ବାରିପଦା ଅଫିସ,୧୨ା୩- ଶିମିଳିପାଳ ଅଭୟାରଣ୍ୟରେ ଲାଗିଥିବା ନିଆଁ ଧିରେଧିରେ ନିୟନ୍ତ୍ରଣକୁ ଆସୁଛି। ଦୀର୍ଘଦିନ ଧରି ଲାଗିରହିଥିବା ନିଆଁ ଏବେ ପ୍ରଶମିତ ହେବାରେ ଲାଗିଛି ା ଗୁରୁବାର ଅପରାହ୍ନରେ ଅଭୟାରଣ୍ୟର ଆଭ୍ୟନ୍ତରୀଣ ଅଞ୍ଚଳର କେତେକ ସ୍ଥାନରେ ଝିପିଝିପି ବର୍ଷା ହୋଇଥିବା ବେଳେ ଦିନତମାମ ଆକାଶ ମେଘାଚ୍ଛନ୍ନ ରହିଥିଲା। ଜଙ୍ଗଲ ନିଆଁକୁ ସମ୍ପୂର୍ଣ୍ଣ ରୋକିବାକୁ ହେଲେ ଦୁଇତିନି ଦିନ ଧରି ବର୍ଷାର ଆବଶ୍ୟକତା ରହିଛି। ତେବେ ବିଭାଗୀୟ କର୍ମଚାରୀ ଓ ଜିଲାବାସୀଙ୍କ ଅକ୍ଳାନ୍ତ ପରିଶ୍ରମ ଯୋଗୁ ନିଆଁକୁ ରୋକାଯାଇ ପାରିଛି।
ଶିମିଳିପାଳ ଅଭୟାରଣ୍ୟରେ ଥିବା ୨୧ଟି ରେଞ୍ଜ ମଧ୍ୟରୁ ବାର୍ହାକାମୁଡ଼ା, ଭଞ୍ଜବସା ଓ ପୋଡ଼ାଡ଼ିହା ରେଞ୍ଜ ଅଞ୍ଚଳର କେତେକ ସ୍ଥାନରେ ନିଆଁ ଜଳୁଛି। ଗୁରୁବାର ଅପରାହ୍ନରେ ଉକ୍ତ ଅଞ୍ଚଳରେ ଝିପିଝିପି ବର୍ଷା ହୋଇଥିବା ବେଳେ କର୍ମଚାରୀମାନେ ନିଆଁକୁ ଆୟତ୍ତ କରିବା ପାଇଁ ଚେଷ୍ଟା ଜାରି ରଖିଛନ୍ତି ା ସେହିପରି ବାରିପଦା ବନଖଣ୍ଡ ଅଧୀନ ଉଦଳା ରେଞ୍ଜର ଅନନ୍ତପୁର, ପଣସଗଡ଼ି, ଡୁବିଗଡ଼ା ଓ ଖଣ୍ଡାଗିରି ଜଙ୍ଗଲରେ ନିଆଁ ଲିଭୁନି। ଖବରପାଇ ବନକର୍ମଚାରୀ ଓ ଦମକଳ ବାହିନୀ ସେଠାରେ ପହଞ୍ଚି ନିଆଁକୁ ଆୟତ୍ତ କରିବାରେ ଲାଗିଛନ୍ତି ା ମୟୂରଭଞ୍ଜ ବିଜେଡିର କର୍ମକର୍ତ୍ତା ଓ ରାଜ୍ୟସଭା ସଦସ୍ୟା ମମତା ମହାନ୍ତ ନିଆଁ ଲିଭା କାର୍ଯ୍ୟରେ ସାମିଲ ହୋଇଛନ୍ତି। ଜିଲା ପର୍ଯ୍ୟବେକ୍ଷକ ତଥା ରାଜ୍ୟ ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ, କରଞ୍ଜିଆ ବିଧାୟିକା ବାସନ୍ତୀ ହେମ୍ବ୍ରମ ଓ ମୋରଡ଼ା ବିଧାୟକ ରାଜକିଶୋର ଦାସ ପ୍ରମୁଖ ଯଶିପୁର ଦେଇ ଶିମିଳିପାଳ ମଧ୍ୟରେ ଥିବା ବନବାସୀଙ୍କୁ ସଚେତନ କରିଛନ୍ତି ା ସେହିପରି ଶିମିଳିପାଳର ଉତ୍ତର ଓ ଦକ୍ଷିଣରେ ଥିବା ଜଙ୍ଗଲରେ ନିଆଁ ଲିଭା କାର୍ଯ୍ୟରେ ନିୟୋଜିତ ହୋଇଥିବା ଅଗ୍ନିଶମ କର୍ମଚାରୀଙ୍କ ନିକଟରେ ନିଆଁ ସମ୍ପର୍କିତ କୌଣସି ସୂଚନା ନ ଥିବା ରାଇରଙ୍ଗପୁରର ସହକାରୀ ଅଗ୍ନିଶମ ଅଧିକାରୀ କୃଷ୍ଣଚନ୍ଦ୍ର ସାମଲ ପ୍ରକାଶ କରିଛନ୍ତି। ତେବେ ଶିମିଳିପାଳ ଅଭୟାରଣ୍ୟର କେତେ ଅଞ୍ଚଳ ନିଆଁରେ ଭସ୍ମୀଭୂତ ହୋଇଛି, କେତେ ଜୀବଜନ୍ତୁ ପ୍ରାଣ ହରାଇଛନ୍ତି ଓ କର୍ମଚାରୀଙ୍କ ଦ୍ୱାରା ଜଙ୍ଗଲର କେତେ ଅଞ୍ଚଳକୁ ନିଆଁରୁ ରକ୍ଷା କରାଯାଇଛି ସେ ନେଇ ସବିଶେଷ ତଥ୍ୟ ଲୋକଲୋଚନକୁ ଆଣିବା ପାଇଁ ପରିବେଶବିତ ତଥା ପୂର୍ବତନ ଅବୈତନିକ ବନ୍ୟ ସରଂକ୍ଷକ ଭାନୁମିତ୍ର ଆଚାର୍ଯ୍ୟ ଦାବି କରିଛନ୍ତି। ପୂର୍ବାପେକ୍ଷା ନିଆଁକୁ ଆୟତ୍ତ କରାଯାଇଥିବା ବେଳେ ପରିସ୍ଥିତି ସୁଧାରିବାରେ ଲାଗିଛି। ଜିଲା ପ୍ରଶାସନ, ଜଙ୍ଗଲ କମିଟି, ବନ ସୁରକ୍ଷା ସମିତି, ଏସ୍ଏଚ୍ଜି ଗ୍ରୁପର ମହିଳା, ଇକୋ କ୍ଲବ ଆଦି ବିଭିନ୍ନ ସଙ୍ଗଠନ ପକ୍ଷରୁ ଜଙ୍ଗଲ ସନ୍ନିକଟ ଜନସାଧାରଣଙ୍କୁ ସଚେତନ କରାଯାଉଛି। ସବୁଜ ସୁନ୍ଦର ଶିମିଳିପାଳର ପୂର୍ବ ଗୌରବକୁ ଫେରାଇ ଆଣିବା ଓ ଏହାର ସୁରକ୍ଷା ଦିଗରେ ଆବଶ୍ୟକ ପଦକ୍ଷେପ ଗ୍ରହଣ କରିବା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରିବାକୁ ଭଞ୍ଜ ସେନାର ଜିଲା ସଭାପତି ପିଣ୍ଟୁ ମାଇତି ଦାବି କରିଛନ୍ତି ା
