ଭୁବନେଶ୍ୱର, ୪।୫(ବ୍ୟୁରୋ): ରାଜ୍ୟରେ ଟିକା ଅଭାବ ଯୋଗୁ ଦ୍ୱିତୀୟ ଡୋଜ୍ ନେବାକୁ ଥିବା ହିତାଧିକାରୀ ଟିକାକରଣରୁ ବଞ୍ଚତ୍ତ ହେଉଛନ୍ତି। ତେଣୁ ଏବେ ଦ୍ୱିତୀୟ ଡୋଜ୍ ହିତାଧିକାରୀଙ୍କୁ ପ୍ରାଥମିକତା ଦେବା ପାଇଁ ସ୍ବାସ୍ଥ୍ୟ ବିଭାଗ ନିର୍ଦ୍ଦେଶ ଦେଇଛି। ଏ ନେଇ ସୋମବାର ସ୍ବାସ୍ଥ୍ୟ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ସମସ୍ତ ଜିଲାପାଳ, ମହାନଗର ନିଗମ କମିଶନର ଓ ଜିଲା ଚିକିତ୍ସାଧିକାରୀଙ୍କୁ ଚିଠି ଲେଖିଛନ୍ତି। ସେ ତାଙ୍କ ଚିଠିରେ ଉଲ୍ଲେଖ କରିଛନ୍ତି ଯେ, ଏପ୍ରିଲ ୨୯ ସୁଦ୍ଧା ରାଜ୍ୟରେ ୮,୯୦,୯୧୮ ହିତାଧିକାରୀ (ସ୍ବାସ୍ଥ୍ୟକର୍ମୀ, ସମ୍ମୁଖ ଯୋଦ୍ଧା, ୪୫ ବର୍ଷ ଓ ଊର୍ଦ୍ଧ୍ୱ ବୟସର ବ୍ୟକ୍ତି) ଟିକା ନେଇ ପାରି ନାହାନ୍ତି। କେନ୍ଦ୍ର ସରକାରଙ୍କ ସୀମିତ ଟିକା ଯୋଗାଣ ଯୋଗୁ ଏ ପରିସ୍ଥିତି ସୃଷ୍ଟି ହୋଇଛି। କେଉଁମାନେ ଦ୍ୱିତୀୟ ଡୋଜ୍ ଟିକା ନେଇ ନାହାନ୍ତି, ତାହାର ତାଲିକା କରିବାକୁ କୁହାଯାଇଛି। ପ୍ରଥମେ ଯେଉଁମାନେ ଦ୍ୱିତୀୟ ଡୋଜ୍ ଟିକା ନେଇନାହାନ୍ତି ସେମାନଙ୍କୁ ଟିକା ଦିଆଯିବ। ଏହାପରେ ଯଦି ଟିକା ବଳିବ ତେବେ ଅନ୍ୟ ସ୍ବାସ୍ଥ୍ୟକର୍ମୀ ଓ ସମ୍ମୁଖ ଯୋଦ୍ଧାଙ୍କୁ ପ୍ରଥମ ଡୋଜ୍ ଟିକା ଦିଆଯାଇପାରିବ। ଏହାପରେ ଯଦିବି ଟିକା ବଳେ ତେବେ ଅନ୍ୟ ବର୍ଗର ହିତାଧିକାରୀଙ୍କୁ ଟିକା ଦେବା ପାଇଁ ସେ ଚିଠିରେ ଲେଖିଛନ୍ତି।
ସରକାରୀ ହସ୍ପିଟାଲରେ ନେଇହେବ ଦ୍ୱିତୀୟ ଡୋଜ୍ ଟିକା
ସାରା ଦେଶରେ ତୃତୀୟ ପର୍ଯ୍ୟାୟ ଟିକାକରଣ ଆରମ୍ଭ ହୋଇଛି। ତେଣୁ ମେ’ ୧ରୁ ଘରୋଇ ହସ୍ପିଟାଲକୁ ଆଉ ରାଜ୍ୟ ସରକାର ଟିକା ଦେଉନାହାନ୍ତି। କେନ୍ଦ୍ର ସରକାରଙ୍କ ନିୟମାନୁସାରେ, ଏଣିକି ଘରୋଇ ହସ୍ପିଟାଲଗୁଡ଼ିକ ସିଧାସଳଖ ଟିକା ଉପତ୍ାଦନକାରୀ ସଂସ୍ଥାଠାରୁ ଆଣିପାରିବେ। ଏହି ଆଧାରରେ ଯେଉଁମାନେ ଏବେ ଘରୋଇ ହସ୍ପିଟାଲରେ ଟିକା ନେବେ ଧାର୍ଯ୍ୟ ମୂଲ୍ୟ ଦେବାକୁ ପଡିବ। ତେବେ ଯେଉଁମାନେ ପ୍ରଥମ ଡୋଜ୍ ଘରୋଇ ହସ୍ପିଟାଲରେ ନେଇଛନ୍ତି, ସେମାନେ ଚାହିଁଲେ ସରକାରୀ ହସ୍ପିଟାଲରେ ଦ୍ୱିତୀୟ ଡୋଜ୍ ଟିକା ମାଗଣାରେ ନେଇପାରିବେ। ଯେଉଁମାନେ ଏପ୍ରିଲ ୩୦ ଏବଂ ଏହା ପୂର୍ବରୁ ପ୍ରଥମ ଡୋଜ୍ ଘରୋଇ ହସ୍ପିଟାଲରେ ନେଇଛନ୍ତି, ସେମାନଙ୍କୁ କେବଳ ସରକାରୀ ହସ୍ପିଟାଲରେ ଦ୍ୱିତୀୟ ଡୋଜ୍ ନେବାକୁ ଅନୁମତି ମିଳିବ। ଏହି ନିର୍ଦ୍ଦେଶକୁ ନିଜ ଜିଲାରେ ପାଳନ କରିବା ପାଇଁ ସୋମବାର ସ୍ବାସ୍ଥ୍ୟ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ସମସ୍ତ ଜିଲାପାଳଙ୍କୁ ଚିଠି ଲେଖି ଜଣାଇଛନ୍ତି।
