ମାଲକାନଗିରି,୧୦।୮(ଡି.ଏନ୍.ଏ.): ମାଲକାନଗିରି ଜିଲା ସୀମାନ୍ତ ଛତିଶଗଡ଼ ସୁକ୍ମା ଜିଲା କୁଣ୍ଟା ଅଞ୍ଚଳରୁ ୧ କୋଟିରୁ ଊର୍ଦ୍ଧ୍ୱ ଟଙ୍କାର କେନ୍ଦୁପତ୍ର ଜଣେ ବ୍ୟବସାୟୀ ଚୋରି କରି ମାଲକାନଗିରି ଜିଲାର ବିଭିନ୍ନ ବେସରକାରୀ ଗୋଦାମରେ ଗଚ୍ଛିତ ରଖିଥିଲେ। କେନ୍ଦୁପ୍ରତ୍ର ଶ୍ରମିକମାନେ ପ୍ରାପ୍ୟ ପାଇ ନ ଥିବାରୁ ଏହାର ପ୍ରତିବାଦ କରିଥିଲେ। ଫଳରେ ଖୋଳତାଡ ହେବାରୁ ଏହି କେନ୍ଦୁପତ୍ର ମାଲକାନଗଗିରିର ବିଭିନ୍ନ ସ୍ଥାନରୁ ମିଳିଛି। ଖବରରୁ ଜଣାପଡିଛି ସୁକ୍ମା ଜିଲାର କେନ୍ଦୁପତ୍ର ତୋଳାଳିମାନେ ବେସରକାରୀ ସଂସ୍ଥା ବ୍ୟବସାୟୀଙ୍କୁ ପତ୍ର ବିକ୍ରି କରିଥିଲେ। ଏବାବଦରେ ସେମାନେ ପ୍ରାୟ ଦେଢ କୋଟି ଟଙ୍କା ପାଇବାକୁ ଥିଲା। ମାତ୍ର ବ୍ୟବସାୟୀ ଗୁଲାମ ଖାନ ଶ୍ରମିକମାନଙ୍କୁ ସେମାନଙ୍କ ପ୍ରାପ୍ୟ ଅର୍ଥ ନ ଦେଇ କୁଣ୍ଟାର କେନ୍ଦୁପତ୍ର ଗୋଦାମ ଏବଂ ବିଭିନ୍ନ ଫଡିରୁ ରଖିଥିବା କେନ୍ଦୁପତ୍ର ବସ୍ତାରେ ବିଭିନ୍ନ ଗାଡିରେ ମାଲକାନଗିରି ଆଣି ବେସରକାରୀ ଗୋଦାମଗୁୁଡିକରେ ଲୁଚାଇ ରଖିଥିଲେ। ଛତିଶଗଡର ୧ହଜାରରୁ ଊର୍ଦ୍ଧ୍ୱ ଶ୍ରମିକ ସେମାନଙ୍କ ପ୍ରାପ୍ୟ ନ ପାଇ ସୁକ୍ମା ଜିଲା ଡିଏଫଓଙ୍କୁ ଜଣାଇ ସେମାନଙ୍କ ପ୍ରାପ୍ୟ ଦାବି କରି ଏ ଦିଗରେ କାର୍ଯ୍ୟାନୁଷ୍ଠନ ଗ୍ରହଣ କରିବାକୁ ଅନୁରୋଧ କରିଥିଲେ। ଏହାକୁ ଭିତ୍ତିକରି ସୁକ୍ମା ଜିଲାର ଉପଖଣ୍ଡ ବନାଧିକାରୀ ଅଶୋକ ସୋମାନୀ, କେ.ଏସ୍. ଧୁରୁ, ଜେ.ପି. ବାରେଙ୍କ ସମେତ ବନ ବିଭାଗ ଓ ପୋଲିସ କର୍ମଚାରୀ ମାଲକାନଗିରି ଆସି ମାଲକାନଗିରି ଜିଲା ପ୍ରଶାସନ ସହାୟତାରେ ଏମ୍.ଭି.-୪୨, ଏମ୍.ଭି.-୧୬ସ୍ଥିତ ବେସରକାରୀ ଗୋଦାମରେ ଗଚ୍ଛିତ ଥିବା ଚୋରା କେନ୍ଦୁପତ୍ର ଚିହ୍ନଟ କରିବା ସହ ଗୁଲାମ ଖାନଙ୍କ ସହ ଯୋଗୀ ବାହାଦୁର ଖାନଙ୍କୁ ଏମ୍.ଭି.-୨ ଗ୍ରାମରୁ ଗିରଫ କରିଥିଲେ। ତେବେ ମୁଖ୍ୟ ଅଭିଯୁକ୍ତ ଗୁଲାମ ଖାନ ଫେରାର ହୋଇ ଯାଇଛନ୍ତି। ଏମ୍.ଭି.-୧୬ ଗ୍ରାମର ବେସରକାରୀ ଗୋଦାମରୁ ଜବତ ହୋଇଥିବା ପ୍ରାୟ ୧ହଜାରରୁ ଊର୍ଦ୍ଧ୍ୱ ବସ୍ତା ମାଲକାନଗିରି ବନ ବିଭାଗ ଅନୁମତି ପାଇଲା ପରେ ଛତିଶଗଡକୁ ନେବେ ବୋଲି ମାଲକାନଗିରି ବନାଞ୍ଚଳ ଅଧିକାରୀ ଜଗନ୍ନାଥ ବିଶୋୟୀ କହିଛନ୍ତି। ଏଥିପାଇଁ ସୁକ୍ମା ବନ ବିଭାଗ ଆବେଦନ କରିଛି। ଏତେ ପରିମାଣର କେନ୍ଦୁପତ୍ର ବାହାର ରାଜ୍ୟରୁ ଆସିଲା ଅଥଚ ଛତିଶଗଡ ବନ ବିଭାଗ ଓ ପୋଲିସ ଏହା କିପରି ଜାଣି ପାରିଲାନାହିଁ ସେନେଇ ପ୍ରଶ୍ନବାଚୀ ସୃଷ୍ଟି କରିଛି। ଏ ସମ୍ପର୍କରେ ଜୟପୁର କେନ୍ଦୁପତ୍ର ଡିଏଫଓ ପ୍ରଫୁଲ କୁମାର ମଣ୍ଡଳଙ୍କୁ ପଚାରିବାରୁ ସେ କହିଛନ୍ତି ଯେ, ଘରୋଇ ସଂସ୍ଥା ଉପରେ ତାଙ୍କର କୌଣସି କର୍ତ୍ତୃତ୍ୱ ନାହିଁ। ପଞ୍ଚାୟତ, ଜିଲା ପଞ୍ଚାୟତ ଅଧିକାରୀ ଏବଂ ବନ ବିଭାଗର ଟେରିଟୋରିଆଲ ବିଭାଗର ଏହି ଅନିୟମିତତାର ତଦାରଖ ଏବଂ ଜବତ କରିବା ଦାୟିତ୍ୱ ବୋଲି ସେ କହିଥିଲେ।
