ଛତ୍ରପୁର ୩୧।୭(ଦିଲ୍ଲୀପ ସାମଲ): ଦିନକୁ ଦିନ କୂଳ ଲଙ୍ଘିବାରେ ଲାଗିଛି ଆର୍ଯ୍ୟପଲ୍ଲୀ ସମୁଦ୍ର। ପୂର୍ବରୁ ଆର୍ଯ୍ୟପଲ୍ଲୀ ଗ୍ରାମଟି ସମୁଦ୍ର ଠାରୁ ୫ କି.ମି. ଦୂରରେ ରହିଥିବା ବେଳେ ବର୍ତ୍ତମାନ ତାହା ୫୦ ମିଟର ଦୂରରେ ରହିଛି । ଦିନକୁ ଦିନ ସମୁଦ୍ର କୂଳ ମାଡି ମାଡି ଆସୁଥିବା ବେଳେ ଗତକାଲି ରାତ୍ରରେ ସମୁଦ୍ର ଗର୍ଭରେ ଲୀନ ହୋଇଯାଇଛି ଏକ ସେଡ । ଏହା ସହ କେ. ଆର୍ଯ୍ୟପଲ୍ଲୀ ଠାରୁ ମେରାଇନ ରାସ୍ତାର ଅର୍ଦ୍ଧେକ ସମୁଦ୍ର ଗର୍ଭରେ ଲୀନ ହୋଇଯାଇଥିବା ଦେଖିବାକୁ ମିଳିଛି । ଯାହାକୁ ନେଇ ଭୟଭୀତ ଅବସ୍ଥାରେ ରହିଛନ୍ତି ଆର୍ଯ୍ୟପଲ୍ଲୀ ଗ୍ରାମ ବାସିନ୍ଦା। ଜଳବାୟୁ ପରିବର୍ତ୍ତନ ସାଙ୍ଗକୁ ସମୁଦ୍ର ଉଗ୍ର ରୂପ ଧାରଣ କରିଥିବା ଯୋଗୁଁ କୂଳ ଖାଉଛି ସମୁଦ୍ର। ସମୁଦ୍ର ଉପକୂଳ ଅଂଚଳରେ ଥିବା ଆର୍ଯ୍ୟପଲ୍ଲୀ ଗ୍ରାମଟି କେବେ ନା କେବେ ସମୁଦ୍ର ମଧ୍ୟରେ ଲୀନ ହୋଇଯିବାର ଭୟ ଏବେ ଗ୍ରାମବାସୀଙ୍କୁ ଭୟଭୀତ କରିଛି । ପୂର୍ବରୁ ସମୁଦ୍ର କୂଳରେ ଥିବା ବିଭିନ୍ନ ଛୋଟ ଛୋଟ ମନ୍ଦିର ସମୁଦ୍ର ଗର୍ଭରେ ଲୀନ ହୋଇଯାଇଥିବା ବେଳେ ଏବେ ଏକ ସେଡ ସହ ରାସ୍ତା ସମୁଦ୍ର କୂଳରେ ଲୀନ ହୋଇଯାଇଛି। ଏନେଇ ଗ୍ରାମବାସୀଙ୍କ ପକ୍ଷରୁ ବହୁବାର ଜିଲା ପ୍ରଶାସନକୁ ଦାବି କରାଯାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ । ଏହି ଦାବି ନେଇ ପୂର୍ବରୁ ଜିଲାର ସମୁଦ୍ର କୂଳରେ ରହିଥିବା ସୋନପୁର ଠାରୁ ପ୍ରୟାଗୀ ପର୍ଯ୍ୟନ୍ତ ସମସ୍ତ ଗ୍ରାମବାସୀମାନେ ଆନ୍ଦୋଳନ ମଧ୍ୟ କରିଥିଲେ। ହେଲେ କୌଣସି ସୁଫଳ ମିଳିପାରିନଥିବାରୁ ଗ୍ରାମବାସୀ ମାନେ ଅସନ୍ତୋଷ ବ୍ୟକ୍ତ କରିଛନ୍ତି । ଆଜି ରାସ୍ତା ଓ ସେଡଟି ସମୁଦ୍ର ଗର୍ଭରେ ଲୀନ ହୋଇଯିବା ପରେ ଯୁଦ୍ଧକାଳୀନ ପରିସ୍ଥିତିରେ ପଥରବନ୍ଧ ନିର୍ମାଣ ଚାଲିଥିବା ବେଳେ ଏହା ପର୍ଯ୍ୟାପ୍ତ ହୋଇନଥିବା ଗ୍ରାମବାସୀମାନେ କହିଛନ୍ତି । ଏଣୁ ଯଥାଶୀଘ୍ର ଏହାର ସମାଧାନ ନ ହେଲେ ଆଗାମୀ ଦିନରେ ଆର୍ଯ୍ୟପଲ୍ଲୀ ଗ୍ରାମଟି ଭାରତ ମାନଚିତ୍ରରୁ ଉଭେଇ ଯିବ ବୋଲି ମଧ୍ୟ ଗ୍ରାମବାସୀ ମାନେ କହିଛନ୍ତି ।
