ଭୁବନେଶ୍ବର, ୮ା୭(ସୁନିତ୍ ମିଶ୍ର): ପିଲାମାନେ ରାସ୍ତାରେ ଯିବା ଆସିବା ସମୟରେ ସେମାନଙ୍କ ଲାଗି ସର୍ବାଧିକ ବିପଦ ଥାଏ। ପିଲାମାନେ ହେଉଛନ୍ତି ଆମ ଦେଶର ଭବିଷ୍ୟତ। ତେଣୁ ସେମାନଙ୍କ ସୁରକ୍ଷା ସମସ୍ତଙ୍କ ପାଇଁ ପ୍ରାଥମିକତା ହେବା ଉଚିତ। ତେଣୁ ସୁବର୍ଣ୍ଣପୁରର ବିନିକାରେ ଯେଉଁ ଘଟଣା ଘଟିଲା ସେଭଳି ଯେପରି ଭବିଷ୍ୟତରେ ଆଉ କେଉଁଠାରେ ନ ହୁଏ ସେଥିଲାଗି କାର୍ଯ୍ୟାନୁଷ୍ଠାନ ନେବା ଜରୁରୀ। ରାଜ୍ୟର ଯେଉଁସବୁ ସ୍କୁଲର ମୁଖ୍ୟ ଫାଟକଗୁଡିକ ଏନ୍ଏଚ୍, ଏସ୍ଏଚ୍,ଏମ୍ଡିଆର୍ ଏବଂ ଓଡିଆର୍ ରାସ୍ତା ଆଡ଼କୁ ଅଛି ସେଗୁଡିକ ବଦଳିବ। ରାଜ୍ୟରେ ସେମିତି ଅବସ୍ଥାରେ ଯେତେସବୁ ସ୍କୁଲ ରହିଛି ତାର ମୁଖ୍ୟ ଫାଟକକୁ ବଦଳାଯାଇ ପାର୍ଶ୍ୱବର୍ତ୍ତୀ ରାସ୍ତା ଆଡ଼କୁ କରାଯିବ। ଯଦି କୌଣସି ସ୍ଥାନରେ ସ୍କୁଲ ଗୁଡ଼ିକର ମୁଖ୍ୟ ଫାଟକଗୁଡିକ ପରିବର୍ତ୍ତନ ହେଇପାରିବ ନାହିଁ ସେହି ସ୍ଥାନରେ ପିଲାଙ୍କ ସୁରକ୍ଷା ଦୃଷ୍ଟିରୁ ଆବଶ୍ୟକ ଟ୍ରାଫିକ ବ୍ୟବସ୍ଥା ଗ୍ରହଣ କରାଯିବ। ସେହିପରି ରାଜ୍ୟରେ ଯେତେସବୁ ଶିକ୍ଷାନୁଷ୍ଠାନ ସେହି ଅବସ୍ଥାରେ ରହିଛି ତୁରନ୍ତ ସେଠାରେ ଯେଉଁ ରାସ୍ତା ରହିଛି ସେହି ବିଭାଗ ପକ୍ଷରୁ ଟ୍ରାଫିକ ବ୍ୟବସ୍ଥା କରିବାକୁ ରାଜ୍ୟର ସବୁ ଜିଲାପାଳମାନଙ୍କୁ ବାଣିଜ୍ୟ ଓ ପରିବହନ ବିଭାଗ ପ୍ରମୁଖ ସଚିବ ଉଷା ପାଢ଼ୀ କହିଛନ୍ତି।
ପାଢ଼ୀ ତାଙ୍କ ଚିଠିରେ ଆହୁରି ଉଲ୍ଲେଖ କରିଛନ୍ତି, ସୁବର୍ଣ୍ଣପୁର ଜିଲା ବିନିକାଠାରେ ଗତ ୨୨ ମାର୍ଚ୍ଚ ୨୦୨୩ରେ ଏକ ବଡ ଧରଣର ସଡ଼କ ଦୁର୍ଘଟଣା ଘଟିଥିଲା। ଏଥିରେ ୩ ଜଣ ସ୍କୁଲ ଛାତ୍ରୀଛାତ୍ରଙ୍କ ମୃତ୍ୟୁ ଘଟିଥିଲା। ଏହାପରେ ଘଟଣାସ୍ଥଳକୁ ଏକ ବୈଷୟିକ ଟିମ୍ ଗସ୍ତକରି ଦୁର୍ଘଟଣା ସମ୍ପର୍କିତ ରିପୋର୍ଟ ପ୍ରସ୍ତୁତ କରିବା ପରେ ତାହା ଦାଖଲ କରିଛନ୍ତି। ଉକ୍ତ ଟିମ୍ କରିଥିବା ଅନୁସନ୍ଧାନ ଅନୁଯାୟୀ, ଦୁର୍ଘଟଣାସ୍ଥଳରେ ଲାଗି ଲାଗିକି ୩ଟି ଶିକ୍ଷାନୁଷ୍ଠାନ ରହିଛି। ପ୍ରତ୍ୟେକ ସ୍କୁଲର ମୁଖ୍ୟ ଫାଟକ ସିଧାସଳଖ ଷ୍ଟେଟ୍ ହାଇଓ୍ବେ(ଏସ୍ଏଚ୍) ଆଡ଼କୁ ଖୋଲାଯାଉଥିବା ଦେଖାଯାଇଛି। ଦୁର୍ଘଟଣାଦିନ ମଧ୍ୟ ପିଲାମାନେ ଶିକ୍ଷାନୁଷ୍ଠାନ ଶେଷ ହେବାପରେ ସେହି ମୁଖ୍ୟ ଫାଟକ ଦେଇ ଘରକୁ ଫେରୁଥିଲେ। ଦୁର୍ଘଟଣା ଘଟାଇଥିବା ଗାଡ଼ି ଦ୍ରୁତ ଗତିରେ ଆସି ପିଲାମାନଙ୍କୁ ଧକ୍କା ଦେଇଥିଲା। ତେଣୁ ରାସ୍ତାକଡ଼ରେ ଥିବା ସ୍କୁଲଗୁଡିକର ମୁଖ୍ୟ ଫାଟକ ହିଁ ସେଦିନର ଦୁର୍ଘଟଣା ଘଟିବାର ମୁଖ୍ୟ କାରଣ ବୋଲି ଜଣାପଡ଼ିଛି। ଏହା ସହ ସେହି ଶିକ୍ଷାନୁଷ୍ଠାନଗୁଡିକ ପାଖରେ କୌଣସି ସାଇନେଜ, ମାର୍କିଂ ଏବଂ ଗାଡ଼ିର ଦ୍ରୁତ ହ୍ରାସ ଲାଗି ସ୍ପିଡ୍ ବ୍ରେକର ହମ୍ପସ୍ ମଧ୍ୟ ନ ଥିବା ଅନୁସନ୍ଧାନକାରୀ ଟିମ୍ ଲକ୍ଷ୍ୟ କରିଥିବା ପାଢ଼ୀ କହିଛନ୍ତି।
ତେଣୁ ରାଜ୍ୟରେ କେଉଁସବୁ ସ୍ଥାନରେ ଶିକ୍ଷାନୁଷ୍ଠାନର ମୁଖ୍ୟ ଫାଟକ ରାସ୍ତାକୁ ଲାଗିକି ରହିଛି ତା’ର ତଦନ୍ତକରି ବିହିତ ପଦକ୍ଷେପ ନିଅ। ଏହିସବୁ ସ୍ଥାନର ଚିହ୍ନଟ ଲାଗି ଜିଲାପାଳଙ୍କ ଅଧ୍ୟକ୍ଷତାରେ ପ୍ରତି ଜିଲାରେ ଏକ କମିଟି ଗଠନ କରାଯିବ। ସେଥିରେ ଜିଲା ଶିକ୍ଷା ଅଧିକାରୀ ଆବାହକ ରହିବେ। ଏହାସହ ଆର୍ଟିଓ, ଏକ୍ଜିକ୍ୟୁଟିଭ ଇଞ୍ଜିନିୟର/ପିଡି/ଏନ୍ଏଚ୍ଆଇ, ତହସିଲଦାର ସଦସ୍ୟ ଭାବେ ମନୋନୀତ ହେବେ। ଏହି କମିଟି ରିପୋର୍ଟ ଦାଖଲ ପୂର୍ବରୁ ଡିଆର୍ଏସ୍ସିଙ୍କ ଅନୁମୋଦନ ମିଳିବା ଆବଶ୍ୟକ। ଆସନ୍ତା ଅଗଷ୍ଟ ସୁଦ୍ଧା ରିପୋର୍ଟ ଦାଖଲ କରିବା ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପାଢ଼ୀ ତାଙ୍କ ଚିଠିରେ ଉଲ୍ଲେଖ କରିଛନ୍ତି।
