ମୁନିଗୁଡ଼ା,୨୮ା୧: ରାୟଗଡ଼ା ଜିଲା ମୁନିଗୁଡ଼ା ରେଳ ଷ୍ଟେଶନ ନିକଟବର୍ତ୍ତୀ ମୁନିଖୋଲ ସନ୍ନିକଟ ମଶାଣି ନାଳ ନିକଟରେ ଗୁରୁବାର ଏକ ମାଲବାହୀ ଟ୍ରେନ୍(ତୈଳ ଟ୍ୟାଙ୍କର) ଲାଇନଚ୍ୟୁତ ହୋଇଛି। ଏହାଦ୍ୱାରା ଡାଉନ୍ଲାଇନରେ ରେଳ ଚଳାଚଳ ବ୍ୟାହତ ହୋଇଥିଲା। ସୌଭାଗ୍ୟବଶତଃ ଏକ ବଡ଼ ଦୁର୍ଘଟଣା ଟଳିଯାଇଛି।
ସୂଚନା ଅନୁଯାୟୀ, ବିଶାଖାପାଟଣାରୁ ଛତିଶଗଡ଼ ଯାଉଥିବା ଟ୍ରେନ୍ଟି ମୁନିଖୋଲ ନିକଟରେ ଲାଇନଚ୍ୟୁତ ହୋଇଥିଲା। ଖବର ପାଇ ପିଡବ୍ଲ୍ୟୁଆଇ, ଆର୍ପିଏଫ୍, ଷ୍ଟେଶନ ମାଷ୍ଟର ପ୍ରମୁଖ ଦୁର୍ଘଟଣାସ୍ଥଳ ପରିଦର୍ଶନ କରି ସ୍ଥିତି ଅନୁଧ୍ୟାନ କରିଥିଲେ। ପରେ ଟିଟିଲାଗଡ଼ରୁ ଏକ ଟିମ୍ ଆସି ଲାଇନଚ୍ୟୁତ ହୋଇଥିବା ୪ ଟ୍ୟାଙ୍କରର ମରାମତି କରିବା ପରେ ଡାଉନ୍ଲାଇନରେ ରେଳ ଚଳାଚଳ ସ୍ବାଭାବିକ ହୋଇଥିଲା। ଟ୍ରେନ୍ ଲାଇନଚ୍ୟୁତ ଯୋଗୁ ଦୀର୍ଘ ସମୟ ଧରି କେବଳ ଅପ୍ଲାଇନରେ ଟ୍ରେନ୍ ଚଳାଚଳ କରିଥିଲା। ତେବେ ମରାମତି ହୋଇଥିବା ଟ୍ୟାଙ୍କରଗୁଡ଼ିକ ମୁନିଗୁଡ଼ା ଷ୍ଟେଶନକୁ ସ୍ଥାନାନ୍ତର କରାଯାଇଛି।
