ନୂଆଦିଲ୍ଲୀ: ଜିଏସ୍ଟି ରାଜସ୍ବ ହ୍ରାସକୁ ଭରଣା କରିବା ଲାଗି ଓଡ଼ିଶା ସମେତ ମୋଟ ୨୦ଟି ରାଜ୍ୟ ବଜାରରୁ ଋଣ କରିବେ। ଏହି ରାଜ୍ୟଗୁଡିକ ମୋଟ ୬୮,୮୨୫ କୋଟି ଟଙ୍କାର ଋଣ ଉଠାଇବେ ବୋଲି ଜଣାପଡିଛି। ଖୋଲା ବଜାରରୁ ଋଣ ଉଠାଇବା ଲାଗି ଏହି ରାଜ୍ୟଗୁଡିକୁ କେନ୍ଦ୍ର ସରକାର ମଙ୍ଗଳବାର ଅନୁମତି ପ୍ରଦାନ କରିଛନ୍ତି। ରାଜ୍ୟଗୁଡିକୁ କ୍ଷତିପୂରଣ ପ୍ରଦାନ ପ୍ରସଙ୍ଗ ନେଇ ଜିଏସ୍ଟି ପରିଷଦର ଗୁରୁତ୍ୱପୂର୍ଣ୍ଣ ବୈଠକ ସୋମବାର ଅନୁଷ୍ଠିତ ହୋଇଥିଲା। ଏହି ବୈଠକରେ କୌଣସି ସହମତି ପ୍ରକାଶ ପାଇପାରିନାହିଁ। ଜିଏସ୍ଟି ରାଜସ୍ବ ହ୍ରାସ ହେଉ ଥିବାରୁ ରାଜ୍ୟଗୁଡିକୁ ଋଣ କରନ୍ତୁ ବୋଲି କେନ୍ଦ୍ର କହି ଆସୁଛି। ତେବେ କ୍ଷତିପୂରଣ ପ୍ରସଙ୍ଗ ସମାଧାନ ନ ହେବାର ଗୋଟିଏ ଦିନ ପରେ ନୂଆ ନିଷ୍ପତ୍ତି ଆସିଥିବା ଜଣାପଡିଛି।
ସୂଚନାଯୋଗ୍ୟ, ଚଳିତ ଆର୍ଥତ୍କ ବର୍ଷରେ ରାଜ୍ୟଗୁଡିକୁ କ୍ଷତିପୂରଣ ପ୍ରଦାନ କରିବା ଲାଗି ମୋଟ ୨.୨୫ ଲକ୍ଷ କୋଟି ଟଙ୍କାର ନିଅଣ୍ଟ ପଡିବ ବୋଲି ଆକଳନ କରାଯାଇଛି। ଅଗଷ୍ଟ ମାସରେ କେନ୍ଦ୍ର ସରକାର ରାଜ୍ୟଗୁଡିକୁ ୨ଟି ବିଳଳ୍ପ ଯଥା- ରିଜର୍ଭ ବ୍ୟାଙ୍କ ଓ୍ବିଣ୍ଡୋରୁ ୯୭ ହଜାର କୋଟି କିମ୍ବା ବଜାରରୁ ୨.୩୫ ଲକ୍ଷ କୋଟି ଟଙ୍କାର ଋଣ ଉଠାଣ ନେଇ ବିକଳ୍ପ ପ୍ରଦାନ କରିଥିଲେ। ଏହାବାଦ ୨୦୨୨ ପରେ ମଧ୍ୟରେ ବିଳାସପୂର୍ଣ୍ଣ ଏବଂ ଅବକାରୀ ସାମଗ୍ରୀ ଉପରେ ସେସ୍ ଆଦାୟ ଜାରି ରଖିବାକୁ ମଧ୍ୟ ପ୍ରସ୍ତାବ ରହିଥିଲା। ଅଗଷ୍ଟ ୨୭ରେ ହୋଇଥିବା ଜିଏସ୍ଟି ପରିଷଦ ବୈଠକରେ କ୍ଷତିପୂରଣର ୨ଟି ବିକଳ୍ପ ସମ୍ପର୍କରେ କେନ୍ଦ୍ର ପ୍ରସ୍ତାବ ଦେଇଥିଲା। ଅଗଷ୍ଟ ୨୯ରେ ଏ ନେଇ ରାଜ୍ୟଗୁଡିକୁ ଅବଗତ କରାଯାଇଥିଲା।
ମଙ୍ଗଳବାର ଅର୍ଥ ମନ୍ତ୍ରଣାଳୟ ଅଧୀନ ବ୍ୟୟ ବିଭାଗ ପକ୍ଷରୁ ରାଜ୍ୟଗୁଡିକୁ ୬୮,୮୨୫ କୋଟି ଟଙ୍କାର ଋଣ ଉଠାଣ ନେଇ ଅନୁମତି ପ୍ରଦାନ କରାଯାଇଛି। ବଜାରରୁ ଋଣ ଉଠାଇବା ଲାଗି ଅନୁମତି ଦିଆଯାଇଥିବା ୨୦ ରାଜ୍ୟ ମଧ୍ୟରେ ଓଡ଼ିଶା ସମେତ ଆନ୍ଧ୍ର ପ୍ରଦେଶ, ଅରୁଣାଚଳ ପ୍ରଦେଶ, ଆସାମ, ବିହାର,ଗୋଆ, ଗୁଜରାଟ, ହରିୟାଣା,ହିମାଞ୍ଚଳ ପ୍ରଦେଶ, କର୍ନାଟକ, ମଧ୍ୟପ୍ରଦେଶ, ମହାରାଷ୍ଟ୍ର, ମଣିପୁର, ମେଘାଳୟ, ମିଜୋରାମ, ନାଗାଲାଣ୍ଡ, ସିକିମ, ତ୍ରିପୁରା, ଉତ୍ତର ପ୍ରଦେଶ ଏବଂ ଉତ୍ତରାଖଣ୍ଡ ରହିଛି। ଅନ୍ୟ ୮ ରାଜ୍ୟ ୨ଟି ବିକଳ୍ପ ମଧ୍ୟରୁ କୌଣସି ଗୋଟିଏକୁ ମଧ୍ୟ ବର୍ତ୍ତମାନ ଯାଏ ଗ୍ରହଣ କରିନାହାନ୍ତି।
