ଅଜମେର/ସମ୍ଭଲ/ନୂଆଦିଲ୍ଲୀ,୨୯ା୧୧:ଦରଘା ଶରିଫରେ ସର୍ଭେ କରାଇବା ପାଇଁ ଦାଖଲ ଏକ ଆବେଦନର ଶୁଣାଣି କରି ବୁଧବାର ରାଜସ୍ଥାନର ଅଜମେରସ୍ଥିତ ଏକ କୋର୍ଟ ସ୍ବରାଷ୍ଟ୍ର ମନ୍ତ୍ରଣାଳୟ, ଭାରତର ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା (ଏଏସ୍ଆଇ), ଅଜମେର ଦରଘା କମିଟିକୁ ନୋଟିସ କରିଛନ୍ତି। ହିନ୍ଦୁସେନା ମୁଖ୍ୟ ବିଷ୍ଣୁ ଗୁପ୍ତା ଗତ ସେପ୍ଟେମ୍ବରରେ ଦାଖଲ କରିଥିବା ପିଟିଶନରେ ଦାବି କରିଛନ୍ତି ଯେ, ତ୍ରୟୋଦଶ ଶତାବ୍ଦୀର ସୁଫି ସନ୍ଥ ଖ୍ବାଜା ମୋଇନୁଦ୍ଦିନ ଚିସ୍ତିଙ୍କ ସମାଧିସ୍ଥଳରେ ପୂର୍ବରୁ ଏକ ଶିବମନ୍ଦିର ଥିଲା। ତେଣୁ ଅଜମେର ଦରଘାକୁ ‘ସଙ୍କଟ ମୋଚନ ମହାଦେବ ମନ୍ଦିର’ ଘୋଷଣା କରାଯାଉ ଏବଂ ସେଠାରେ ହିନ୍ଦୁଙ୍କୁ ପୁନଶ୍ଚ ପୂଜାର୍ଚ୍ଚନା ଅଧିକାର ଦିଆଯାଉ। ବିଷ୍ଣୁଙ୍କ ଓକିଲ ଯୋଗେଶ ସିରୋଜା ଉକ୍ତ ପିଟିଶନରେ ବିଚାରପତିରୁ ରାଜନେତା ସାଜିଥିବା ହରବିଳାସ ସାରଦା(୧୮୬୭-୧୯୫୫)ଙ୍କ ଏକ ପୁସ୍ତକର ଅବତାରଣା କରିଛନ୍ତି। ସ୍କଟିଶ୍ କମିଶନ ଇଣ୍ଡଷ୍ଟ୍ରିଜ୍ ଲିମିଟେଡ୍ କମ୍ପାନୀ ପକ୍ଷରୁ ୧୯୧୧ରେ ପ୍ରକାଶିତ ‘ଅଜମେର: ହିଷ୍ଟୋରିକାଲ ଆଣ୍ଡ୍ ଡେସ୍କ୍ରିପ୍ଟିଭ୍’ ଶୀର୍ଷକ ପୁସ୍ତକରେ ଦରଘା ତଳେ ହିନ୍ଦୁ ମନ୍ଦିରର ଉପସ୍ଥିତି ସମ୍ପର୍କରେ ସାରଦା ଉଲ୍ଲେଖ କରିଥିଲେ। ସେହିପରି ‘ସମ୍ ଆକାଉଣ୍ଟ ଅଫ୍ ଦି ଜେନେରାଲ ଆଣ୍ଡ୍ ମେଡିକାଲ ଟୋପୋଗ୍ରାଫି ଅଫ୍ ଅଜମେର’ (୧୮୪୧)ର ଅବତାରଣା କରି ବ୍ରିଟିଶ୍ ଐତିହାସିକ ପିଏମ୍ କୁରିଏ ୧୯୮୯ରେ ଲେଖିଥିବା ନିଜ ପୁସ୍ତକରେ ମଧ୍ୟ ଏହି ଦରଘାକୁ ଏକ ‘ପ୍ରାଚୀନ ପବିତ୍ର ମହାଦେବ ମନ୍ଦିର’ ବୋଲି ଅଭିହିତ କରିଛନ୍ତି। ଅଜମେର ଦରଘାର ନିର୍ମାଣ ମାମଲୁକ୍ ସୁଲତାନ ଇଲ୍ତୁତମିଶଙ୍କ (୧୨୧୧-୧୨୩୬) ଶାସନ କାଳରେ ହୋଇଥିଲା। ଆଇନଜୀବୀ ସିରୋଜା ପିଟିଶନରେ ସବୁର ଅବତାରଣା କରି ଦରଘାର ସର୍ଭେ ଦାବି କରିଛନ୍ତି। ସିଭିଲ ଜଜ୍ ମନମୋହନ ଚନ୍ଦେଲଙ୍କ ଅଦାଲତରେ ତାଙ୍କ ଆବେଦନର ପରବର୍ତ୍ତୀ ଶୁଣାଣି ଡିସେମ୍ବର ୨୦ରେ ହେବ। ଅଜମେର ଦରଘା ଖାଦିମ (ତତ୍ତ୍ୱାବଧାରକ)ମାନଙ୍କ ପ୍ରତିନିଧି ସଂସ୍ଥା ଅଞ୍ଜୁମନ୍ ସୟେଦ ଜାଦଗାନ ସମ୍ପାଦକ ସୟେଦ ସରଓ୍ବାର ଚିସ୍ତି କହିଛନ୍ତି, ସମ୍ପ୍ରଦାୟ ଆଧାରରେ ସମାଜକୁ ବିଭାଜିତ କରିବା ଉଦ୍ଦେଶ୍ୟରେ ଉକ୍ତ ପିଟିଶନ ଦାଖଲ କରାଯାଇଛି। ଏହି ଦରଘା ସାମ୍ପ୍ରଦାୟିକ ସଦ୍ଭାବ ଓ ଧର୍ମନିରପେକ୍ଷତାର ଏକ ପ୍ରତୀକ। ଏହା ସଂଖ୍ୟାଲଘୁ ବ୍ୟାପାର ମନ୍ତ୍ରଣାଳୟ ଅଧୀନରେ ଆସୁଛି। ଏଏସ୍ଆଇ ସହ ଏହାର କିଛି ସମ୍ପର୍କ ନାହିଁ। ବାବ୍ରି ମସ୍ଜିଦ ମାମଲାରେ ସୁପ୍ରିମକୋର୍ଟଙ୍କ ୨୦୧୯ ରାୟକୁ ସଂଖ୍ୟାଲଘୁ ସମ୍ପ୍ରଦାୟ ଗ୍ରହଣ କରିଛନ୍ତି। ଆମେ ଭାବୁଥିଲୁ ଏହା ପରେ ଆଉ କିଛି ହେବ ନାହିଁ। କିନ୍ତୁ ଦୁର୍ଭାଗ୍ୟବଶତଃ ଏଭଳି ଘଟଣା ବାରମ୍ବାର ଘଟିଚାଲିଛି। ସମ୍ଭଲର ଦୃଷ୍ଟାନ୍ତ ଆମ ସମ୍ମୁଖରେ ରହିଛି। ଏହା ବନ୍ଦ ହେବା ଜରୁରୀ ବୋଲି ସରଓ୍ବାର ଚିସ୍ତି ଅସନ୍ତୋଷ ବ୍ୟକ୍ତ କରିଛନ୍ତି।
