ଭୁବନେଶ୍ୱର,୨୮।୭(ଶର୍ମିଷ୍ଠା ପାଣିଗ୍ରାହୀ): ଶିଖରଚଣ୍ଡୀ ପ୍ରକଳ୍ପର ଶୁଣାଣି ପୁଣି ଅଗଷ୍ଟ ୩୧ ତାରିଖ ପର୍ଯ୍ୟନ୍ତ ଘୁଞ୍ଚିଲା। ଜୁଲାଇ ୫ରେ ଏହାର ପ୍ରଥମ ଶୁଣାଣି ହୋଇଥିବାବେଳେ ଗୁରୁବାର ଦ୍ୱିତୀୟ ଶୁଣାଣି ଥିଲା। ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ପାହାଡ଼ ଉପରେ ୱାଟ୍କୋର କୌଣସି କାର୍ଯ୍ୟ ହୋଇପାରିବ ନାହିଁ। ମା’ ଶିଖରଚଣ୍ଡୀ ଆଞ୍ଚଳିକ ସୁରକ୍ଷା ସମିତି ପକ୍ଷରୁ ପ୍ରମାଣ ସ୍ବରୂପ ଅନେକ ତଥ୍ୟ କୋଲକାତା କୋର୍ଟରେ ଦାଖଲ କରାଯାଇଛି। ଏଥିରେ ଉଲ୍ଲେଖ କରାଯାଇଛି ଯେ, ଏନ୍ଜିଟିରେ ଦାଖଲ ରିପୋର୍ଟରେ ସମ୍ପୂର୍ଣ୍ଣ ତଥ୍ୟ ଦିଆଯାଇନାହିଁ। ଯାହାକୁ ନେଇ ସମିତି ପକ୍ଷରୁ ଅସନ୍ତୋଷ ପ୍ରକାଶ ପାଇଛି। ଜଙ୍ଗଲ କିସମ ଥିବା ପ୍ଲଟ ନଂ ୧୨୮୭ ଓ ୧୨୮୮ରେ କାର୍ଯ୍ୟ ହେଉଥିଲା। ଏଥିସହ ପୁରୀରୁ କଢାଯାଇଥିବା ରେକର୍ଡ ସମ୍ପୂର୍ଣ୍ଣ ୨୧୨ ଏକର ଝାଟି ଜଙ୍ଗଲ ଥିଲା। କିନ୍ତୁ ଏଠାରେ ଜଙ୍ଗଲ ନ ଥିଲା ବୋଲି ଓଡ଼ିଶା ଜଙ୍ଗଲ ବିଭାଗ ପୂର୍ବ ରିପୋର୍ଟରେ ଦାଖଲ କରିଛି। ସେଠାରେ ଥିବା ଔଷଧ ବୃକ୍ଷର ସମସ୍ତ ତଥ୍ୟ ମଧ୍ୟ ପ୍ରଦାନ କରାଯାଇଥିଲା। ଏହାମଧ୍ୟରୁ ଅନେକ ଗଛ ଲୋପ ପାଉଥିବା ଔଷଧ ବୃକ୍ଷ ଯାହା ବିଭିନ୍ନ ସର୍ଭେ ତଥ୍ୟ ଉପସ୍ଥାପିତ କରାଯାଇଛି। ଜଙ୍ଗଲ ଆଇନକୁ ସମ୍ପୂର୍ଣ୍ଣ ଉଲ୍ଲଂଘନ କରି ଇଲ୍ଡ୍କୋ, ବିଡିଏ ଏବଂ ୱାଟ୍କୋ ମନଇଚ୍ଛା ଏଠରେ କାର୍ଯ୍ୟ କରୁଛନ୍ତି ବୋଲି ସମିତି ପକ୍ଷରୁ ଉଲ୍ଲେଖ କରାଯାଇଛି। ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବା ପାଇଁ କୋର୍ଟରେ ସମିତିର ସଚିନ ମହାପାତ୍ରଙ୍କ ତରଫରୁ ଲଢ଼ୁଥିବା ଓକିଲ ଶଙ୍କର ପାଣି ଦାବି କରିଛନ୍ତି। ଏଥିସହ ଅନେକ ତଥ୍ୟ ପ୍ରମାଣ କୋର୍ଟରେ ଦାଖଲ କରାଯାଇଛି। ପାହାଡ଼ ଜଙ୍ଗଲ ବଞ୍ଚେଇ ସେଠାରେ ପୁନର୍ବାର ଜଙ୍ଗଲ ସହ ନଷ୍ଟ ହୋଇଥିବା ଔଷଧୀୟ ବୃକ୍ଷର ଚାରା ରୋପଣ କରାଯାଇ ଉଦ୍ଧାର କରଯାଉ ଓ ଶୀଘ୍ର ପାଣିଟାଙ୍କିକୁ ଅନ୍ୟତ୍ର ସ୍ଥାନାନ୍ତର କରିବା ପାଇଁ ପକ୍ଷ ରଖିଥିଲେ। ଅନ୍ୟପକ୍ଷେ ଚନ୍ଦକା ସରପଞ୍ଚ ତାଙ୍କ ଅଞ୍ଚଳରେ ତାଙ୍କ ଅନୁମତି ବିନା ବେଆଇନ ଭାବେ କାର୍ଯ୍ୟ ହେଉଥିବାରୁ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଏହି ସବୁ ଭିତରେ ସମିତି ପକ୍ଷରୁ ଅଭିଯୋଗ କରାଯାଇଛି ଯେ, ନେତୃତ୍ୱ ନେଉଥିବା ଲୋକଙ୍କୁ ପୋଲିସ ବାରମ୍ବାର ଧମକ ଦେଉଛନ୍ତି। ପଟିଆଗଡ଼ର ନେତୃତ୍ୱ ନେଉଥିବା ସମିତିର ସଦସ୍ୟ ନିର୍ମଳ ମହାରଣାଙ୍କୁ ଏକ ମିଛ କେସ୍ରେ ଫସାଇବା ପାଇଁ ତାଙ୍କ ଘରକୁ ଚନ୍ଦ୍ରଶେଖର ଥାନା ପକ୍ଷରୁ ନୋଟିସ ପଠାଯାଇଛି। ତେଣୁ ସମିତି ତରଫରୁ ଏନ୍ଏଚ୍ଆର୍ସି ଏ ବାବଦରେ ଏକ ଲିଖିତ ଅଭିଯୋଗ କରିବା ସହ ପୋଲିସ ପକ୍ଷରୁ ଏଭଳି ଅସୁବିଧା କଲେ ଆଗାମୀ ଦିନରେ ଅଞ୍ଚଳବାସୀ ଏହାର ଜବାବ ଦେବେ ବୋଲି ଚେତାବନୀ ଦିଆଯାଇଛି।
