ନୂଆଦିଲ୍ଲୀ: ସୋସିଆଲ ମେସେଜିଂ ଆପ୍ ହ୍ବାଟ୍ସଆପ୍ର ନୂଆ ପ୍ରିଭେସି ନିୟମ ଇଚ୍ଛାଧୀନ। ଏହାକୁ ଗ୍ରହଣ କରିବା ନ କରିବା ୟୁଜରଙ୍କ ଇଚ୍ଛା ଉପରେ ନିର୍ଭର କରୁଛି। ଯଦି ଜଣେ କମ୍ପାନୀର ନୂଆ ନିୟମରେ ରହିଥିବା ସର୍ତ୍ତକୁ ନ ଗ୍ରହଣ କରନ୍ତି ତେବେ ଏହି ପ୍ଲାଟ୍ଫର୍ମ ଛାଡ଼ି ନୂଆ ଆପ୍ ବ୍ୟବହାର କରିପାରିବେ ବୋଲି ଦିଲ୍ଲୀ ଉଚ୍ଚ ନ୍ୟାୟାଳୟ ସୋମବାର କହିଛନ୍ତି।
ହ୍ବାଟ୍ସଆପ୍ର ନୂଆ ପ୍ରିଭେସି ପଲିସିକୁ ନେଇ ଜଣେ ଆଇନଜୀବୀ ହାଇକୋର୍ଟରେ ଚ୍ୟାଲେଞ୍ଜ କରିଥିଲେ। ଏହାର ଶୁଣାଣି କରି ଜଷ୍ଟିସ ସନ୍ଦୀପ ସଚ୍ଚଦେବା କହିଛନ୍ତି, ହ୍ବାଟ୍ସଆପ୍ ଏକ ଘରୋଇ ଆପ୍। ଏଥିରେ ଜଣେ ଯୋଗଦେବେ କି ନାହିଁ ତାହା ସ୍ବେଚ୍ଛାକୃତ। ଏହି ଆପ୍କୁ ବ୍ୟବହାର ନ କରି ଅନ୍ୟ ଆପ୍ଳିକେଶନକୁ ମଧ୍ୟ ଜଣେ ବ୍ୟବହାର କରିପାରିବେ। ଫେବୃୟାରୀରୁ ହ୍ବାଟ୍ସଆପ୍ ଏହାର ନୂଆ ପ୍ରିଭେସି ପଲିସି ଲାଗୁ କରିବାର ଥିଲା। ମାତ୍ର ଏହାକୁ ନେଇ ୟୁଜରଙ୍କ ପକ୍ଷରୁ ବିରୋଧ କରାଯିବାରୁ ନୂଆ ନିୟମ ଲାଗୁ କରିବା ଅବଧିକୁ କମ୍ପାନୀ ମେ ମାସ ୧୫ ଯାଏ ବଢାଇଛି। କୋର୍ଟ ପୁଣି କହିଛନ୍ତି, ମୋବାଇଲ ଆପ୍ଲିକେଶନଗୁଡିକର ସର୍ତ୍ତକୁ ଯଦି ୟୁଜର ପଢନ୍ତି ତେବେ ଅନେକ ଆଶ୍ଚର୍ଯ୍ୟଜନକ ପ୍ରସଙ୍ଗ ସାମ୍ନାକୁ ଆସିବ। ସର୍ତ୍ତକୁ ୟୁଜର ସହଜରେ ଗ୍ରହଣ କରି ନେଉଛନ୍ତି। ଏପରିକି ଗୁଗଲ ମ୍ୟାପ୍ ୟୁଜରଙ୍କ ସବୁ ଡାଟା ସଂଗ୍ରହ କରୁଥିବା ବେଳେ ଏହାକୁ ଷ୍ଟୋର ମଧ୍ୟ କରୁଥିବା କୋର୍ଟ ପ୍ରକାଶ କରିଛନ୍ତି।
କେଉଁ ଡାଟା ପ୍ରଘଟ କଥା ଆବେଦନକାରୀ ଉଠାଇଛନ୍ତି ବୋଲି କୋର୍ଟ ପ୍ରଶ୍ନ କରିଛନ୍ତି। କେନ୍ଦ୍ର ସରକାର ନ୍ୟାୟାଳୟଙ୍କ ସହ ଏହି ପ୍ରସଙ୍ଗରେ ସହମତ ହୋଇଛନ୍ତି। ପ୍ରସଙ୍ଗକୁ ଭଲ ଭାବେ ତର୍ଜମା କରାଯିବାର ଆବଶ୍ୟକତା ରହିଛି। ଫେସ୍ବୁକ ଏବଂ ହ୍ବାଟ୍ସଆପ୍ ପକ୍ଷରୁ ବରିଷ୍ଟ ଓକିଲ କପିଲ ସିବଲ ଏବଂ ମୁକୁଲ ରୋହତାଗୀ ହାଜର ହୋଇ କୋର୍ଟଙ୍କୁ କହିଛନ୍ତି, ଏହା ଉପରେ ଅନେକ ଅଭିଯୋଗ ଉଠୁଛି ଯାହାର କି କୌଣସି ଭିତ୍ତି ନାହିଁ। ଏପରିକି ପରିବାର ଏବଂ ସାଙ୍ଗସାଥୀଙ୍କ ମଧ୍ୟରେ ହେଉଥିବା ଚାଟ୍ ଏନ୍କ୍ରିପଶନ ହୋଇ ରହୁଛି। ଏହାଦ୍ୱାରା ହ୍ବାଟ୍ସଆପ ମଧ୍ୟ ଡାଟାକୁ ଷ୍ଟୋର କରି ରଖିବା କଷ୍ଟକର। ନୂଆ ନିୟମରେ ଏଥିରେ କୌଣସି ପରିବର୍ତ୍ତନ କରାଯାଇନାହିଁ। ଓକିଲ ଜଣକ ତାଙ୍କ ଆବେଦନରେ କହିଛନ୍ତି, ହ୍ବାଟ୍ସଆପର ନୂଆ ନିୟମ ସମ୍ବିଧାନର ପ୍ରିଭେସି ଅଧିକାରକୁ ବିପନ୍ନ କରୁଛି। ୟୁଜରଙ୍କ ଅନ୍ଲାଇନ କାର୍ଯ୍ୟକଳାପକୁ ହ୍ବାଟ୍ସଆପ୍ ଆକ୍ସେସ୍ କରିପାରିବ।
