କୁଚିଣ୍ଡା,୨୭ା୪(ଡି.ଏନ.ଏ.): ବୈଜ୍ଞାନିକ ପଦ୍ଧତିରେ ଚାଷୀଙ୍କ ଆୟକୁ ଦ୍ୱିଗୁଣିତ କରିବାକୁ ସରକାର ରିୱାର୍ଡ ଯୋଜନା କାର୍ଯ୍ୟକାରୀ କରିଛନ୍ତି। ସେହିପରି ଚାଷୀ ନିଜ ଇଚ୍ଛାରେ ଚାଷ କରି ଯେଭଳି ଉପକୃତ ହେବ ସେଥିପାଇଁ ପିଏମ୍କେଏସ୍ୱାଇ (ପ୍ରଧାନମନ୍ତ୍ରୀ କୃଷି ସିଚାଇ ଯୋଜନା) କାର୍ଯ୍ୟକାରୀ କରୁଛନ୍ତି। ଏହି ଦୁଇ ଯୋଜନାରେ ଚାଷ କରି କୁଚିଣ୍ଡା ବ୍ଲକର ବହୁ ଚାଷୀ ଲାଭବାନ ହୋଇଥିବା ଦେଖାଯାଇଛି।
ଚାଷ ଜମିର ଉତ୍ପାଦକତା ବୃଦ୍ଧି ଓ ସହନଶୀଳ କୃଷି ପାଇଁ ଜଳବିଭାଜିକା କାର୍ଯ୍ୟକ୍ରମରେ ସରକାର କୁଚିଣ୍ଡା ବ୍ଲକରେ ଏହି ଦୁଇ ଯୋଜନାରେ କୋଟି କୋଟି ଟଙ୍କା ବିନିଯୋଗ କରିଛନ୍ତି। କୁଚିଣ୍ଡା ବ୍ଲକ ମୃତ୍ତିକା ସଂରକ୍ଷଣ ଅଧିକାରୀ ମହେନ୍ଦ୍ର ପାଣ୍ଡେ ଏ ସମ୍ପର୍କରେ ସୂଚନା ଦେଇ କହିଛନ୍ତି, ୨୦୨୧-୨୨ ଆର୍ଥିକ ବର୍ଷରେ ରିୱାର୍ଡ ଓ ପିଏମ୍କେଏସ୍ୱାଇ ଯୋଜନାରେ ଚାଷୀଙ୍କୁ ବିଭିନ୍ନ ଉପାୟରେ ସ୍ବାବଲମ୍ବୀ କରିବା, ବୈଜ୍ଞାନିକ ପଦ୍ଧତିରେ ଚାଷ ପାଇଁ ଚାଷୀଙ୍କୁ ପ୍ରୋତ୍ସାହିତ କରିବା, ମହିଳା ଏସ୍ଏଚ୍ଜିଙ୍କ ଜୀବିକା ନିର୍ବାହ ପାଇଁ ତାଲିମ ପ୍ରଦାନ ସହ ବିଭିନ୍ନ ସହାୟତା ପ୍ରଦାନ କରାଯାଉଛି । ପିଏମ୍କେଏସ୍ୱାଇରେ ମହିଳା ଏସ୍ଏଚ୍ଜିଙ୍କ ପାଇଁ ମାଛଚାଷ, କୁକୁଡା ଚାଷ, ଛେଳି ପାଳନ, ଗୋପାଳନ, ଖଲିଦନା ସିଲେଇ, ବଡି ପାମ୍ପଡ ତିଆରି, ମହୁ ଚାଷ, ଛତୁ ଚାଷ ଆଦି ପାଇଁ ତାଲିମ ପ୍ରଦାନ ସହିତ ପ୍ରୋତ୍ସାହନ ରାଶି ଯୋଗାଇ ଦିଆଯାଉଛି। ପ୍ରାକୃତିକ ସମ୍ପଦର ରକ୍ଷଣାବେକ୍ଷଣ ନିମନ୍ତେ ସରକାର ମୃତ୍ତିକାସଂରକ୍ଷଣ ବିଭାଗ ମାଧ୍ୟମରେ ଗ୍ରାମାଞ୍ଚଳରେ ବିଭିନ୍ନ ଯୋଜନା କାର୍ଯ୍ୟକାରୀ କରୁଥିବାରୁ ଚାଷୀମାନଙ୍କ ପାଖରେ ସଫଳତା ପହଞ୍ଚତ୍ପାରୁଛି। ଜଳ ଅମଳ ପ୍ରକଳ୍ପ, କୃଷି ପୋଖରୀ, ନିର୍ଝର ପୁଷ୍କରିଣୀ, ଗତିଶୀଳ ପାଣିର ସୁରକ୍ଷା, ଜମି ଉନ୍ନୟନ, ଉଦ୍ୟାନ କୃଷିରେ ଫଳବୃକ୍ଷ ରୋପଣ, ଢିଲା ପଥର ବନ୍ଧ, ମାଟିବନ୍ଧ, ଚେକଡ୍ୟାମ ଆଦି ବହୁ ଲୋକପ୍ରିୟ ଯୋଜନା ଏବେ ଯୁଦ୍ଧକାଳୀନ ଭିତ୍ତିରେ ଚାଲିଛି। ପ୍ରଥମ ପର୍ଯ୍ୟାୟରେ ଗୋଛରା, ଲଇଗୁରା, ଉଲୁଣ୍ଡା, ଗୋପାଳପାଲି, ବାଙ୍କେ, ତୁରେଇନିକ୍ତିମାଲ, ଝାରମାଲ, ଠିଆନାଳ, ଡନସନାଡିହି ଆଦି ଗ୍ରାମରେ ଜଳବିଭାଜିକା କମିଟି ଗଠନ କରାଯାଇ ଏହା ମାଧ୍ୟମରେ ବିଭିନ୍ନ ଯୋଜନା କାର୍ଯ୍ୟକାରୀ ହେଉଛି। ପୁନଶ୍ଚ ଅନ୍ୟ ଏକ ପର୍ଯ୍ୟାୟରେ କୁର୍ମିମୁଣ୍ଡା, ଭାଲୁବାହାଲ, ଅର୍ଜୁନବାଡ, ରାମତିଲେଇମାଲ, ଖଣ୍ଡୋକଟା, କିଣ୍ଡିରା, କୁଟୁରାଚୁଆଁ, କିରାଶାସନ ଆଦି ଗ୍ରାମରେ ଜଳବିଭାଜିକା କମିଟି ଗଠିତ ହୋଇ ବିଭିନ୍ନ କାର୍ଯ୍ୟକ୍ରମ ଆରମ୍ଭ ହୋଇଛି। ବାଙ୍କେ ପଞ୍ଚାୟତ ବାବୁମଲଟି ଗ୍ରାମର ଜଗବନ୍ଧୁ କିଷାନ ଓ ଟାଇଁସର ପଞ୍ଚାୟତ କୁଲାଙ୍ଗଯୋର ଗ୍ରାମର ଆଶାରାମ କିଷାନ ଏହି ଯୋଜନାର ସଦବିନିଯୋଗ କରି ସମସ୍ତ ପ୍ରକାର ଚାଷ କରି ଅଞ୍ଚଳ ପାଇଁ ଉଦାହରଣ ପାଲଟିଛନ୍ତି। ସେହିପରି ବାଙ୍କେ ଫଲସାଚୁଆଁ ଗ୍ରାମର ଗଙ୍ଗାଧରଙ୍କ ଦାସ, ତମନଗୋଡାର ଶେଖର କିଷାନ, ଗୋଛରାର ଉଦିତ ପ୍ରତାପ ଦେଓ, ହୀରାଲାଲ ବେହେରା, ଉଜ୍ଜ୍ବଳ ସିଂ ପ୍ରମୁଖ ଏହି ଯୋଜନାରୁ ଉପକୃତ ହୋଇଥିବା ମୃତ୍ତିକା ସଂରକ୍ଷଣ ଅଧିକାରୀ ପାଣ୍ଡେ କହିଛନ୍ତି।
