ଉମରକୋଟ,୨୮ା୫: ନବରଙ୍ଗପୁର ଜିଲା ଉମରକୋଟ ଗୋଷ୍ଠୀ ସ୍ବାସ୍ଥକେନ୍ଦ୍ରରେ ନବଜାତ ଶିଶୁଙ୍କ ସ୍ବତନ୍ତ୍ର ଯତ୍ନ ନିମନ୍ତେ ରହିଥିବା ସ୍ପେଶିଆଲ ନ୍ୟୁ ବର୍ନ କେୟାର ୟୁନିଟ(ଏସ୍ଏନ୍ସିୟୁ) ରାଜ୍ୟରେ ଶ୍ରେଷ୍ଠ ବିବେଚିତ ହୋଇଛି। ୧୫ଟି ଦିଗରେ ଉନ୍ନତ ପ୍ରଦର୍ଶନକୁ ବିଚାରକୁ ନେଇ ଏହି ସମ୍ମାନ ନିମନ୍ତେ ଚୟନ କରାଯାଇଥାଏ। ଏଥିରେ ଉମରକୋଟ ପ୍ରଥମରେ ରହିଥିବା ଶୁକ୍ରବାର ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ପ୍ରକାଶିତ ବିଜ୍ଞପ୍ତିରୁ ଜଣାପଡ଼ିଛି। ଏହି ସମୀକ୍ଷା ୩ ମାସକୁ ଥରେ କରାଯାଉଥିବା ବେଳେ ଗତଥର ଉମରକୋଟ ଦ୍ୱିତୀୟ ସ୍ଥାନରେ ରହିଥିଲା।
ସୂଚନାଯୋଗ୍ୟ, ୨୦୧୪ରେ ଉମରକୋଟ୍ଠାରେ ଆରମ୍ଭ ହେଇଥିବା ଏହି ବିଭାଗରେ ନବଜାତ ଶିଶୁଙ୍କ ପାଇଁ ୧୨ ଶଯ୍ୟାର ବ୍ୟବସ୍ଥା ରହିଥିଲେ ହେଁ ପ୍ରତିଦିନ ୨୦ ରୁ ୨୫ ଶିଶୁ ଚିକିତ୍ସା ପାଇଁ ଭର୍ତ୍ତି ହେଉଥିବା ଜଣାପଡ଼ିଛି। ଏହି ଏସ୍ଏନ୍ସିୟୁ ଉପରେ ଜିଲାର ଉମରକୋଟ, ରାଇଘର, ଝରିଗାଁ, ଚନ୍ଦାହାଣ୍ଡି ବ୍ଲକରୁ ଶିଶୁ ଚିକିତ୍ସା ପାଇଁ ଭର୍ତ୍ତି ହୋଇଥାନ୍ତି। ବିଶେଷକରି ଜଣ୍ଡିସ୍, ଅଳ୍ପ ଓଜନ କିମ୍ବା ଶ୍ୱାସକ୍ରିୟାଜନିତ ସମସ୍ୟା ଦେଖାଯାଉଥିବା ନବଜାତ ଶିଶୁଙ୍କୁ ଏଠାରେ ରଖି ଚିକିତ୍ସା କରାଯାଇଥାଏ। ଏବେ ଏଠାରେ ଶିଶୁଙ୍କ ପାଇଁ ଅମ୍ଳଜାନ, ୱାର୍ମର, ଫଟୋଥେରାପି ଆଦି ସମସ୍ତ ସୁବିଧା ରହିଛି। ମହତ୍ତ୍ୱପୂର୍ଣ୍ଣ ବିଷୟ ହେଲା ଏହି ବିଭାଗରେ କଙ୍ଗାରୁ ମଦର କେୟାର ୟୁନିଟ ମଧ୍ୟ ରହିଛି। ଏକାସଙ୍ଗେ ୭ ମହିଳା ଏଠାରେ ଶିଶୁଙ୍କୁ ସ୍ତନ୍ୟପାନ କରାଇପାରିବେ। ଏବେ ଏହି ଏସ୍ଏନ୍ସିୟୁରେ ୩ କରୋନା ସଂକ୍ରମିତ ଶିଶୁ ଚିକିତ୍ସିତ ଥିବା ଜଣାପଡ଼ିଛି। ସେମାନଙ୍କୁ ସ୍ବତନ୍ତ୍ର କୋଠରିରେ ରଖି ଚିକିତ୍ସା କରାଯାଉଥିବା ବିଭାଗୀୟ ମୁଖ୍ୟ ତଥା ବରିଷ୍ଠ ଶିଶୁରୋଗ ବିଶେଷଜ୍ଞ ଡା. ସନ୍ତୋଷ କୁମାର ପଣ୍ଡା କହିଛନ୍ତି। ଏଭଳି ସୁବିଧା ରାଜ୍ୟରେ ବଡ଼ ବଡ଼ ମେଡିକାଲ କଲେଜରେ ମଧ୍ୟ କମ୍ ରହିଥିବା ନୂତନ ଡାକ୍ତରୀ ପାଠପଢ଼ା ସାରିଥିବା ଡାକ୍ତରମାନେ କହିଛନ୍ତି। ଉମରକୋଟ ଅଞ୍ଚଳର ଡାକ୍ତର ସନ୍ତୋଷ କୁମାର ପଣ୍ଡା ଏବଂ ୧୦ ଷ୍ଟାଫ୍ନର୍ସଙ୍କ ନିଷ୍ଠାପର ସେବା ହିଁ ଉପାନ୍ତ ଅଞ୍ଚଳର ଏହି ୟୁନିଟ ରାଜ୍ୟରେ ଆଦର୍ଶ ପାଲଟିଥିବା ଜଣାପଡ଼ିଛି।
