ପୁରୀ ଅଫିସ,୨୧ା୯: ହିନ୍ଦୁଧର୍ମର ଚାରି ଧାମ ମଧ୍ୟରେ ଶ୍ରୀଜଗନ୍ନାଥ ଧାମ ପୁରୀ ହେଉଛି ଅନ୍ୟତମ। ମହାପ୍ରଭୁଙ୍କ ଦର୍ଶନ ପାଇଁ ଦେଶର ବିଭିନ୍ନ ସ୍ଥାନରୁ ଭକ୍ତ ପୁରୀକୁ ଆସିଥାନ୍ତି। ସେହିପରି ମହାପ୍ରଭୁଙ୍କ କ୍ଷେତ୍ରରେ ଶ୍ରାଦ୍ଧ ଦେଲେ ପିତୃପୁରୁଷ ମୋକ୍ଷ ପ୍ରାପ୍ତି ହୋଇଥାଏ ବୋଲି ବିଶ୍ୱାସ ରହିଛି। ତେଣୁ ବର୍ଷକ ବାରମାସ ଭକ୍ତମାନେ ପୁରୀ ଆସି ଶ୍ରାଦ୍ଧ ଦେବା ସହ ପିଣ୍ଡଦାନ କରିଥାନ୍ତି। ବିଶେଷକରି ଆଶ୍ୱିନ ମାସ କୃଷ୍ଣପକ୍ଷ ପ୍ରତିପଦାଠାରୁ ଅମାବାସ୍ୟା ବା ମହାଳୟା ପର୍ଯ୍ୟନ୍ତ ୧୫ ଦିନକୁ ପିତୃପକ୍ଷ ବୋଲି କୁହାଯାଏ। ଏହି ଅବସରରେ ପୂର୍ବରୁ ଶ୍ରୀମନ୍ଦିର ବାଇଶି ପାହଚରେ ଶ୍ରଦ୍ଧାଳୁମାନେ ପିତୃପୁରୁଷଙ୍କ ଉଦ୍ଦେଶ୍ୟରେ ପିଣ୍ଡଦାନ କରୁଥିଲେ। ମାତ୍ର କରୋନା ସମୟରେ ମନ୍ଦିର ଭକ୍ତଙ୍କ ପାଇଁ ବନ୍ଦ ରହିବା ସହ ବାଇଶ ପାହଚରେ ଶ୍ରାଦ୍ଧ ଦେବା ପ୍ରଶାସନ ପକ୍ଷରୁ ବନ୍ଦ କରାଯାଇଥିଲା। ପରେ କରୋନା କଟକଣା ହଟିବା ପରେ ଭକ୍ତଙ୍କ ଯିବା ଆସିବାରେ ସମସ୍ୟା ଥିବା ଦର୍ଶାଇ ବାଇଶ ପାହାଚରେ ଶ୍ରାଦ୍ଧ ଦେବା ଉପରେ କଟକଣା ଜାରି କରାଯାଇଛି। ଫଳରେ ବ୍ରାହ୍ମଣମାନେ ଶ୍ରୀମନ୍ଦିର ଉତ୍ତରଦ୍ୱାର ପାର୍ଶ୍ୱରେ ଥିବା ମେଘନାଦ ପାଚେରିରେ ବସି ଶ୍ରାଦ୍ଧ ଦେଉଛନ୍ତି। ଫଳରେ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି ଉଭୟ ଶ୍ରଦ୍ଧାଳୁ ଏବଂ ବ୍ରାହ୍ମଣ। ତେବେ ବିଗତ ବର୍ଷ ପ୍ରଶାସନ ପକ୍ଷରୁ ଉତ୍ତରଦ୍ୱାର ନିକଟରେ ଏକ ଅସ୍ଥାୟୀ ଶେଡ୍ ନିର୍ମାଣ କରାଯାଇଥିବାରୁ ସେଠାରେ ବ୍ରାହ୍ମଣମାନେ ବସି ଶ୍ରାଦ୍ଧ ଓ ପିଣ୍ଡଦାନ କରିଥିଲେ। କିନ୍ତୁ ଚଳିତବର୍ଷ ଉକ୍ତ ସ୍ଥାନରେ ଶ୍ରୀମନ୍ଦିର ପ୍ରକଳ୍ପ କାର୍ଯ୍ୟ ଜାରି ରହିଥିବାରୁ ପ୍ରଶାସନ ପକ୍ଷରୁ ସେମାନଙ୍କ ପାଇଁ କୌଣସି ପ୍ରକାର ବ୍ୟବସ୍ଥା କରାଯାଇନାହିଁ। ଫଳରେ ଖରା, ବର୍ଷାରେ ବହୁ ଅସୁବିଧାରେ ଶ୍ରାଦ୍ଧ କରୁଛନ୍ତି। ଅପରପକ୍ଷେ ରାସ୍ତାପାର୍ଶ୍ୱରେ ଶ୍ରାଦ୍ଧ କରାଯାଉଥିବାରୁ ଯାତାୟାତରେ ମଧ୍ୟ ବହୁ ସମସ୍ୟା ଦେଖାଯାଉଛି। ତେଣୁ ଶ୍ରୀମନ୍ଦିର ପରିସରରେ ଶ୍ରାଦ୍ଧ କରିବା ପାଇଁ ନିର୍ଦ୍ଦିଷ୍ଟ ଜାଗା ଯୋଗାଇଦେବାକୁ ବ୍ରାହ୍ମଣମାନେ ଦାବି କରିଛନ୍ତି। ଏ ନେଇ ଜଣେ ବ୍ରାହ୍ମଣ କହିଛନ୍ତି, ଏହି ସମସ୍ୟା ବିଷୟରେ ପ୍ରଶାସନକୁ ଜଣାଇ ଦିଆଯାଇଛି। ଶ୍ରୀମନ୍ଦିର ପ୍ରକଳ୍ପ କାର୍ଯ୍ୟ ସରିଲେ ସ୍ଥାୟୀ ବ୍ୟବସ୍ଥା କରାଯିବ ବୋଲି ଆଶ୍ୱାସନା ଦେଇଛନ୍ତି।
