇ କ୍ଷେତ୍ର ସକ୍ଷମ ହେବା ସହ ବିଶ୍ୱସ୍ତରରେ ଏକ ପରିଚୟ ତିଆରି କରିପାରିଛି। ଟେକ୍ନୋଲୋଜି ଭିତ୍ତିକ ଶିଳ୍ପ କ୍ଷେତ୍ର ଦ୍ୱାରା ଭାରତକୁ ଆହୁରି ପ୍ରତିଦ୍ୱନ୍ଦ୍ୱୀ କରାଇବାକୁ ମୋଦି ଆହ୍ବାନ ଜଣାଇଛନ୍ତି। ମହାମାରୀ ସମୟରେ ବ୍ୟାଙ୍କ ଖାତାରେ ସିଧାସଳଖ ସୁବିଧାର ପ୍ରତ୍ୟକ୍ଷ ହସ୍ତାନ୍ତର(ଡିବିଟି) ଯୋଜନା ଲାଗୁ କରି ଭାରତ ବିଶ୍ୱ ସ୍ତରରେ ଅନେକ ସମ୍ମାନ ଲାଭ କରିଛି। ଜନଧନ, ଆଧାର ଏବଂ ମୋବାଇଲ (ଜାମ୍) ଦ୍ୱାରା ସର୍ବବୃହତ୍ ଡିବିଟି କାର୍ଯ୍ୟକ୍ରମକୁ ନିଶ୍ଚିତ କରାଯାଇଛି। ଏହି କାର୍ଯ୍ୟକ୍ରମ ଦ୍ୱାରା ଗୋଟିଏ କ୍ଲିକ୍ରେ ଦେଶର ପ୍ରତି କୋଣକୁ ଲୋକଙ୍କ ବ୍ୟାଙ୍କ ଖାତାରେ ସିଧାସଳଖ ଅର୍ଥ ଯୋଗାଇ ଦିଆଯାଇଛି ବୋଲି ସେ ମତବ୍ୟକ୍ତ କରିଛନ୍ତି।
ସେ ପୁଣି କହିଛନ୍ତି, ୟୁନାଇଟେଡ୍ ପେମେଣ୍ଟ ଇଣ୍ଟରଫେସ୍(ୟୁପିଆଇ) ପ୍ଲାଟ୍ଫର୍ମରେ ପ୍ରତି ମାସରେ ୪ ଲକ୍ଷ କୋଟି ଟଙ୍କାର ନେଣଦେଣ ହେଉଛି। ଆତ୍ମନିର୍ଭର ଭାରତ କାର୍ଯ୍ୟକ୍ରମ ବିଭିନ୍ନ କ୍ଷେତ୍ରକୁ ଉତ୍ସାହିତ କରିବାରେ ସହାୟକ ହେଉଛି। ଭାରତକୁ ଗ୍ଲୋବାଲ ଚାମ୍ପିୟନ ଭାବେ ଗଢି ତୋଳିବା ଲାଗି ଉତ୍ପାଦନ ସଂଯୋଗୀ ପ୍ରୋତ୍ସାହନ ଯୋଜନା(ପିଏଲ୍ଆଇ)ରେ ବିଭିନ୍ନ କ୍ଷେତ୍ରକୁ ସହାୟତା ଯୋଗାଇ ଦିଆଯାଉଛି। ମହାମାରୀ ସମୟରେ ଦେଶ ଯେଉଁ ଶିକ୍ଷା ଲାଭ କରିଛି ଆଗାମୀ ଦିନରେ ଦୃଢ ଭାବେ ଛିଡ଼ା ହେବାକୁ ଏହା ଶକ୍ତି ଯୋଗାଇବ। ମହାମାରୀ ସମୟରେ ଭାରତ ଜୀବନ ରକ୍ଷାକୁ ପ୍ରାଥମିକତା ଦେଇଛି । ମହାମାରୀ ଯୋଗୁ ବିଭିନ୍ନ ସମସ୍ୟା ଦେଇ ଗତି କରୁଥିବା ବେଳେ ଏହାର ସମାଧାନ ଏବେ ମିଳିଛି ବୋଲି ବୋଲି ସେ ମତବ୍ୟକ୍ତ କରିଛନ୍ତି।
