କୋକସରା,୧୯ା୨(ଡି.ଏନ୍.): ରାଜ୍ୟରେ ଦ୍ୱିତୀୟ ପର୍ଯ୍ୟାୟ ଭୋଟ୍ ଗ୍ରହଣ ଶେଷ ହୋଇଛି। ରବିବାର କଳାହାଣ୍ଡି ଜିଲା କୋକସରା ବ୍ଲକରେ ତୃତୀୟ ପର୍ଯ୍ୟାୟ ମତଦାନ ଅନୁଷ୍ଠିତ ହେବ। ଏଥିପାଇଁ ବ୍ଲକ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ବ୍ଲକର ୨୨ ପଞ୍ଚାୟତରେ ୮୭ ହଜାର ୮୩୯ ଭୋଟର ରହିଛନ୍ତି। ସେମାନଙ୍କ ମଧ୍ୟରୁ ୪୪ ହଜାର ୧୯୬ ପୁରୁଷ ଭୋଟର ଓ ୪୩ ହଜାର ୬୪୧ ମହିଳା ଭୋଟର ରହିଛନ୍ତି। ତେବେ ୨୬୨ ବୁଥ୍ରେ ମତାଦାନ ଅନୁଷ୍ଠିତ ହେବ। ନିର୍ବାଚନ ପାଇଁ ୨୨ ପଞ୍ଚାୟତରେ ୩ ଜିଲା ପରିଷଦ ଆସନ ପାଇଁ ୧୨ଜଣ ଦଳୀୟ ପ୍ରାର୍ଥୀ ଓ ଜଣେ ସ୍ବାଧୀନ ପ୍ରାର୍ଥୀ ରହିଛନ୍ତି । ସେହିପରି ସମିତିସଭ୍ୟ ପ୍ରାର୍ଥୀ ପାଇଁ ୯୬ ଜଣ, ସରପଞ୍ଚ ପାଇଁ ୧୨୩ ଓ ଓ୍ବାର୍ଡ ମେମ୍ବର ପାଇଁ ୨୮୩ ପ୍ରାର୍ଥୀ ନିର୍ବାଚନ ଲଢୁଛନ୍ତି । ମୋଟ୍ ୫୧୫ ଜଣ ପ୍ରାର୍ଥୀ ପଞ୍ଚାୟତ ନିର୍ବାଚନ ପାଇଁ ପ୍ରତିଦ୍ୱନ୍ଦ୍ୱିତା କରୁଥିବା ସୂଚନା ମିଳିଛି। ତେବେ ୨୬୨ ବୁଥ୍ ମଧ୍ୟରୁ ୫ ବୁଥ୍ ଅତି ସମ୍ବେଦନଶୀଳ ଭାବେ ଚିହ୍ନଟ କରାଯାଇଛି। ସେଗୁଡିକ ହେଲା ଆମପାଣି ପଞ୍ଚାୟତର କୁଟୁରୁ ଓ୍ବାର୍ଡ ୬ ଓ ବିରିମୁହାଣ ଓ୍ବାର୍ଡ ୭, ଡୁଡୁକାଠେଙ୍ଗା ପଞ୍ଚାୟର ଖଳିଗଡ଼ ବୁଥର ୮ ଓ ୯ ନମ୍ବର ୱାର୍ଡ, ବରାଡଙ୍ଗା ପଞ୍ଚାୟତର ଝୁଲେନବର ବୁଥ୍ରେ ଓ୍ବାର୍ଡ ୧୧ ରହିଛି। ପିଙ୍କ୍ ବୁଥ୍ ଭାବେ କୋକସରା ପଞ୍ଚାୟତର ୫ ଓ ୭ ନମ୍ବର ଓ୍ବାର୍ଡ ରହିଥିବା ବେଳେ ଏହି ବୁଥ୍ରେ ମହିଳା କର୍ମଚାରୀମାନେ ନିର୍ବାଚନ ପରିଚାଳନା କରିବେ। ଶନିବାର ବ୍ଲକର ୨୨ ପଞ୍ଚାୟତର ୨୬୨ ପୋଲିଂ ବୁଥ୍ ପାଇଁ ନିୟୋଜିତ କର୍ମଚାରୀଙ୍କୁ ରିଲିଫ କରାଯାଇଛ। ବିଭିନ୍ନ ଷ୍ଟଲ୍ କରି ନିର୍ବାଚନ ପାଇଁ ଆସିଥିବା କର୍ମଚାରୀଙ୍କୁ ଆବଶ୍ୟକ ସମସ୍ତ ଉପକରଣ ସହ ବୁଥ୍କୁ ପଠାଯାଇଛି। ବ୍ଲକ ପ୍ରଶାସନର ସମସ୍ତ ପଞ୍ଚାୟତ କର୍ମଚାରୀ, ଶିକ୍ଷକ, ପୋଲିସ କର୍ମଚାରୀ ନିୟୋଜିତ ରହି ପୋଲିଂ ବୁଥ୍କୁ ଯିବାପାଇଁ ସମସ୍ତ ଆନୁସଙ୍ଗିକ ସୂଚାରୁ ରୂପେ ହୋଇଥିବା ନେଇ କୋକସରା ବିଡିଓ ତଥା ନିର୍ବାଚନ ଅଧିକାରୀ ମନୀଷା ଦାସ ସୂଚନା ଦେଇଛନ୍ତି।
