ନୂଆଦିଲ୍ଲୀ,୩ା୧୨: ବିଚାରପତି ନିଯୁକ୍ତି ବ୍ୟବସ୍ଥାକୁ ନେଇ ଦେଶବ୍ୟାପୀ ବିତର୍କ ଆରମ୍ଭ ହୋଇଥିବାବେଳେ ଏଥିରେ ପରିବର୍ତ୍ତନ ହେବା ଉଚିତ ନୁହେଁ ବୋଲି ସୁପ୍ରିମକୋର୍ଟ ଶୁକ୍ରବାର କହିଛନ୍ତି। ଏହି ନିଯୁକ୍ତି ପ୍ରକ୍ରିୟାରେ ସମ୍ପୃକ୍ତ ବିଚାରପତିମାନଙ୍କ କଲେଜିୟମ ସବୁଠୁ ସ୍ବଚ୍ଛ ବୋଲି ସର୍ବୋଚ୍ଚ ଅଦାଲତ ମତ ଦେଇଛନ୍ତି। କାର୍ଯ୍ୟ କରୁଥିବା ଏକ ବ୍ୟବସ୍ଥାକୁ ଲାଇନଚ୍ୟୁତ କରା ନ ଯାଉ, କଲେଜିୟମକୁ ତା’ର କାର୍ଯ୍ୟ କରିବାକୁ ଦିଆଯାଉ ବୋଲି ଜଷ୍ଟିସ୍ ଏମ୍.ଆର୍. ଶାହା ଏବଂ ସି.ଟି. ରବିକୁମାର କହିଛନ୍ତି। ନିଷ୍ପତ୍ତି ଉପରେ ମନ୍ତବ୍ୟ ଦେବା କଲେଜିୟମର ପୂର୍ବତନ ସଦସ୍ୟମାନଙ୍କର ଏକ ଫ୍ୟାଶନ ହୋଇଗଲାଣି ବୋଲି ଖଣ୍ଡପୀଠ କହିଛନ୍ତି।
ସାମାଜିକ କର୍ମୀ ଅଞ୍ଜଳି ଭରଦ୍ୱାଜ ସୂଚନା ଅଧିକାର ଆଇନ (ଆର୍ଟିଆଇ) ବଳରେ ସୁପ୍ରିମକୋର୍ଟ କଲେଜିୟମର ବିବାଦୀୟ ୨୦୧୮ ଡିସେମ୍ବର ୧୨ ତାରିଖ ବୈଠକର ସବିଶେଷ ବିବରଣୀ ମାଗିଥିଲେ। ଦିଲ୍ଲୀ ହାଇକୋର୍ଟ ତାଙ୍କ ଅନୁରୋଧକୁ ଖାରଜ କରିଦେବା ପରେ ସେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଶୁଣାଣି ବେଳେ ଆବେଦନକାରୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ପ୍ରଶାନ୍ତ ଭୂଷଣ ଉପସ୍ଥିତ ରହି ଆର୍ଟିଆଇ ଅଧୀନରେ କଲେଜିୟମ ନିଷ୍ପତ୍ତିର ତଥ୍ୟ ଦିଆଯାଇପାରିବ କି ବୋଲି ପ୍ରଶ୍ନ କରି ଏ ସମ୍ପର୍କରେ ଦେଶବାସୀଙ୍କ ଜାଣିବା ଅଧିକାର ନାହିଁ କି ବୋଲି କହିଥିଲେ। ଅଦାଲତ ପୂର୍ବରୁ କହିଥିଲେ, ଆର୍ଟିଆଇ ଏକ ମୌଳିକ ଅଧିକାର। ତେଣୁ ପ୍ରଧାନ ବିଚାରପତି ଏବଂ ସରକାରଙ୍କ ମଧ୍ୟରେ ହେଉଥିବା ସମସ୍ତ ପତ୍ର ବିନିମୟ ସର୍ବସାଧାରଣରେ ଉପଲବ୍ଧ ହେବା ଆବଶ୍ୟକ। ପ୍ରଶାନ୍ତ ଭୂଷଣଙ୍କ ଯୁକ୍ତି ଉପରେ ଜଷ୍ଟିସ୍ ଶାହା କହିଥିଲେ, କଲେଜିୟମର ଉକ୍ତ ବୈଠକରେ କୌଣସି ପ୍ରସ୍ତାବ ଗୃହୀତ ହୋଇ ନ ଥିଲା। ପୂର୍ବତନ ସଦସ୍ୟମାନଙ୍କ କୌଣସି କାର୍ଯ୍ୟ ସମ୍ପର୍କରେ ଆମେ ମନ୍ତବ୍ୟ ଦେବାକୁ ଚାହୁଁନାହୁଁ ବୋଲି ଖଣ୍ଡପୀଠ କହିଥିଲେ।
