ତେନ୍ତୁଳିଖୁଣ୍ଟି, ୭।୧୧(ଡି.ଏନ୍.ଏ.):ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ କପୁର ବାରିଆଘାଟ, ଦେଓପାଲିରେ ବନ୍ଧ ରହିଛି। କୋରାପୁଟ ଜିଲାର ମୁରାନରେ ମଧ୍ୟ ଏକ ବନ୍ଧ ରହିଛି। ଚାରୋଟି ଯାକ ବନ୍ଧକୁ ଯିବା ରାସ୍ତାର ଉଭୟ ପାର୍ଶ୍ୱରେ ପାହାଡ଼ ଉପର ଝରଣା ଜଳ ତଥା ମାଟି ଅତଡା ଖସିବା ଅବରୋଧ ପାଇଁ ଗାର୍ଡ ଓ୍ବାଲ ନିର୍ମାଣ କରାଯାଇଥିଲା। କିନ୍ତୁ କିଛି ବର୍ଷ ହେବ ଏହି ଓ୍ବାଲ୍ଗୁଡିକୁ ଭାଙ୍ଗି ନିୟମିତ ଭାବେ ପଥର ଚୋରି ହେଉଛି। ଏପରିକି ଡ୍ୟାମ୍ଗୁଡିକୁ ଲାଗିଥିବା ଛୋଟ ଛୋଟ ପାହାଡ଼ରୁ ମଧ୍ୟ ବିଭିନ୍ନ ଉପାୟରେ ପଥର ଚାଲାଣ ହେଉଛି।
ପୋଡ଼ାଗଡ ବନ୍ଧ ଉପରକୁ ଯିବା ବେଳେ ରାସ୍ତା ପାର୍ଶ୍ୱରେ ବର୍ଷତମାମ ରାସ୍ତା ମେଟାଲ ଓ ବୋଲଡ଼ର ଗଦା ଦେଖିବାକୁ ମିଳିବ। ବିଗତ ଦିନରେ ଏ ନେଇ ଖବର ପ୍ରକାଶ ପାଇଛି। ପାହାଡ଼ରୁ ପଥର ବାହାର କଲେ ପ୍ରକୃତିର ଭାରସାମ୍ୟ ବିଗିଡିବ। ଏହାପରେ ଡ୍ୟାମ ପ୍ରତି ବିପଦ ଅବଶ୍ୟମ୍ଭାବୀ। ଏ ଦିଗରେ ଜଙ୍ଗଲ, ରାଜସ୍ବ ବିଭାଗ, ଇନ୍ଦ୍ରାବତୀ ପ୍ରକଳ୍ପ କର୍ତ୍ତୃପକ୍ଷ କାହାରି ନଜର ପଡୁନି। ଇନ୍ଦ୍ରାବତୀ ପ୍ରକଳ୍ପ ପକ୍ଷରୁ ଝର ପାଣି ଦାଉରୁ ଏବଂ ଭୁସ୍ଖଳନରୁ ରାସ୍ତାକୁ ସୁରକ୍ଷିତ ରଖିବାକୁ ଗାର୍ଡ ଓ୍ବାର୍ଲ କରାଯାଇଥିଲ। ଏବେ ଏହାର ସୁରକ୍ଷା ପ୍ରତି ମଧ୍ୟ କର୍ତ୍ତୃପକ୍ଷଙ୍କ ନିଘା ନାହିଁ। ଡ୍ୟାମର ସୁରକ୍ଷା ପାଇଁ ୩ଟି ପର୍ଯ୍ୟାୟରେ ୨୪ ଜଣ ସୁରକ୍ଷାକର୍ମୀ ମୁତୟନ ହୋଇଛନ୍ତି। ତଥାପି ଏଭଳି ପାହାଡ଼ ଓ ଗାର୍ଡଓ୍ବାଲରୁ ପଥର ଚୋରି ସୁରକ୍ଷା ବ୍ୟବସ୍ଥା ପ୍ରତି ସନ୍ଦେହ ସୃଷ୍ଟି କରୁଛି। ପାହାଡ଼ରୁ ପଥର କାଢ଼ିବା ପାଇଁ ବ୍ଲାଷ୍ଟିଙ୍ଗ୍ କରାଗଲେ ଡ୍ୟାମ ସୁରକ୍ଷିତ ତ ବୋଲି ବୁଦ୍ଧିଜୀବୀ ପ୍ରଶ୍ନ କରିଛନ୍ତି। ଗାର୍ଡ ଓ୍ବାଲ ପାର୍ଶ୍ୱ ଅବସ୍ଥା ଦେଖି ଅଧିକାରୀମାନେ କ’ଣ ପାଇଁ ଚୁପ୍ ଅଛନ୍ତି ବୋଲି ପ୍ରଶ୍ନ ଉଠିଛି। ଯଦି ଏଭଳି ପାହାଡ଼ରୁ ପଥର ନେବା ଦ୍ୱାରା ଡ୍ୟାମର ସୁରକ୍ଷା ପ୍ରତି ବିପଦ ନାହିଁ ତେବେ ଏହାକୁ ବିଧିବଦ୍ଧଭାବେ କ୍ୱାରୀ ଘୋଷଣା କରି ପ୍ରଶାସନ ରାଜସ୍ବ ଆଦାୟ କାହିଁକି କରୁନାହିଁି ବୋଲି ବୁଦ୍ଧିଜୀବୀ ପ୍ରଶ୍ନ କରିଛନ୍ତି। ବର୍ତ୍ତମାନ ଦୁଇଟି ଡ୍ୟାମରେ ପାଚେରି ନିର୍ମାଣ ପାଇଁ ଟେଣ୍ଡର ହୋଇ କାମ ଆରମ୍ଭ ହୋଇଛି। ଏହି କାମରେ ଗାର୍ଡଓ୍ବାଲ ପଥର ଲଗାଯାଉନି ତ ବୋଲି ବୁଦ୍ଧିଜୀବୀ ପ୍ରଶ୍ନ କରିଛନ୍ତି। ଇନ୍ଦ୍ରାବତୀ ଡ୍ୟାମ୍ ସର୍କଲ ପୋଡ଼ାଗଡ଼ ବନ୍ଧ ବିଭାଗ ନିର୍ବାହୀ ଯନ୍ତ୍ରୀ ସୀମାଞ୍ଚଳ ବିଷୋୟୀଙ୍କୁ ଏ ସମ୍ପର୍କରେ ପଚାରିବାରୁ ସେ କହିଲେ ସୁରକ୍ଷା କର୍ମୀଙ୍କୁ ଗାର୍ଡଓ୍ବାଲ ଭଙ୍ଗା ରୋକିବାକୁ କୁହାଯାଇଛି। ଠିକାଦାର ଯଦି ଗାର୍ଡଓ୍ବାଲ ଭାଙ୍ଗି ପଥର ପାଚେରି ନିର୍ମାଣରେ ବ୍ୟବହାର କରୁଥିବେ ତାଙ୍କ ବିରୋଧରେ ପଦକ୍ଷେପ ପାଇଁ ଅତିରିକ୍ତ ମୁଖ୍ୟଯନ୍ତ୍ରୀ ଅନିଲ ପାଣିଗ୍ରାହୀ ଆସିଲେ ଜଣାଇବି ବୋଲି ସେ କହିଛନ୍ତି।
