ବାଙ୍ଗାଲୋର: କରୋନା ଭାଇରସ୍ର ଦ୍ୱିତୀୟ ଲହର ଯୋଗୁ ଡିସେମ୍ବରରେ ସେବା କ୍ଷେତ୍ର କାର୍ଯ୍ୟକଳାପ ଖସିଥିବା ଏକ ଘରୋଇ ସର୍ଭେରୁ ସାମ୍ନାକୁ ଆସିଛି। ବାଣିଜ୍ୟ ଏବଂ ନିଯୁକ୍ତି ଉପରେ କରୋନାର ପ୍ରଭାବ ପୁଣି ଥରେ ପଡୁଥିବା ଏହି ସର୍ଭେରେ ପ୍ରକାଶ ପାଇଛି। ଚଳିତ ଆର୍ଥତ୍କ ବର୍ଷ ପ୍ରଥମ ତ୍ରୈମାସରେ ଜିଡିପି ୨୩.୯% ହ୍ରାସ ହୋଇଥିଲା। ବର୍ତ୍ତମାନ ଅର୍ଥ ବ୍ୟବସ୍ଥା ଧୀରେ ଧୀରେ ଟ୍ରାକ୍କୁ ଫେରୁଛି। ମାତ୍ର କୋଭିଡ୍ ପୂର୍ବରୁ ବଜାରରେ ଯେଉଁ ଭଳି ସ୍ଥିତି ଥିଲା ତାହା ଏବେ ଯାଏ ଆସିପାରି ନାହିଁ। ଭାରତୀୟ ଅର୍ଥ ବ୍ୟବସ୍ଥାକୁ ସେବା କ୍ଷେତ୍ରର ଯୋଗଦାନ ଗୁରୁତ୍ୱପୂର୍ଣ୍ଣ ରହି ଆସିଛି।
ନିକେଇ ଏବଂ ଆଇଏଚ୍ଏସ୍ ମାର୍କିଟ ସର୍ଭିସେସ୍ ପର୍ଚେଜିଂ ମ୍ୟାନେଜର୍ସ ଇଣ୍ଡେକ୍ସ ସୂଚୀ ମୁତାବକ, ଡିସେମ୍ବରରେ ସେବା କ୍ଷେତ୍ର ୫୨.୩% ସ୍ତରକୁ ଖସିଛି। ଏହା ନଭେମ୍ବରରେ ୫୩.୭% ସ୍ତରରେ ରହିଥିଲା। ମାତ୍ର ଏହା ଏବେ ମଧ୍ୟ ୫୦% ସ୍ତର ଉପରେ ରହିଛି। କୋଭିଡ୍ର ଦ୍ୱିତୀୟ ଲହର ଆସିଥିବାରୁ ଏହା ବାଣିଜ୍ୟ ପାଇଁ ପୁଣିଥରେ ଅନିଶ୍ଚିତତା ସୃଷ୍ଟି କରିବା ଆଶଙ୍କା ରହିଛି ବୋଲି ଆଇଏଚ୍ଏସ୍ ମାର୍କିଟର ଅର୍ଥନୀତିଜ୍ଞ ପଲିମା ଡି ଲିମା କହିଛନ୍ତି। କୋଭିଡ୍ ସଂକ୍ରମଣ କ୍ଷେତ୍ରରେ ଭାରତ ଦ୍ୱିତୀୟ ସ୍ଥାନରେ ରହିଛି। ଅପରପକ୍ଷରେ ସାରା ଦେଶରେ ଟିକାକରଣ ଲାଗି ସରକାର ଦୁଇଟି ଟିକାକୁ ମଞ୍ଜୁରୀ ପ୍ରଦାନ କରିଛନ୍ତି।
ଦେଶର କେତେକ ସହରରେ ରାତ୍ରିକାଳୀନ କର୍ଫ୍ୟୁ ଲାଗିବା ଯୋଗୁ ଏହା ଚାହିଦା ଉପରେ ପ୍ରଭାବ ପକାଉଛି। ଚାହିଦା କମ୍ ରହିବା ଯୋଗୁ ଫାର୍ମଗୁଡିକ ଦାମ୍ କମାଉଛନ୍ତି। ଅପରପକ୍ଷରେ ଇନ୍ପୁଟ ମୂଲ୍ୟ ଅଧିକ ରହିବା ଯୋଗୁ ଫାର୍ମଗୁଡିକ ପ୍ରଭାବିତ ହେଉଛନ୍ତି। ସେହିଭଳି ଏବେ ମଧ୍ୟ ନିଯୁକ୍ତି ବଜାର ପ୍ରଭାବିତ ହୋଇ ରହିଛି। କୋଭିଡ୍ ସେବା କ୍ଷେତ୍ରକୁ ମଧ୍ୟ ପ୍ରଭାବିତ କରି ରଖିଛି। ଏଥିଯୋଗୁ ଅନେକ କମ୍ପାନୀ ଆର୍ଥତ୍କ ସମସ୍ୟା ଦେଇ ଗତି କରୁଛନ୍ତି। ଫଳରେ କମ୍ପାନୀଗୁଡିକ ନୂଆ କର୍ମଚାରୀଙ୍କୁ ନିଯୁକ୍ତି ଦେବାରେ ସମସ୍ୟା ସାମ୍ନା କରୁଛନ୍ତି। ମହାମାରୀ ଯୋଗୁ ବଜାରରେ ଅନିଶ୍ଚିତତା ଜାରି ରହିଛି। ଟଙ୍କାର ମୂଲ୍ୟ ଖସୁଥିବା ବେଳେ ଦରଦାମ ବୃଦ୍ଧି ଜନିତ ଚାପ ଲାଗି ରହିଛି। ଫ୍ୟାକ୍ଟ୍ରି କାର୍ଯ୍ୟକଳାପ ବଢିଥିଲେ ମଧ୍ୟ ଚାହିଦା ଖସିବାରୁ ସେବା କ୍ଷେତ୍ର ପିଏମ୍ଆଇ ଖସିଥିବା ନଜରକୁ ଆସିଛି।
