ନୂଆଦିଲ୍ଲୀ: ସୋମବାର ଲଗାତର ଦ୍ୱିତୀୟ ସେସନ ଲାଗି ଭାରତୀୟ ପୁଞ୍ଜି ବଜାରରେ ହ୍ରାସ ଧାରା ପରିଲକ୍ଷିତ ହୋଇଛି। ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ)ର ସେନ୍ସେକ୍ସ ୪୫୦ରୁ ଊର୍ଦ୍ଧ୍ୱ ପଏଣ୍ଟ ଖସିଥିବା ନଜରକୁ ଆସିଛି। ରିଜର୍ଭ ବ୍ୟାଙ୍କ ସ୍ୟାଡୋ ବ୍ୟାଙ୍କଗୁଡିକ ଲାଗି ନିୟମ କଡ଼ାକଡ଼ି କରିବା ନେଇ ଖବର ଆସିବା ପରେ ପୁଞ୍ଜି ବଜାର ଉପରେ ଗଭୀର ପ୍ରଭାବ ପଡ଼ିଛି। ୩୦ ଶେୟାର ବିଶିଷ୍ଟ ବମ୍ବେ ଷ୍ଟକ୍ ଏକ୍ସଚେଞ୍ଜ ୪୭୦ ପଏଣ୍ଟ(୦.୯୬%) ଖସିବା ଯୋଗୁ ୪୮,୫୬୬ ପଏଣ୍ଟ ସ୍ତରରେ କାରବାର ବନ୍ଦ ହୋଇଛି। ସେହିଭଳି ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ(ଏନ୍ଏସ୍ଇ) ନିଫ୍ଟି ୧୫୨ ପଏଣ୍ଟ (୧.୦୬%)ନିମ୍ନରେ ରହି ୧୪,୨୮୧ ପଏଣ୍ଟ ସ୍ତରରେ ରହିଛି।
ସେନ୍ସେକ୍ସରେ କାରବାର କ୍ଷତି ସହିଥିବା କମ୍ପାନୀଗୁଡ଼ିକ ମଧ୍ୟରେ ଓଏନ୍ଜିସି, ସନ୍ଫାର୍ମା, ପାଓ୍ବାର ଗ୍ରୀଡ୍, ବଜାଜ ଫାଇନାନ୍ସ, ଇଣ୍ଡସ୍ ଇଣ୍ଡ ବ୍ୟାଙ୍କ, ଡକ୍ଟର ରେଡି ରହିଛି। ଏମାନଙ୍କ ଶେୟାର ପ୍ରାୟ ୪.୫୯% ଖସିଛି। ଅପରପକ୍ଷରେ ରିଲାଏନ୍ସ, ଟାଇଟାନ, ଏଚ୍ଡିଏଫ୍ସି ବ୍ୟାଙ୍କ ଏବଂ ଆଇଟିସିର ଶେୟାର କାରବାର ପ୍ରାୟ ୨.୩୭% ବୃଦ୍ଧି ପାଇଛି। ଏନ୍ଏସ୍ଇ ପ୍ଲାଟ୍ଫର୍ମରେ ନିଫ୍ଟି ମେଟାଲ, ଫାର୍ମା ଏବଂ ପିଏସ୍ୟୁ ବ୍ୟାଙ୍କ ଶେୟାର ପ୍ରାୟ ୪.୦୮% ଖସିଛି। ପୁଞ୍ଜିବଜାରରେ ବିଦେଶୀ ନିବେଶକମାନେ ସୋମବାର ୯୧୭.୦୬ କୋଟି ଟଙ୍କା ନିବେଶ କରିଛନ୍ତି।
