ଖୋର୍ଦ୍ଧା,୩୦ା୪(ପ୍ରଭାତ ପାଣିଗ୍ରାହୀ): ‘କୃଷି’ ହେଉଛି ଆମ ଅସ୍ତିତ୍ୱର ମୂଳ ଆଧାର। ଏହି କ୍ଷେତ୍ରରେ କୃଷକମାନେ ତାଙ୍କର ଅଦମ୍ୟ ପରିଶ୍ରମ, ଆଶା ଓ ଆତ୍ମବଳ ଦ୍ବାରା ଆଜି ଓଡ଼ିଶାକୁ ଆତ୍ମନିର୍ଭର ଓ ସମୃଦ୍ଧିମୟ କରିଛନ୍ତି। ରାଜ୍ୟ ସରକାର ମଧ୍ୟ କୃଷକଙ୍କ ସୁଖ ଓ ସମୃଦ୍ଧିକୁ ନେଇ ସମ୍ପୂର୍ଣ୍ଣ ପ୍ରତିବଦ୍ଧ ବୋଲି କହିଛନ୍ତି ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ।
ଖୋର୍ଦ୍ଧାସ୍ଥିତ ଜୟୀ ରାଜଗୁରୁ ଟାଉନ ହଲ୍ଠାରେ ଆୟୋଜିତ ଜିଲାସ୍ତରୀୟ କୃଷକ ଦିବସ-୨୦୨୫ ପାଳନ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ଆଇନମନ୍ତ୍ରୀ କହିଛନ୍ତି, ମୁଖ୍ୟମନ୍ତ୍ରୀଙ୍କ ଦ୍ବାରା ୨୦୨୫ ଖରିଫ ଋତୁ ପାଇଁ ୫୦ ଲକ୍ଷ ହିତାଧିକାରୀ କୃଷକଙ୍କୁ ମୁଖ୍ୟମନ୍ତ୍ରୀ କିଷାନ କିସ୍ତି ଅଧିନରେ ଆର୍ଥିକ ସହାୟତା ପ୍ରଦାନ କରାଯିବ। ଏହି ସହାୟତା କୃଷକଙ୍କ ଚାଷ କାର୍ଯ୍ୟକୁ ସାହାଯ୍ୟ କରି ଉତ୍ପାଦନ ବୃଦ୍ଧି କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବ ବୋଲି ମୁଁ ଆଶା କରୁଛି। ରାଜ୍ୟ ସରକାର କୃଷକଙ୍କ ସାବଲମ୍ବନ ଓ ସମୃଦ୍ଧି ପାଇଁ ଅନେକ ଯୋଜନା ପ୍ରଚଳିତ କରିଛନ୍ତ। ଏଥି ମଧ୍ୟରେ ରହିଛି କିଷାନ କ୍ରେଡିଟ କାର୍ଡ (KCC) ଯାହାକି କୃଷକମାଙ୍କୁ ସହଜରେ କମ୍ ସୁଧରେ ଋଣ ଯୋଗାଇ ପାରୁଛି।
ସେହିପରି ଚାଷୀମାନଙ୍କୁ ସେମାନଙ୍କର ଉତ୍ପାଦନର ଉଚିତ ମୂଲ୍ୟ ପ୍ରଦାନ କରିବା ପାଇଁ ପ୍ୟାଡି ପ୍ରୋକ୍ୟୁରମେଣ୍ଟ ଯୋଜନା ମାଧ୍ୟମରେ ୮୦୦ ଟଙ୍କାର ଇନ୍ପୁଟ ସହାୟତା ରାଶି ସହ ଧାନ କ୍ୱିଣ୍ଟାଲ ପିଛା ୩୧୦୦ ଟଙ୍କା ପ୍ରଦାନ କରୁଛନ୍ତି ରାଜ୍ୟ ସରକାର। ଆଜିର ପବିତ୍ର ଦିବସରେ କୃଷକ ଭାଇ ଓ ଭଉଣୀମାନଙ୍କୁ ଗୋଟିଏ ଅପିଲ ରହିବ ଯେ, ରାସାୟନିକ ସାର ଏବଂ କୀଟନାଶକର ବ୍ୟବହାରକୁ ସମ୍ପୂର୍ଣ ବନ୍ଦ କରିବା ସହିତ ଜୈବିକ କୃଷିକୁ ଆପଣେଇବା ପାଇଁ ପ୍ରୟାସ ଆରମ୍ଭ କରିବାକୁ ଆହ୍ବାନ ଦେଇଥିଲେ। ମୁଁ ବିଶ୍ବାସ କରେ ଯେ, ଏହି ସମସ୍ତ ଉଦ୍ୟମ ଦ୍ବାରା ଆମ ରାଜ୍ୟର କୃଷକମାନେ ସାବଲମ୍ବୀ ହେବେ ଏବଂ ଓଡ଼ିଶା ଆମ ଦେଶରେ କୃଷିରେ ଏକ ମଡେଲ ରାଜ୍ୟ ଭାବରେ ପରିଚିତ ହେବ।
ଏହି ଅବସରରେ ଖୋର୍ଦ୍ଧା ଜିଲାର ବିଭିନ୍ନ ବ୍ଲକର ସଫଳ ଚାଷୀ ଭାଇମାନଙ୍କୁ ସମ୍ବର୍ଦ୍ଧିତ କରିଥିଲେ। ଏହି କାର୍ଯ୍ୟକ୍ରମ ବିଧାୟକ ପ୍ରଶାନ୍ତ କୁମାର ଜଗଦ୍ଦେବ, ଉପଜିଲାପାଳ କିଶୋର କୁମାର ପଣ୍ଡା, ଜିଲା କୃଷି ଅଧିକାରୀ ରବି ସେନାପତି ସମ୍ମାନିତ ଅତିଥି ଭାବେ ଯୋଗଦେଇଥିଲେ। ଜିଲାର ବିଭିନ୍ନ ବ୍ଲକର ଚାଷୀ ଯୋଗଦେଇଥିଲେ।
