ବଇଣ୍ଡା,୧୭ା୩(ଡି.ଏନ.ଏ.): କିଶୋରନଗର ବ୍ଲକ ବଇଣ୍ଡାଠାରେ ନୂତନ ପ୍ରାଣୀ ଚିକିତ୍ସାକେନ୍ଦ୍ର ନିର୍ମାଣ ହେଉନାହିଁ। ଫଳରେ ରୋଗରେ ପଡ଼ୁଥିବା ବହୁ ସଂଖ୍ୟକ ଗୃହପାଳିତ ପ୍ରାଣୀଙ୍କ ଚିକିତ୍ସା ହୋଇପାରୁ ନାହିଁ। ଏ ନେଇ ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ବଢ଼ୁଥିବାବେଳେ ବଇଣ୍ଡାଠାରେ ଏକ ପ୍ରାଣୀ ଚିକିତ୍ସାଳୟ ନିର୍ମାଣ ପାଇଁ ବଇଣ୍ଡା ଗ୍ରାମବାସୀ ବୁଧବାର ଅନୁଗୋଳ ଜିଲାପାଳଙ୍କଠାରେ ଅଭିଯୋଗ କରିଛନ୍ତି।
ଗ୍ରାମବାସୀ ଦର୍ଶାଇଛନ୍ତି, କଟକ-ସମ୍ବଲପୁର ୫୫ ନମ୍ବର ଜାତୀୟ ରାଜପଥର ଅନୁଗୋଳ ଜିଲା କିଶୋରନଗର ବ୍ଲକସ୍ଥିତ ବଇଣ୍ଡାଠାରେ ଏକ ପ୍ରାଣୀ ଚିକିତ୍ସାକେନ୍ଦ୍ର ସ୍ଥାପନ ହୋଇଥିଲା। ଏହା ଉପରେ ବଇଣ୍ଡା, ନୁନୁକାପଶି, କଦଳୀମୁଣ୍ଡା, ଗାଁ ବଇଣ୍ଡା, ଶରଧାମୁଣ୍ଡା, ଆନଦମୁଣ୍ଡା, ବଡହୁଲା, ସାନଗୋବିନ୍ଦପୁର ଆଦି ଅଞ୍ଚଳବାସୀ ରଖିଥିବା ଗୋରୁ, ଛେଳି, ମେଣ୍ଢା ଆଦିଙ୍କ ଚିକିତ୍ସା ହେଉଥିଲା। ହେଲେ ଏହି ଡାକ୍ତରଖାନା ୫୫ ନମ୍ବର ଜାତୀୟ ରାଜପଥ ସମ୍ପ୍ରସାରଣ ପାଇଁ ୧୯ ଏପ୍ରିଲ ୨୦୧୯ରେ ଭଙ୍ଗାଯାଇଥିଲା। ସେବେଠାରୁ ଆଉ ନୂତନ ପ୍ରାଣୀ ଡାକ୍ତରଖାନା ନିର୍ମାଣ ହେଉନାହିଁ। ଫଳରେ ୧୦ ହଜାରରୁ ଊର୍ଦ୍ଧ୍ୱ ଗୃହପାଳିତ ପ୍ରାଣୀଙ୍କ ଚିକିତ୍ସା କରାଯାଇପାରୁ ନାହିଁ। ବଇଣ୍ଡା ଓ ଏହାର ଆଖପାଖ ଅଞ୍ଚଳର ଗୋରୁମାନଙ୍କ ଠାରେ କିଛିଦିନ ହେବ ଅଜଣା ରୋଗ ବ୍ୟାପୁଥିବାବେଳେ ହଠାତ ସେମାନଙ୍କ ମୃତ୍ୟୁ ହେଉଛି। ରବିବାର ବଇଣ୍ଡା ଛକରେ ଏକ ଗାଈର ମୃତ୍ୟୁ ହୋଇଛି। ରମେଶ ଚନ୍ଦ୍ର ଟିବୃୱାଲାଙ୍କ ବାଛୁରୀ ମରିଯାଇଛି। କେତେଜଣ ଲୋକ ଅସୁସ୍ଥ ଗୋରୁଙ୍କୁ ନେଇ ୭ କି.ମି. ଦୂର ହଣ୍ଡପା ପ୍ରାଣୀ ଚିକିତ୍ସାକେନ୍ଦ୍ରକୁ ଯାଉଛନ୍ତି। ତୁରନ୍ତ ଜିଲା ପ୍ରଶାସନ ଦୃଷ୍ଟି ଦେଇ ବଇଣ୍ଡାଠାରେ ଏକ ନୂତନ ପ୍ରାଣୀଡାକ୍ତରଖାନା ନିର୍ମାଣ କରିବା ପାଇଁ ବରିଷ୍ଠ ନାଗରିକ ଭଗବାନ ଘିୱାଲା, ରମାକାନ୍ତ ବେହେରା, ସୁନୀଲ ପ୍ରଧାନ, ସୁଧୀର ପ୍ରଧାନ, ମାନସ ସାହୁ, ପରିକ୍ଷିତ ସାହୁ, ଜିତେନ୍ଦ୍ର ବେହେରା, ରମେଶ ଚନ୍ଦ୍ର ଟିବୃୱାଲା, ରମେଶ ବେହେରା, ଦୀପକ ବେହେରା ପ୍ରମୁଖ ଦାବି କରିଛନ୍ତି। ଆଠମଲ୍ଲିକ ଉପଖଣ୍ଡ ଚିକିତ୍ସା ଅଧିକାରୀ ନୀଳାଞ୍ଚଳ ସେନାପତି କହିଛନ୍ତି, ନୁନୁକାପଶି ଅଞ୍ଚଳରେ ପ୍ରାଣୀ ଚିକିତ୍ସାକେନ୍ଦ୍ର ନିର୍ମାଣ ପାଇଁ ଜମି ଚିହ୍ନଟ କରାଯାଇଛି। ଏ ନେଇ ବିଡିଓଙ୍କୁ ଅବଗତ କରାଯାଇଛି।
