ଭୁବନେଶ୍ୱର,୨୩।୩(ବ୍ୟୁରୋ):ଲୋକପ୍ରିୟ ଡିଜେ ଆଜେକ୍ସ ଓରଫ ଅକ୍ଷୟ କୁମାର ମହାରଣାଙ୍କ ଆତ୍ମହତ୍ୟା ଘଟଣାକୁ ବୁଧବାର ୫ଦିନ ବିତିଥିଲେ ମଧ୍ୟ ମାମଲାକୁ ନେଇ ରହସ୍ୟ ଲାଗିରହିଛି। ପ୍ରଥମେ ତ୍ରିକୋଣୀୟ ପ୍ରେମ କାରଣରୁ ଅକ୍ଷୟ ଆତ୍ମହତ୍ୟା କରିଥିଲେ ବୋଲି ଅଭିଯୋଗ ହେଉଥିଲା। ହେଲେ ଏବେ ମାମଲାର ଭିନ୍ନ ଏକ ଦିଗ ସାମ୍ନାକୁ ଆସିଛି। ଆତ୍ମହତ୍ୟା କରିବା ପୂର୍ବରୁ ବାନ୍ଧବୀ ଜିଜ୍ଞାସାଙ୍କୁ ମେଲ୍ ଯୋଗେ ପଠାଯାଇଥିବା ଭଏସ୍ ନୋଟ୍ ଓ ମେସେଜ୍ ଏବେ ଭାଇରାଲ ହେଉଛି। ଜିଜ୍ଞାସାଙ୍କ ଅଣଦେଖାରୁ ଆଜେକ୍ସ ଆତ୍ମହତ୍ୟା କରିଥିଲେ ବୋଲି କୁହାଯାଉଛି। ଆଜେକ୍ସ ଆତ୍ମହତ୍ୟା କରିବା ପୂର୍ବରୁ ତାଙ୍କ କମ୍ପ୍ୟୁଟରରୁ ମେଲ୍ ଯୋଗେ କିଛି ଫଟୋ ସହ ଲେଖା ଓ ଭଏସ୍ ନୋଟ୍ ପଠାଇଥିଲେ। ହେଲେ ସେଗୁଡ଼ିକୁ ଆଜେକ୍ସ ଅଟୋସେଟ୍ କରିଥିବାରୁ ୨୦ତାରିଖରେ ବାନ୍ଧବୀଙ୍କ ପାଖରେ ପହଞ୍ଚତ୍ଥିଲା।
ତେବେ ଏକ ଭଏସ୍ ନୋଟ୍ରେ ଆଜେକ୍ସ କହିଥିଲେ, ଜିଜ୍ଞାସା ମୁଁ ତୁମକୁ ହିଁ ଭଲପାଏ। ହେଲେ ମେଣ୍ଟାଲ୍ ପିସ୍ ପାଇଁ ଅନ୍ୟ କାହା ସହିତ ଗପୁଥିଲି। ଠିକ୍ ଯେମିତି ତୁମେ ତମ ପିସ୍ ପାଇଁ ରଶ୍ମି ସହ ଗପୁଛ। ହେଲେ ଜିଜ୍ଞାସାଙ୍କୁ ସେ ସତରେ ଭଲ ପାଉଥିଲେ ବୋଲି ଆଜେକ୍ସ ଭଏସ୍ ନୋଟ୍ରେ କହୁଛନ୍ତି। ସେହିପରି ବାନ୍ଧବୀଙ୍କୁ ଏକ ଫଟୋ ପଠାଇ ଆଜେକ୍ସ ଲେଖିଥିଲେ, ମୋ ସାଙ୍ଗରେ ତ ଏମିତି କେବେ ଷ୍ଟାଟସ୍ ଦେଲନି। ଏଇଟା ମୋତେ କଷ୍ଟ ହଉଛି, ସପ୍ତାହ ହେଲାଣି ମୁଁ ଶୋଇ ପାରୁନି। ସ୍ଲିପିଂ ଟାବଲେଟ୍ ଖାଉଚି, ମାନସିକ ଚାପରେ ଅଛି। ମୁଁ ଏବେ ଯାଉଛି, ତୁମେ ଖୁସିରେ ରୁହ। ମୁଁ ହାରିଗଲି, ମରିଯାଉଛି। ଯେତେବେଳେ ଝଗଡ଼ା ହୁଏ, ତମେ ମତେ କୁହ ଭୂତ ହୋଇଯାଅ, ଏବେ ସବୁଦିନ ପାଇଁ ଭୂତ ହୋଇଯାଉଛି। ବହୁ ଦୂରକୁ ଯାଉଛି। ତେବେ ବାନ୍ଧବୀଙ୍କ ପାଖକୁ ଅକ୍ଷୟ ପଠାଇଥିବା ଏଭଳି ଏକାଧିକ କୋହଭରା ଭଏସ୍ ନୋଟ୍ ଭାଇରାଲ ହେବା ପରେ ଅଧିକ ଚର୍ଚ୍ଚା ସୃଷ୍ଟି ହେଉଛି। ବାନ୍ଧବୀ ଦେଇଥିବା କଳା ଶାର୍ଟକୁ ଅକ୍ଷୟ ଆତ୍ମହତ୍ୟା ପୂର୍ବରୁ ପିନ୍ଧିଥିଲେ। ଉକ୍ତ ଫଟୋକୁ ସେ ମେଲ୍ ଯୋଗେ ମଧ୍ୟ ପଠାଇଥିଲେ। ଘଟଣାକୁ ନେଇ ଆଜେକ୍ସଙ୍କ ମା’ ଲକ୍ଷ୍ମୀପ୍ରିୟା ମହାରଣା କହିଛନ୍ତି, ମୋ ପୁଅ ନ୍ୟାୟ ପାଉ। ସେ ଝିଅକୁ ଆଉ ପୁଅକୁ ଏମିତି ଦଣ୍ଡ ଦିଅନ୍ତୁ, ଯେମିତି କୌଣସି ପୁଅ ଓ ଝିଅ ଏମିତି ନ ହୁଅନ୍ତୁ। ଆତ୍ମହତ୍ୟା କେହି ନ କରନ୍ତୁ। ମୋ ଭଳିଆ କେହି ନ କାନ୍ଦନ୍ତୁ ବୋଲି ଲକ୍ଷ୍ମୀପ୍ରିୟା କହିଛନ୍ତି। ତଦନ୍ତ ଦିଗକୁ ନେଇ ଥାନାଧିକାରୀ ରଜନୀକାନ୍ତ ପ୍ରଧାନ କହିଛନ୍ତି, ଆଜେକ୍ସଙ୍କ ବାନ୍ଧବୀ ଜିଜ୍ଞାସା ଓ ତାଙ୍କ ନୂଆ ପୁରୁଷ ବନ୍ଧୁଙ୍କ ନାମରେ ଆତ୍ମହତ୍ୟା ପାଇଁ ପ୍ରବର୍ତ୍ତାଇବା ଅଭିଯୋଗରେ ଆଇପିସି ଦଫା ୩୦୬ରେ ଏକ ମାମଲା (ନଂ.୧୨୧/୨୦୨୩) ରୁଜୁ କରି ତଦନ୍ତ ଜାରି ରହିଛି। ଆଜେକ୍ସଙ୍କ ବାନ୍ଧବୀଙ୍କୁ ଜେରା ସମୟରେ ମିଳିଥିବା ତଥ୍ୟ ଓ ସିଡିଆର୍ ଏବଂ ଭଏସ୍ ନୋଟ ଆଦିକୁ ଯାଞ୍ଚ କରାଯାଉଛି। ତେବେ ଏପର୍ଯ୍ୟନ୍ତ ମାମଲାରେ ଆଜେକ୍ସଙ୍କୁ ବ୍ଲାକ୍ମେଲ୍ କରାଯାଇଥିବା ପ୍ରମାଣ ମିଳିନାହିଁ। ଆବଶ୍ୟକ ପଡ଼ିଲେ ବାନ୍ଧବୀଙ୍କ ପୁରୁଷବନ୍ଧୁଙ୍କୁ ପଚରାଉଚରା ହୋଇପାରେ ବୋଲି ସେ କହିଛନ୍ତି।
